ନୂଆଦିଲ୍ଲୀ, ୩୦।୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଆଜି କ୍ୟାବିନେଟ କମିଟି ଅନ ସିକ୍ୟୁରିଟି (CCS) ର ଏକ ଗୁରୁତ୍ୱପୂର୍ଣ୍ଣ ବୈଠକ ନୂଆଦିଲ୍ଲୀରେ ବସିଛିି। ଜମ୍ମୁ ଓ କଶ୍ମୀରର ପହଲଗାମରେ ଗତ ସପ୍ତାହରେ ଘଟିଥିବା ଆତଙ୍କବାଦୀ ଆକ୍ରମଣ ପରେ ଏହା ଦ୍ୱିତୀୟ CCS ବୈଠକ ହେବ।
ଗତ ୨୨ ଏପ୍ରିଲରେ ପହଲଗାମର ବୈସରଣ ଉପତ୍ୟକାରେ ହୋଇଥିବା ଆତଙ୍କବାଦୀ ଆକ୍ରମଣକୁ ଲସ୍କର-ଏ-ତୋଇବାର ଏକ ଶାଖା ଦ ରେସିଷ୍ଟାନ୍ସ ଫ୍ରଣ୍ଟ (TRF) ଦାୟିତ୍ୱ ନେଇଛି। ଏହି ଆକ୍ରମଣକୁ ପ୍ରଧାନମନ୍ତ୍ରୀ ମୋଦି ତୀବ୍ର ନିନ୍ଦା କରିବା ସହ ଦୋଷୀମାନଙ୍କୁ ଦୃଢ ଶାସ୍ତି ଦେବାକୁ ପ୍ରତିଶ୍ରୁତି ଦେଇଛନ୍ତି। ପ୍ରଥମ CCS ବୈଠକରେ ଭାରତ ସରକାର ପାକିସ୍ତାନ ବିରୋଧରେ କେତେକ ଗୁରୁତ୍ୱପୂର୍ଣ୍ଣ ପଦକ୍ଷେପ ଘୋଷଣା କରିଥିଲେ, ଯାହା ମଧ୍ୟରେ ରହିଛି:
– ସିନ୍ଧୁ ଜଳ ଚୁକ୍ତିକୁ ସ୍ଥଗିତ ରଖିବା।
-ଅଟାରୀ ସୀମାକୁ ତୁରନ୍ତ ବନ୍ଦ କରିବା।
-ପାକିସ୍ତାନୀ ନାଗରିକଙ୍କ ପାଇଁ ଭିସା ବାତିଲ।
-ପାକିସ୍ତାନୀ ହାଇ କମିଶନରୁ ପ୍ରତିରକ୍ଷା, ବିମାନ ଓ ନୌସେନା ଆଟାଚେଙ୍କୁ ସପ୍ତାହେ ମଧ୍ୟରେ ଭାରତ ଛାଡ଼ିବାକୁ ନିର୍ଦ୍ଦେଶ।
-ପାକିସ୍ତାନୀ କୂଟନୀତିଜ୍ଞମାନଙ୍କୁ ପରସୋନା ନନ ଗ୍ରାଟା ଘୋଷଣା କରି ସେମାନଙ୍କୁ ଦେଶ ଛାଡ଼ିବାକୁ ନିର୍ଦ୍ଦେଶ।
ଆଜିର ବୈଠକରୁ କ’ଣ ଆସିପାରେ?
ଆଜିର CCS ବୈଠକରେ ପାକିସ୍ତାନ ସହ ଜଡ଼ିତ ଆତଙ୍କବାଦୀ କାର୍ଯ୍ୟକଳାପ ଏବଂ ସୀମାସୀମା ସମସ୍ୟା ଉପରେ ଗଭୀର ଆଲୋଚନା ହେବ ବୋଲି ଆଶା କରାଯାଉଛି। ଏହି ବୈଠକରେ ଗୃହମନ୍ତ୍ରୀ ଅମିତ ଶାହ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ବୈଦେଶିକ ମନ୍ତ୍ରୀ ଏସ. ଜୟଶଙ୍କର, ଅର୍ଥମନ୍ତ୍ରୀ ର୍ନିମଳା ସୀତାରମଣ ଏବଂ ଜାତୀୟ ସୁରକ୍ଷା ଉପଦେଷ୍ଟା ଅଜିତ ଡୋଭାଲ ଉପସ୍ଥିତ ରହିଛନ୍ତି। ରିପୋର୍ଟ ଅନୁଯାୟୀ, ଏହି ବୈଠକରେ ଆତଙ୍କବାଦ ବିରୋଧରେ ଆହୁରି କଠୋର ପଦକ୍ଷେପ ଏବଂ ଜମ୍ମୁ ଓ କାଶ୍ମୀରରେ ସୁରକ୍ଷା ବ୍ୟବସ୍ଥାକୁ ମଜବୁତ କରିବା ନେଇ ନିଷ୍ପତ୍ତି ନିଆଯାଇପାରେ। ଏକ୍ସ (X) ରେ ପୋଷ୍ଟ ଅନୁଯାୟୀ, ପାକିସ୍ତାନ ବିରୋଧରେ ଆହୁରି କିଛି ବଡ଼ ନିଷ୍ପତ୍ତି ଆସିପାରେ।
ଅନ୍ୟ ବୈଠକ ମଧ୍ୟ ଅନୁଷ୍ଠିତ ହେବ
