ନୂଆଦିଲ୍ଲୀ,୧୬ା୩: ପ୍ରସିଦ୍ଧ ପୋଡକାଷ୍ଟର ଏବଂ ଏଆଇ ଗବେଷକ ଲେକ୍ସ ଫ୍ରିଡମ୍ୟାନଙ୍କ ସହ ଏକ ସାକ୍ଷାତକାରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପାକିସ୍ତାନକୁ ସମାଲୋଚନା କରିଛନ୍ତି। ସେ ଚାଇନା-ଭାରତ ସମ୍ପର୍କ ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ତାଙ୍କର ବନ୍ଧୁତା ବିଷୟରେ ମଧ୍ୟ ଅନେକ କଥା କହିଛନ୍ତି।
ଭାରତ-ପାକିସ୍ତାନ ସମ୍ପର୍କ ଉପରେ ପ୍ରଧାନମନ୍ତ୍ରୀ କହିଛନ୍ତି, ଯେତେବେଳେ କୌଣସି ସ୍ଥାନରେ ଆତଙ୍କବାଦୀ ଆକ୍ରମଣ ହୁଏ, ଏହାର ଲିଙ୍କ ପାକିସ୍ତାନ ସହିତ ଜଡ଼ିତ ହୋଇଥାଏ। ଆଶା କରୁଛି ପାକିସ୍ତାନର ବୁଦ୍ଧି ଉଦୟ ହେବ। ଭାରତ ଶାନ୍ତି ପାଇଁ ପ୍ରତିବଦ୍ଧ। ଓସାମା ବିନ ଲାଡେନ ପାକିସ୍ତାନରେ ଆଶ୍ରୟ ନେଇଥିଲେ। ଆତଙ୍କବାଦ ପାକିସ୍ତାନର ମୂଳରେ ଅଛି। ପାକିସ୍ତାନ ଭାରତ ସହିତ ସଂଘର୍ଷର ପଥ ବାଛିଛି।
ଟ୍ରମ୍ପଙ୍କ ପାଖରେ ନିଜର ନିଷ୍ପତ୍ତି ନେବାର କ୍ଷମତା ଅଛି:
ଏହି ପୋଡକାଷ୍ଟରେ ପ୍ରଧାନମନ୍ତ୍ରୀ ମୋଦି ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବିଷୟରେ କହିଥିଲେ। ସେ କହିଥିଲେ, ଟ୍ରମ୍ପଙ୍କ ସହ ତାଙ୍କର ବନ୍ଧୁତା କିପରି ଗଭୀର ହୋଇଥିଲା। ପ୍ରଧାନମନ୍ତ୍ରୀ ତାଙ୍କ ୨୦୧୯ ଆମେରିକା ଗସ୍ତକୁ ମନେ ପକାଇ କହିଥିଲେ, ଏକ କାର୍ଯ୍ୟକ୍ରମରେ ମୁଁ ଯେତେବେଳେ କହୁଥିଲି, ଟ୍ରମ୍ପ ମୋ’ କଥା ଶୁଣୁଥିଲେ। ଭାଷଣ ଶେଷ କରିବା ପରେ, ଯେତେବେଳେ ମୁଁ ତାଙ୍କ ପାଖକୁ ଯାଇ କହିଲି ଯେ, ଆମେ ଏକାଠି ଷ୍ଟାଡିୟମ ବୁଲିବା ଉଚିତ, ସେ ତୁରନ୍ତ ରାଜି ହୋଇଗଲେ ଏବଂ ମୋ ସହିତ ଚାଲିବାକୁ ଲାଗିଲେ। ଏହା କରିବା ସହଜ ନ ଥିଲା କାରଣ ଆମେରିକା ରାଷ୍ଟ୍ରପତିଙ୍କ ସୁରକ୍ଷା ସମ୍ପର୍କରେ ଅନେକ ପ୍ରୋଟୋକଲ ଅଛି। ଏହି ସମୟରେ ମୁଁ ବୁଝିପାରିଲି ଯେ, ଟ୍ରମ୍ପ ନିଜେ ନିଷ୍ପତ୍ତି ନେବାର କ୍ଷମତା ରଖିଛନ୍ତି। ମୁଁ ଭାରତର ଜଣେ ପ୍ରଥମ ବ୍ୟକ୍ତି, ସେ ଆମେରିକାର ଜଣେ ପ୍ରଥମ ବ୍ୟକ୍ତି।
