ନୂଆଦିଲ୍ଲୀ,୨୪।୦୭: ଭାରତର ଶକ୍ତି ପରିବର୍ତ୍ତନ ଯୋଜନାରେ କ୍ଷୁଦ୍ର ମଡ୍ୟୁଲାର ଆଣବିକ ରିଆକ୍ଟର (ଏସ୍ଏମ୍ଆର୍), ପମ୍ପ୍ଡ ଷ୍ଟୋରେଜ ପ୍ରୋଜେକ୍ଟ ଏବଂ ଅଧିକ ଦକ୍ଷ ଥର୍ମାଲ ପ୍ଲାଣ୍ଟଗୁଡ଼ିକର ବିକାଶ ଉପରେ ଗୁରୁତ୍ୱ ଦିଆଯାଇଛି। ସରକାର ଘରୋଇ କମ୍ପାନୀଗୁଡ଼ିକ ସହାୟତାରେ ଏସ୍ଏମ୍ଆର୍ଗୁଡ଼ିକର ବିକାଶ କରିବେ। ଆଣବିକ ଶକ୍ତି ଶେୟାର ବଢ଼ାଇବା ପାଇଁ ଅତ୍ୟାଧୁନିକ ପ୍ରଯୁକ୍ତି ଉପରେ ଗବେଷଣା କରାଯିବ। ଉତ୍ସର୍ଜନ ଲକ୍ଷ୍ୟ ହାସଲ ଲାଗି ସରକାର ଶକ୍ତି ଦକ୍ଷତା ଉପରେ ଫୋକସ୍ କରୁଛନ୍ତି। ସେଥିପାଇଁ ଶିପିଙ୍ଗ୍, ବେସାମରିକ ବିମାନ ଚଳାଚଳ, ଲୁହା ଓ ଇସ୍ପାତ, ରସାୟନ ଆଦି ସେକ୍ଟରରେ ଉତ୍ସର୍ଜନ କମାଇବା ପାଇଁ ରୋଡ୍ମ୍ୟାପ୍ ପ୍ରସ୍ତୁତ ହେବ ବୋଲି ଅର୍ଥମନ୍ତ୍ରୀ କହିଛନ୍ତି।
ବିକଶିତ ଭାରତ ପାଇଁ ଆଣବିକ ଶକ୍ତି ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏହି ଲକ୍ଷ୍ୟ ହାସଲ ନିମନ୍ତେ ସରକାର ଘରୋଇ କମ୍ପାନୀଗୁଡ଼ିକର ସହଭାଗିତାରେ ଭାରତ କ୍ଷୁଦ୍ର ରିଆକ୍ଟର ସ୍ଥାପନ କରିବା ସହ ଏଥିପାଇଁ ଆବଶ୍ୟକ ନୂତନ ପ୍ରଯୁକ୍ତି ନିମନ୍ତେ ଗବେଷଣା ଓ ବିକାଶ କରିବେ। ଏହି ଏସ୍ଏମ୍ଆର୍ଗୁଡ଼ିକର କ୍ଷମତା ୩୦୦ ମେଗାଓ୍ବାଟ୍ ବା ତା’ଠାରୁ କମ୍ ହେବ। ଉକ୍ତ ଫ୍ୟାକ୍ଟ୍ରି-ଫାବ୍ରିକେଟେଡ୍ ରିଆକ୍ଟରଗୁଡ଼ିକୁ ଟ୍ରକ୍ କିମ୍ବା ଟ୍ରେନ୍ରେ ଆଣବିକ ଶକ୍ତି ପ୍ରକଳ୍ପ ସ୍ଥଳକୁ ପରିବହନ କରାଯାଇପାରିବ। ସେଗୁଡ଼ିକର ମିଳିତ ଉତ୍ପାଦନ ଦ୍ୱାରା ଅଧିକ ଶକ୍ତି ହାସଲ କରାଯାଇପାରିବ ବୋଲି ଅର୍ଥମନ୍ତ୍ରୀ କହିଛନ୍ତି। ପମ୍ପ୍ଡ-ଷ୍ଟୋରେଜ୍ ପ୍ରୋଜେକ୍ଟରେ ଦୁଇଟି ରିଜର୍ଭୟର ଯଥାକ୍ରମେ ଗୋଟିଏ ପାହାଡ଼ ଉପରେ ଓ ଅନ୍ୟଟି ତଳେ ରହିବ। ଅତିରିକ୍ତ ବିଦ୍ୟୁତ୍କୁ ବ୍ୟବହାର କରାଯାଇ ପାଣିକୁ ପାହାଡ଼ ଉପରକୁ ପମ୍ପ କରାଯାଇ ସେଠାରେ ଥିବା ରିଜର୍ଭୟରରେ ଗଚ୍ଛିତ ରଖାଯିବ। ଯେତେବେଳେ ବିଦ୍ୟୁତ୍ ଚାହିଦା ବଢ଼ିଯିବ, ସେତେବେଳେ ଉକ୍ତ ଜଳକୁ ତଳ ରିଜର୍ଭୟରକୁ ଛଡ଼ାଯାଇ ବିଦ୍ୟୁତ୍ ଉତ୍ପାଦନ କରାଯିବ।
ଅତ୍ୟାଧୁନିକ ଅଲ୍ଟ୍ରାସୁପର କ୍ରିଟିକାଲ ଥର୍ମାଲ ପାଓ୍ବାର ପ୍ଲାଣ୍ଟ ପାଇଁ ସ୍ବଦେଶୀ ପ୍ରଯୁକ୍ତିର ବିକାଶ ହୋଇଥିବା ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଘୋଷଣା କରିଛନ୍ତି। ନ୍ୟାଶନାଲ ଥର୍ମାଲ ପାଓ୍ବାର କର୍ପୋରେଶନ (ଏନ୍ଟିପିସି) ଏବଂ ଭାରତ ହେଭି ଇଲେକ୍ଟ୍ରିକାଲ୍ସ ଲିଃ (ଭେଲ୍)ର ମିଳିତ ଉଦ୍ୟୋଗ ଏୟୁଏସ୍ସି ପ୍ରଯୁକ୍ତି ବ୍ୟବହାରରେ ୮୦୦ ମେଗାଓ୍ବାଟ ବ୍ୟବସାୟିକ ପ୍ଲାଣ୍ଟ ସ୍ଥାପନ କରିବ ବୋଲି ଅର୍ଥମନ୍ତ୍ରୀ କହିଛନ୍ତି।
