ଆବୁଧାବି,୧୩।୨ : ଭାରତରେ ବିକଶିତ ହୋଇଥିବା ରୁପେ କାର୍ଡ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ରେ ମଧ୍ୟ ପ୍ରଚଳନ ହେବା ଆରମ୍ଭ କରିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ୟୁଏଇର ରାଷ୍ଟ୍ରପତି ଶେଖ ମହମ୍ମଦ ବିନ ଜାଏଦ ଅଲ ନାହାନ ମଙ୍ଗଳବାର ଆବୁଧାବିରେ ରୁପେ କାର୍ଡ ସେବା ଆରମ୍ଭ କରିଛନ୍ତି। ରାଷ୍ଟ୍ରପତି ନାହାନ ତାଙ୍କ ନାମଥିବା କାର୍ଡକୁ ‘ସ୍ବାଇପ’ କରି ଏହାର ଶୁଭାରମ୍ଭ କରିଛନ୍ତି।
ଏହି ଅବସରରେ ପ୍ରଧାନମନ୍ତ୍ରୀ ମୋଦି କହିଛନ୍ତି ଆମେ ଉଭୟ ୟୁପିଆଇ ରୁପେ କାର୍ଡ ଏବଂ ଆପକେ ଜୟୱାନ କାର୍ଡର ପରିଚୟ ଦେଇ ଏକ ନୂତନ ଫିଣ୍ଟେକ ଯୁଗ ଆରମ୍ଭ କରୁଛୁ, ଯାହା ଏକ ବଡ଼ ସଫଳତା। ଏହା ମାଧ୍ୟମରେ ଭାରତର ୟୁପିଆଇ ପେମେଣ୍ଟ ସିଷ୍ଟମ ଏବଂ ୟୁଏଇର ଏଏନଆଇ ସିଷ୍ଟମ ଏକତ୍ର ସଂଯୋଗ ହେବାର ସୁଯୋଗ ପାଇବେ । ଏହା ସହିତ ଉଭୟ ଦେଶର ଲୋକମାନେ କୌଣସି ପ୍ରତିବନ୍ଧକ ବିନା କାରବାରର ସୁବିଧା ପାଇପାରିବେ। ଗତ ବର୍ଷ ଜୁଲାଇରେ ସ୍ବାକ୍ଷରିତ ଇଣ୍ଟରଲିଙ୍କିଂ ପେମେଣ୍ଟ ଏବଂ ମେସେଜିଂ ସିଷ୍ଟମର ଏହା ଫଳାଫଳ ।
ଏଥି ସହିତ, ଡେବିଟ / କ୍ରେଡିଟ କାର୍ଡକୁ ଆନ୍ତଃ- ସଂଯୋଗ କରିବା ପାଇଁ ଆଉ ଏକ ଚୁକ୍ତିନାମା ସ୍ବାକ୍ଷରିତ ହୋଇଛି, ଯେଉଁଥିରେ ଜୟୱାନ (ୟୁଏଇ) ରୁପେ କାର୍ଡ (ଭାରତ) ସହିତ ସଂଯୁକ୍ତ ହେବ। ଏହା ଦ୍ୱାରା ରୁପେ କାର୍ଡର ପ୍ରସାର ବୃଦ୍ଧି ପାଇବ। ଏହା ପୂର୍ବରୁ ନେପାଳ, ଭୁଟାନ, ସିଙ୍ଗାପୁରର ଶ୍ରୀଲଙ୍କା, ମରିସସ ଏବଂ ଆଫ୍ରିକାରେ ରୁପେ କାର୍ଡ ଲଞ୍ଚ କରାଯାଇଛି। ଏହା ଡିଜିଟାଲ କାରବାରକୁ ପ୍ରୋତ୍ସାହିତ କରିଛି।
