ନୂଆଦିଲ୍ଲୀ,୯।୧୦: ପୂରା ଦେଶରେ କୋଇଲା ସଙ୍କଟ ଘନେଇବାରେ ଲାଗିଛି। ଦିଲ୍ଲୀ ପରେ ଉତ୍ତରପ୍ରଦେଶ(ୟୁପି)ରେ ମଧ୍ୟ ବିଦ୍ୟୁତ୍ କାଟ ହେବା ନେଇ ଘୋଷଣା ହୋଇସାରିଲାଣି। ବିଦ୍ୟୁତ୍ ସଙ୍କଟରୁ ବର୍ତ୍ତିବା ଲାଗି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହାୟତା ମାଗିବା ପରେ ସାମ୍ନାକୁ ଆସିଛି ଉତ୍ତରପ୍ରଦେଶର ଚିତ୍ର। କୋଇଲା ଅଭାବରୁ ୧୪ଟି ପାଓ୍ବର ପ୍ଲାଣ୍ଟରେ ତାଲା ପଡ଼ିଗଲାଣି। ଏହା ଦେଶର କୋଇଲା ଓ ବିଦ୍ୟୁତ୍ ସଙ୍କଟକୁ ଦର୍ଶାଇବା ପାଇଁ ଯଥେଷ୍ଟ।
ସିଧାସଳଖ କୋଇଲା ଅଭାବ କାରଣରୁ ୟୁପିରେ ୮ ପାଓ୍ବର ପ୍ଲାଣ୍ଟ ବନ୍ଦ ହୋଇଥିବା ବେଳେ ଭିନ୍ନ କାରଣରୁ ସବୁ ଦିନ ପାଇଁ ବନ୍ଦ ହୋଇଯାଇଛି ୬ଟି ପାଓ୍ବର ପ୍ଲାଣ୍ଟ। ବର୍ତ୍ତମାନ ରାଜ୍ୟକୁ ୨୦ରୁ ୨୧ହଜାର ମେଗାଓ୍ବାଟ ପାଓ୍ବର ଦରକାର ପଡ଼ୁଛି। କିନ୍ତୁ ୧୭ ହଜାର ମେଗାଓ୍ବାଟ ଯୋଗାଣ ହୋଇପାରୁଛି। ଅଭାବ ପରିସ୍ଥିତିର ସମ୍ମୁଖୀନ ହେବା ପାଇଁ ଗ୍ରାମାଞ୍ଚଳମାନଙ୍କରେ ଦିନକୁ ୪ରୁ ୫ ଘଣ୍ଟା ବିଦ୍ୟୁତ୍ ଯୋଗାଣ ବନ୍ଦ ରଖାଯିବା ନେଇ ଅଧିକାରୀମାନେ ଘୋଷଣା କରିଛନ୍ତି। ବନ୍ଦ ହୋଇଯାଇଥିବା ୧୪ ପାଓ୍ବର ପ୍ଲାଣ୍ଟରୁ ରାଜ୍ୟକୁ ୪୫୨୦ ମେଗା ଓ୍ବାଟ ବିଦ୍ୟୁତ ମିଳୁଥିଲା। ବନ୍ଦ ହୋଇଯିବାରୁ ରାଜ୍ୟରେ ୟୁନିଟ୍ ପିଛା ବିଦ୍ୟୁତ ଦର ମଧ୍ୟ ବଢ଼ି ଯାଇଛି।
