ନୂଆଦିଲ୍ଲୀ,୩୦।୫: ମୋଦି ସରକାରଙ୍କ ୮ ବର୍ଷ ପୂରଣ ଅବସରରେ ସୋମବାର ଏକ ସର୍ଭେ ରିପୋର୍ଟ ପ୍ରକାଶ ପାଇଛି। ଯେଉଁଥିରେ କରୋନା ମହାମାରୀ ଆରମ୍ଭରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ଜନସାଧାରଣଙ୍କ ଆତ୍ମବିଶ୍ୱାସ ବୃଦ୍ଧି ପାଇଛି ଏବଂ ତାଙ୍କର ଅନୁମୋଦନ ମୂଲ୍ୟାୟନ ମଧ୍ୟ ବୃଦ୍ଧି ପାଇଛି ବୋଲି ଉଲ୍ଲେଖ ରହିଛି। ଲୋକାଲ ସର୍କଲ୍ସ ଦ୍ୱାରା କରାଯାଇଥିବା ୬୪ ହଜାର ଲୋକଙ୍କ ଉପରେ ହୋଇଥିବା ଏକ ସର୍ଭେରେ ୬୭ପ୍ରତିଶତ ଲୋକ ବିଶ୍ୱାସ କରନ୍ତି ଯେ, ମୋଦି ସରକାର ଦ୍ୱିତୀୟ ପର୍ଯ୍ୟାୟ କାର୍ଯ୍ୟକାଳରେ ଜନତାଙ୍କ ଆଶା ପୂରଣ କରିଛନ୍ତି। ଆଉ କେତେକ ଲୋକ ବିଶ୍ୱାସ କରନ୍ତି ଯେ, ମୋଦିଙ୍କ ଦ୍ୱିିତୀୟ କାର୍ଯ୍ୟକାଳରେ ପ୍ରଦର୍ଶନ ଆଶାଠାରୁ ମଧ୍ୟ ଅଧିକ ଭଲ। ଗତ ବର୍ଷ ଏହା ୫୧ ପ୍ରତିଶତ ଥିଲା ବେଳେ ୨୦୨୦ରେ ଏହା ୬୨ ପ୍ରତିଶତ ରହିଥିଲା। ତେବେ ସର୍ଭେରେ ସାମିଲ ହୋଇଥିବା ଲୋକମାନେ କହିଛନ୍ତି, କୋଭିଡ-୧୯ ସଂକ୍ରମଣର ତୃତୀୟ ଲହର ସହ ମୁକାବିଲା କରିବା କ୍ଷେତ୍ରରେ ସରକାର ଅଧିକ ପାରଙ୍ଗମ ହେବା ସହ ଅର୍ଥନୀତିକୁ ସଫଳତାର ସହ ପରିଚାଳନା କରିଛନ୍ତି। ତଥାପି ବର୍ଷ ଆରମ୍ଭରୁ ପ୍ରାୟ ୭ପ୍ରତିଶତ ଲୋକଙ୍କୁ ବେକାରୀ ସମସ୍ୟା ଚିନ୍ତିତ କରିଛି। ଏଥିରେ ୪୭ପ୍ରତିଶତ ଲୋକଙ୍କ କହିବା କଥା ସରକାର ଏହି ପ୍ରସଙ୍ଗକୁ ସମାଧାନ କରିବାରେ ସକ୍ଷମ ନୁହଁନ୍ତି। ଅନ୍ୟପଟେ ୩୭ପ୍ରତିଶତ ଲୋକ ବିଶ୍ୱାସ କରୁଛନ୍ତି ଯେ, ସରକାର ବେକାରୀ ସମସ୍ୟାକୁ ନିୟନ୍ତ୍ରଣ କରିବାରେ କିଛି ମାତ୍ରାରେ ସଫଳ ହୋଇଛନ୍ତି। ଏହା ୨୦୨୧ରେ ୨୭ପ୍ରତିଶତ ଏବଂ ୨୦୨୦ରେ ୨୯ ପ୍ରତିଶତ ବୃଦ୍ଧି ହୋଇଛି। ଗୋଟିଏ ସମୟ ଥିଲା, ଯେତେବେଳେ ଦେଶରେ କରୋନା ଏବଂ ଲକ୍ଡାଉନ ରହିଥିଲା। ଏହି ସମୟରେ ପ୍ରବାସୀ ଶ୍ରମିକମାନେ ସହରରେ ନିଜର ଚାକିରି ହରାଇଥିଲେ। ଯଦିଓ ଗ୍ରାମାଞ୍ଚଳର ନିଯୁକ୍ତି ଗ୍ୟାରେଣ୍ଟି କାର୍ଯ୍ୟକ୍ରମ ଦ୍ୱାରା ଲୋକଙ୍କୁ ବହୁତ ସାହାଯ୍ୟ ମିଳିଥିଲା। କିନ୍ତୁ ଅନେକ ଲୋକ ବେରୋଜଗାର ହୋଇଥିଲେ। ସେହିପରି ସର୍ଭେରେ ୭୩ ପ୍ରତିଶତ ଭାରତୀୟଙ୍କ କହିବା କଥା, ଗତ ତିନିବର୍ଷ ମଧ୍ୟରେ ଅତ୍ୟାବଶ୍ୟକ ଦ୍ରବ୍ୟର ମୂଲ୍ୟ ହ୍ରାସ ପାଇନାହିଁ। ତେବେ ଏହି ସର୍ଭେ ପ୍ରଧାନମନ୍ତ୍ରୀ ମୋଦିଙ୍କ ପାଇଁ ଏହା ଏକ ଗୁରୁତ୍ୱପୂର୍ଣ୍ଣ ପ୍ଲସ୍ ପଏଣ୍ଟ। ଯାହା ୨୦୨୪ରେ ହେବାକୁ ଥିବା ନିର୍ବାଚନରେ ଏକ ପ୍ରମୁଖ ଭୂମିକା ଗ୍ରହଣ କରିପାରେ।
