ନୂଆଦିଲ୍ଲୀ,୧୨।୧୨: କେନ୍ଦ୍ର ସରକାର ଏପର୍ଯ୍ୟନ୍ତ ପ୍ରାୟ ୧.୨୫ ଲକ୍ଷ କୋଟି ଟଙ୍କା ମୂଲ୍ୟର କଳା ଟଙ୍କା ଜବତ କରିଛନ୍ତି। କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ ସୋମବାର ଏନେଇ ସୂଚନା ଦେଇଛନ୍ତି। ୪,୩୦୦ କୋଟି ଟଙ୍କା ମୂଲ୍ୟର ବେନାମୀ ସମ୍ପତ୍ତି ସହିତ ୧,୨୫୪ ଲକ୍ଷ କୋଟି ଟଙ୍କା ମୂଲ୍ୟର କଳା ଟଙ୍କା ଜବତ କରାଯାଇଛି ବୋଲି ସେ କହିଛନ୍ତି। ଏଥି ସହିତ ୧.୭୫ ଲକ୍ଷ ସେଲ କମ୍ପାନୀଗୁଡିକର ପଞ୍ଜୀକରଣ ବାତିଲ କରାଯାଇଛି।
ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ଏକ ମନ୍ତବ୍ୟକୁ ମନେ ପକାଇ ଅଶ୍ୱିନୀ କହିଛନ୍ତି, ଆଜି ୧୦୦ ପ୍ରତିଶତ ରାଶି ହିତାଧିକାରୀଙ୍କ ନିକଟରେ ଡିବିଟି (ସିଧାସଳଖ ବ୍ୟାଙ୍କ) ମାଧ୍ୟମରେ ପହଞ୍ଚିଛି। ଥରେ ରାଜୀବ ଗାନ୍ଧୀ କହିଥିଲେ ୮୫ ପ୍ରତିଶତ ଯୋଜନା ବାଟମାରଣା ହେଉଛି, କିନ୍ତୁ ଆଜି ୨୬ ଲକ୍ଷ କୋଟି ଟଙ୍କା ସିଧାସଳଖ ଲୋକଙ୍କ ଆକାଉଣ୍ଟକୁ ହସ୍ତାନ୍ତର କରାଯାଇଛି ଏବଂ ସଞ୍ଚୟ ପ୍ରାୟ ୨.୨୫ ଲକ୍ଷ କୋଟି ଟଙ୍କା ଅଛି। ଭବିଷ୍ୟତରେ ମଧ୍ୟ ଅନେକ ସଞ୍ଚୟ ହେବାକୁ ଯାଉଛି, ଯାହା ଲୋକମାନଙ୍କୁ ସିଧାସଳଖ ଉପକୃତ କରିବ।
ଏଥି ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉତ୍ତମ ଶାସନ ମଡେଲ ବିଷୟରେ କେନ୍ଦ୍ର ମନ୍ତ୍ରୀ କହିଛନ୍ତି, ପ୍ରଧାନମନ୍ତ୍ରୀଙ୍କ ଏକ ସ୍ପଷ୍ଟ ଦୃଷ୍ଟିକୋଣ ହେଉଛି ଦେଶ ସର୍ଟକଟ ରାଜନୀତିକୁ ନୁହେଁ ବରଂ ଉତ୍ତମ ଶାସନ ଆଡକୁ ଯିବା ଉଚିତ୍। ଦେଶର ପ୍ରତ୍ୟେକ ବ୍ୟକ୍ତିଙ୍କ ନିକଟରେ ଉତ୍ତମ ଶାସନ ପହଞ୍ଚିବା ପାଇଁ ପ୍ରଧାନମନ୍ତ୍ରୀ ଏକ ଡିଜିଟାଲ ଢାଞ୍ଚା ସୃଷ୍ଟି କରିଛନ୍ତି।