CCS ବୈଠକ ପରେ ପ୍ରଧାନମନ୍ତ୍ରୀ ମୋଦୀ କ୍ୟାବିନେଟ କମିଟି ଅନ ପୋଲିଟିକାଲ ଆଫେୟାର୍ସ (CCPA) ଏବଂ କ୍ୟାବିନେଟ କମିଟି ଅନ ଇକୋନୋମିକ ଆଫେୟାର୍ସ (CCEA) ବୈଠକରେ ମଧ୍ୟ ଅଧ୍ୟକ୍ଷତା କରିବେ। ଏହି ବୈଠକଗୁଡ଼ିକରେ ରାଜନୈତିକ ଏବଂ ଅର୍ଥନୈତିକ ଦିଗ ଉପରେ ଆଲୋଚନା ହେବ।
ପହଲଗାମ୍ ଆତଙ୍କବାଦୀ ଆକ୍ରମଣର ପ୍ରତିଶୋଧ ନେବା ପାଇଁ ଟାର୍ଗେଟ ସ୍ଥଳ ଓ ସମୟ ସମ୍ପର୍କିତ ନିଷ୍ପତ୍ତି ନେବାର ପୂର୍ଣ୍ଣ ସ୍ବାଧୀନତା ସଶସ୍ତ୍ର ବଳର ରହିଥିବା ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି। ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଚ୍ଚସ୍ତରୀୟ ବୈଠକରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ଜାତୀୟ ସୁରକ୍ଷା ପରାମର୍ଶଦାତା (ଏନ୍ଏସ୍ଏ) ଅଜିତ ଡୋଭାଲ, ୩ ବାହିନୀର ମୁଖ୍ୟ ଉପସ୍ଥିତ ଥିଲେ। ଆତଙ୍କବାଦକୁ ମୁହଁତୋଡ଼ ଜବାବ ଦେବା ପାଇଁ ଏହା ଏକ ଜାତୀୟ ସଂକଳ୍ପ ବୋଲି ମୋଦି ସ୍ପଷ୍ଟ କରିଥିବା ସରକାରୀ ସୂତ୍ରରୁ ଜଣାପଡ଼ିଛି। ସେ ସଶସ୍ତ୍ର ବଳର ପେସାଦାରି ସାମର୍ଥ୍ୟ ଉପରେ ସମ୍ପୂର୍ଣ୍ଣ ଆସ୍ଥା ପ୍ରକଟ କରିଛନ୍ତି। କାର୍ଯ୍ୟାନୁଷ୍ଠାନର ଲକ୍ଷ୍ୟସ୍ଥଳ ଓ ସମୟ ସମ୍ପର୍କରେ ସେମାନେ ନିଷ୍ପତ୍ତି ନେବାକୁ ସମ୍ପୂର୍ଣ୍ଣ ସ୍ବାଧୀନତା ଦିଆଯାଇଛି। ବୈଠକରେ ଚିଫ୍ ଅଫ୍ ଡିଫେନ୍ସ ଷ୍ଟାଫ୍ ଜେନେରାଲ ଅନିଲ ଚୌହାନ ମଧ୍ୟ ଉପସ୍ଥିତ ଥିଲେ। ୨୨ ତାରିଖରେ ପହଲଗାମ୍ରେ ଆତଙ୍କବାଦୀ ଆକ୍ରମଣରେ ୨୫ ପର୍ଯ୍ୟଟକଙ୍କ ସମେତ ୨୬ ଜଣଙ୍କ ମୃତ୍ୟୁ ଘଟିଥିଲା। ଆକ୍ରମଣ ପଛରେ ଥିବା ଆତଙ୍କବାଦୀ ଓ ସେମାନଙ୍କ ପାକିସ୍ତାନୀ ପୃଷ୍ଠପୋଷକଙ୍କୁ ପାତାଳରୁ ଖୋଜି ବାହାର କରିବା ସହ ସେମାନଙ୍କ କଳ୍ପନା ବାହାରେ ଦଣ୍ଡ ଦେବା ପାଇଁ ପ୍ରଧାନମନ୍ତ୍ରୀ ପ୍ରତିଜ୍ଞା କହିଛନ୍ତି।
ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ଉଚ୍ଚସ୍ତରୀୟ ବୈଠକ ପୂର୍ବରୁ ସ୍ବରାଷ୍ଟ୍ର ସଚିବ ଗୋବିନ୍ଦ ମୋହନଙ୍କ ଅଧ୍ୟକ୍ଷତାରେ ଅନ୍ୟ ଏକ ବୈଠକ ବସିଥିଲା। ଉକ୍ତ ବୈଠକରେ ୩ ଅର୍ଦ୍ଧସାମରିକ ବାହିନୀ ଏବଂ ଅନ୍ୟ ସୁରକ୍ଷା ସଂଗଠନର ମୁଖ୍ୟମାନେ ଯୋଗଦେଇଥିଲେ। ସୀମା ସୁରକ୍ଷା ବଳ (ବିଏସ୍ଏଫ୍) ଡିଜି ଦଲଜିତ ସିଂ ଚୌଧରୀ, ନ୍ୟାଶନାଲ ସିକ୍ୟୁରିଟି ଗାର୍ଡ ଡିଜି ବ୍ରିଘୁ ଶ୍ରୀନିବାସନ,ଆସାମ ରାଇଫଲ୍ସ ଡିଜି ଲ୍ୟୁଟ୍ନାଣ୍ଟ ଜେନେରାଲ ବିକାଶ ଲାଖେର ଏବଂ ସଶସ୍ତ୍ର ସୀମା ବଳର ଅତିରିକ୍ତ ଡିଜି ଅନୁପମ ନିଲେକାର ଚନ୍ଦ୍ରା ଉପସ୍ଥିତ ଥିଲେ। ତେବେ ବୈଠକରେ କ’ଣ ଆଲୋଚନା ହୋଇଥିଲା, ତାହା ଜଣାପଡ଼ି ନାହିଁ।
