ମଡେଲଙ୍କ ଜୀବନ ଚାକଚକ୍ୟ ଭରା। ଅନେକ ରୋଜଗାର କରନ୍ତି ଓ ଅୟସଭରା ଜୀବନ ଅତିବାହିତ କରନ୍ତି। ତେଣୁ ଅନେକେ ଏହି ମଡେଲିଂ ଜଗତକୁ ଆସିବାକୁ ଚାହାନ୍ତି। ହେଲେ ଆକର୍ଷକ ଚେହେରା ଓ ବଳିଷ୍ଠ ବ୍ୟକ୍ତିତ୍ୱ ଆବଶ୍ୟକ ଏଥିପାଇଁ। ସେଥିପାଇଁ ଏହା ସମସ୍ତଙ୍କ ପକ୍ଷେ ସମ୍ଭବ ହୁଏନା। କିନ୍ତୁ ମାଓ ମାଓ ନାମକ ଏକ ଧଳାରଙ୍ଗର ସୁନ୍ଦର ବିଲେଇ ମଡେଲ ସାଜି ସମସ୍ତଙ୍କୁ ଚକିତ କରି ଦେଇଛି। ଦୁଇ ବର୍ଷ ବୟସର ଏହି ବ୍ରିଟିଶ ଶର୍ଟହେୟାର ବିଲେଇ ଏବେ ଚାଇନାରେ ପ୍ରଫେଶନାଲ ମଡେଲ ସାଜିଛି। ଆଉ ଥରେ କାମ କଲେ ରୋଜଗାର କରୁଛି ୭୭୫-୧୫୫୦ ଡଲାର। ମାଓ ମାଓର ମାଲିକ ଅଟୋମୋଟିଭ ଇଣ୍ଡଷ୍ଟ୍ରିରେ କାମ କରନ୍ତି। ଥରେ ଏକ ଅଟୋ ଶୋ’ରେ ସେ ମାଓ ମାଓକୁ ସୁନ୍ଦରଭାବେ ସଜାଇ ଏକ କାର ଭିତରେ ବସାଇ ଦେଇଥିଲେ। ହଠାତ୍ ଲୋକ ଏହି ସୁନ୍ଦରୀ ବିଲେଇ ପ୍ରତି ଆକୃଷ୍ଟ ହୋଇ ସେହି ଗାଡି ପାଖରେ ଭିଡ ଜମେଇଲେ। ତା’ର ଫଟୋ ଉଠାଇ ତାକୁ ସୋସିଆଲ ମିଡିଆରେ ଶେୟାର କଲେ। ଫଳରେ ସେହି ଗାଡିର ପ୍ରମୋଶନ ହୋଇଗଲା। ଏହାପରେ ସେ ମାଓ ମାଓକୁ କାର୍ ମଡେଲ ସଜେଇଦେଲେ। ମାଓ ମାଓକୁ ବି ସୁନ୍ଦରଭାବେ ସଜାଇ ହୋଇ ବିଭିନ୍ନ ପୋଜ୍ ଦେବାକୁ ବହୁତ ଭଲ ଲାଗେ। ଯେମିତି କି ସମସ୍ତେ ତା’ ଆଡକୁ ଆକର୍ଷିତ ହେବେ। ମାସକୁ ପ୍ରାୟ ୪ ଥର ସେ କାର୍ ପାଇଁ ମଡେଲ ସାଜେ। ଆଉ ଭଲ ରୋଜଗାର କରେ। ଏହା ବଦଳରେ ତା’ର ମାଲିକ ତାକୁ ଦାମୀ କ୍ୟାଟ୍ ଫୁଡ୍ ଦିଅନ୍ତି।