ପ୍ରଧାନମନ୍ତ୍ରୀ କହିଛନ୍ତି, ‘ଭାରତ ଏବଂ ଚାଇନା ମଧ୍ୟରେ ସମ୍ପର୍କ ନୂଆ ନୁହେଁ। ଉଭୟ ପ୍ରାଚୀନ ସଂସ୍କୃତି। ଆଧୁନିକ ବିଶ୍ୱରେ ମଧ୍ୟ ଆମର ଭୂମିକା ଅଛି। ଯଦି ଆମେ ଇତିହାସ ଉପରେ ନଜର ପକାଇବା, ତେବେ ଭାରତ ଏବଂ ଚାଇନା ଶତାବ୍ଦୀ ଧରି ପରସ୍ପରଠାରୁ ଶିକ୍ଷା ଲାଭ କରିଆସୁଛନ୍ତି। ପୁରୁଣା ରେକର୍ଡ କହୁଛି ଯେ, ବିଶ୍ୱର GDPର ୫୦ ପ୍ରତିଶତରୁ ଅଧିକ କେବଳ ଭାରତ ଏବଂ ଚାଇନାର ଥିଲା।”
ପ୍ରଧାନମନ୍ତ୍ରୀ କହିଛନ୍ତି, ଆମ ଉଭୟ ଦେଶ ସର୍ବଦା ପରସ୍ପରଠାରୁ ଶିଖୁଥିଲେ। ଗୋଟିଏ ସମୟ ଥିଲା ଯେତେବେଳେ ବୁଦ୍ଧଙ୍କର ଚାଇନା ଉପରେ ବହୁତ ପ୍ରଭାବ ଥିଲା। ଏହି ଚିନ୍ତାଧାରା ଏଠାରୁ ସେଠାକୁ ଯାଇଥିଲା। ଆମେ ଚାହୁଁଛୁ ଯେ, ଭବିଷ୍ୟତରେ ମଧ୍ୟ ଆମର ସମ୍ପର୍କ ଏପରି ରହୁ। ଯେତେବେଳେ ଦୁଇଟି ପଡ଼ୋଶୀ ଦେଶ ଥାଏ, ସେତେବେଳେ କିଛି ପାର୍ଥକ୍ୟ ନିଶ୍ଚୟ ଥାଏ। ପରିବାରରେ ମଧ୍ୟ ଯୁକ୍ତିତର୍କ ହୋଇଥାଏ। ଆମେ ଚେଷ୍ଟା କରୁଛୁ ଯେ, ଆମ ମଧ୍ୟରେ ଚାଲିଥିବା ଯୁକ୍ତିତର୍କ ବିବାଦରେ ପରିଣତ ନ ହେଉ।
ପ୍ରଧାନମନ୍ତ୍ରୀ କହିଛନ୍ତି, ‘ଚାଇନା ସହିତ ଆମର ସୀମା ବିବାଦ ଜାରି ରହିଛି। ୨୦୨୦ରେ ସୀମାରେ ଘଟିଥିବା ଘଟଣା ଆମ ମଧ୍ୟରେ ଦୂରତା ବଢ଼ାଇଥିଲା। ମୁଁ ରାଷ୍ଟ୍ରପତି ସି ଜିନପିଙ୍ଗଙ୍କୁ ଭେଟିଥିଲି। ସେବେଠାରୁ ସୀମାରେ ପରିସ୍ଥିତିରେ ଉନ୍ନତି ଆସିଛି। ୨୦୨୦ ତୁଳନାରେ ଏବେ ସୀମାରେ ବହୁତ ଉନ୍ନତି ହୋଇଛି। ଏବେ ଧୀରେ ଧୀରେ ସେହି ପୁରୁଣା ବିଶ୍ୱାସ ଫେରି ଆସିବ ଏବଂ ଏଥିପାଇଁ ସମୟ ଲାଗିବ କାରଣ ମଧ୍ୟରେ ୫ ବର୍ଷର ବ୍ୟବଧାନ ଥିଲା ବୋଲି ମୋଦି କହିଛନ୍ତି।
