ନୂଆଦିଲ୍ଲୀ,୨୫ା୧୧: ବିଦେଶ ଗସ୍ତକୁ ନେଇ ଚର୍ଚ୍ଚାରେ ରହୁଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚଳିତବର୍ଷ ଦେଶ ବାହାରକୁ ଯାଇପାରିଲେ ନାହିଁ। ୨୦୨୦ରେ କରୋନା ଭାଇରସ୍ ତାଙ୍କ ବିଦେଶ ଗସ୍ତରେ ବ୍ରେକ୍ ଲଗାଇଛି। ୨୦୧୪ରେ କ୍ଷମତାକୁ ଆସିବା ପରଠୁ ପ୍ରଧାନମନ୍ତ୍ରୀ ମୋଦି ସରକାରୀ କାର୍ଯ୍ୟକ୍ରମରେ ବ୍ୟୟବହୁଳ ବିଦେଶ ଗସ୍ତ କରିଆସୁଥିବାବେଳେ ବିଗତ ୩୬୫ ଦିନ ମଧ୍ୟରେ ଥରୁଟିଏ ଅନ୍ୟ ଦେଶକୁ ଯାଇନାହାନ୍ତି କି ଡିସେମ୍ବର ଶେଷ ସୁଦ୍ଧା ଯିବାର ସମ୍ଭାବନା ମଧ୍ୟ ନାହିଁ। ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍ଓ) ଓ୍ବେବ୍ସାଇଟ୍ରେ ଦିଆଯାଇଥିବା ତଥ୍ୟାନୁସାରେ ପ୍ରଧାନମନ୍ତ୍ରୀ ମୋଦି ୨୦୧୪ ଜୁନ ୧୫ରୁ ୨୦୧୯ ନଭେମ୍ବର ମଧ୍ୟରେ ୯୬ ଦେଶ ବୁଲିଥିଲେ। ୨୦୧୪ରେ ମୋଦି ୮ ଦେଶ ଗସ୍ତ କରିଥିବାବେଳେ ୨୦୧୫ରେ ୨୩, ୨୦୧୬ରେ ୧୭ ଦେଶ ଯାଇଥିଲେ। ସେହିପରି ୨୦୧୭ରେ ୧୪ ଓ ୨୦୧୮ରେ ୨୦ ଓ ୨୦୧୯ରେ ୧୪ ଦେଶ ଗସ୍ତ କରିଥିଲେ। ଗତବର୍ଷ ନଭେମ୍ବରରେ ତାଙ୍କର ଶେଷ ବିଦେଶ ଗସ୍ତ ବ୍ରାଜିଲକୁ ଥିଲା।
