ନୂଆଦିଲ୍ଲୀ,୮।୧୧ : ବିମୁଦ୍ରୀକରଣର ୬ ବର୍ଷ ପୂରଣ ଅବସରରେ କଂଗ୍ରେସ ପକ୍ଷରୁ ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କଡ଼ା ସମାଲୋଚନା କରିଛନ୍ତି। ରାହୁଲ କହିଛନ୍ତି ଯେ ଦୁଇ ତିନି ଜଣ କୋଟିପତି ଧନୀକ ବନ୍ଧୁମାନଙ୍କ ପାଇଁ ମୋଦି ଏହା କରିଥିଲେ। ସେ ଟୁଇଟରେ ମୋଦିଙ୍କ ପେପିଏମ ଲେଖିଛନ୍ତି। ୮ ନଭେମ୍ବର ୨୦୧୬ ରେ ପ୍ରଧାନମନ୍ତ୍ରୀ ୫୦୦ ଏବଂ ୧୦୦୦ଟଙ୍କିଆ ନୋଟର ବିମୁଦ୍ରୀକରଣ କରି ଅର୍ଥନୀତିରେ ଦୁର୍ନୀତି ଏବଂ କଳା ଟଙ୍କା ଦୂର କରିବାକୁ ଲକ୍ଷ୍ୟ ରଖିଥିଲେ।
ବିରୋଧୀ ଦଳ ବିମୁଦ୍ରୀକରଣକୁ ଏକ ଅର୍ଥନୈତିକ ନରସଂହାର ଏବଂ ଅପରାଧିକ କାର୍ଯ୍ୟ ବୋଲି କହିଛନ୍ତି। ମଙ୍ଗଳବାର ତାଙ୍କ ଭାଷଣର ଏକ ଭିଡିଓ ଟୁଇଟ କରି ରାହୁଲ ଗାନ୍ଧୀ ଲେଖିଛନ୍ତି ଯେ ପେପିଏମଙ୍କ ଦ୍ୱାରା ବିମୁଦ୍ରୀକରଣ ଏକ ସୁଚିନ୍ତିତ ପଦକ୍ଷେପ ଥିଲା, ଯାହା ଦ୍ୱାରା କ୍ଷୁଦ୍ର ଏବଂ ମଧ୍ୟମ ବ୍ୟବସାୟ ନଷ୍ଟ ହେବା ସହିତ ତାଙ୍କର ଦୁଇ ତିନିଜଣ ବନ୍ଧଙ୍କର ଏକଚାଟିଆ ଅଧିକାରକୁ ବୃଦ୍ଧି କରିଥିଲା ।
ଏହାପୂର୍ବରୁ ଅନ୍ୟ ଏକ ଟୁଇଟରେ ରାହୁଲ ଗାନ୍ଧୀ କହିଛନ୍ତି ଯେ କଳା ଟଙ୍କା ବିଦେଶରୁ ଦେଶକୁ ଆସିନାହିଁ। କେବଳ ଦାରିଦ୍ର୍ୟ ଆସିଛି, ଅର୍ଥନୀତି କ୍ୟାସଲେସ ନହୋଇ ଦୁର୍ବଳ ହୋଇଯାଇଛି। ଆତଙ୍କବାଦ ନୁହେଁ, କୋଟି କୋଟି ଛୋଟ ବ୍ୟବସାୟ ଏବଂ ଚାକିରୀ ନଷ୍ଟ ହୋଇଯାଇଥିଲା। ବିମୁଦ୍ରୀକରଣରେ ଜଣେ ରାଜା ୫୦ ଦିନ ବାହାନା କରି ଅର୍ଥନୀତିକୁ ଧ୍ୱଂସ କରିଥିଲେ।
ମୋଦି ସରକାରଙ୍କ ଏହି ପଦକ୍ଷେପ ପରେ ନଗଦ କାରବାର ୭୨ ପ୍ରତିଶତ ବୃଦ୍ଧି ପାଇଛି ଏବଂ ଏଭଳି ପରିସ୍ଥିତିରେ ସରକାର ଏହା ଉପରେ ଏକ ଶ୍ୱେତପତ୍ର ଆଣିବା ଉଚିତ। ବିମୁଦ୍ରୀକରଣର ଏହି ଭୟଙ୍କର ବିଫଳତାକୁ ପ୍ରଧାନମନ୍ତ୍ରୀ ଗ୍ରହଣ କରିବା ଆବଶ୍ୟକ। ଏହି ଦିନ ସମସ୍ତଙ୍କୁ ମନେ ରଖିବା ଜରୁରୀ। ଏହି ଦିନି ଭାରତର ଅର୍ଥନୀତିକୁ ନଷ୍ଟ କରିବାର ନିଷ୍ପତ୍ତିର ଷଷ୍ଠ ବାର୍ଷିକୀ। ବିମୁଦ୍ରୀକରଣର ୫୦ ଦିନ ପରେ, ଆଜି ପର୍ଯ୍ୟନ୍ତ ସରକାର ବିମୁଦ୍ରୀକରଣର ନାମ ନେଇ ନାହାଁନ୍ତି।
