ନୂଆଦିଲ୍ଲୀ,୩୦।୮: ଦୁର୍ନୀତିଗ୍ରସ୍ତ ତଥା ଅପାରଗ ସରକାରୀ କର୍ମଚାରୀଙ୍କୁ ସାବାଡ୍ କରିବାକୁ ମୋଦି ସରକାର ବର୍ତ୍ତମାନ ପ୍ରସ୍ତୁତ ହେଉଛନ୍ତି। ଏହି ପରିପ୍ରେକ୍ଷୀରେ ଏଭଳି ସରକାରୀ କର୍ମଚାରୀଙ୍କୁ ଚିହ୍ନଟ କରିବା ପାଇଁ ସରକାର ନିର୍ଦ୍ଦେଶ ଦେଇଛନ୍ତି। ଏଥିସହ ଦୁର୍ନୀତିଗ୍ରସ୍ତ ତଥା ଅଯୋଗ୍ୟ କର୍ମଚାରୀଙ୍କୁ ବାଧ୍ୟତାମୂଳକ ଅବସର ଦେବା ପାଇଁ ସରକାର ଚିନ୍ତା କରୁଛନ୍ତି। ଏବେ ସରକାରୀ କର୍ମଚାରୀଙ୍କ ରେକର୍ଡ ଯାଞ୍ଚ ହେବ। ସେମାନଙ୍କ ଅକ୍ଷମତା ଏବଂ ଦୁର୍ନୀତି ଅଭିଯୋଗର ତଦନ୍ତ କରାଯିବ। ଯେଉଁମାନେ ଦୁର୍ନୀତିଗ୍ରସ୍ତ, ଅପାରଗ ବୋଲି ଜଣାପଡିବେ ସେମାନଙ୍କୁ ଅବସର ନେବାକୁ କୁହାଯିବ। ଏ ସମ୍ପର୍କରେ ଏକ ରେଜିଷ୍ଟର ମଧ୍ୟ ପ୍ରସ୍ତୁତ ହେବାକୁ କୁହାଯାଇଛି। ସରକାରୀ ସେବାରେ ୩୦ ବର୍ଷ ପୂରଣ କରିଥିବା କିମ୍ବା ୫୦-୫୫ବର୍ଷ ବୟସର କର୍ମଚାରୀଙ୍କ ସେବା ରେକର୍ଡ ଯାଞ୍ଚ କରିବାକୁ କେନ୍ଦ୍ର ସରକାର କହିଛନ୍ତି।
