କେସିଙ୍ଗା,୩।୮,(ତୁମେଶ୍ୱର ସାହୁ): କଳାହାଣ୍ଡି ଜ଼ିଲା କେସିଙ୍ଗା ବ୍ଲକ ଅନ୍ତର୍ଗତ ସିରଜାପାଲି ଗ୍ରାମରେ ଥିବା ଜିଓ ଟାୱାର ବିଦ୍ୟୁତ ଚାଲିଗଲେ ଠପ ହୋଇଯାଉଛି । ଯାହାଦ୍ୱାରା ମୋବାଇଲ ସେବା ପ୍ରଭାବିତ ହେଉଛି । ଟାଟା ପାୱାର ରାତିସାରା ବିଦ୍ୟୁତ କାଟ କଲେ ଜିଓ ନେଟୱାର୍କ ରାତିସାରା ଚାଲୁନଥିବା ଦେଖା ଯାଉଛି । ଉତ୍ତମ ଟେଲିକମ ସେବା ଯୋଗାଇଦେଉଥିବା ଜିଓ ଡିଣ୍ଡିମ ପିଟୁଥିବା ବେଳେ ପ୍ରାୟ ଦୁଇମାସ ହେଲା ଟାଟା ପାୱାର ଯେତେବେଳେ ବିଦ୍ୟୁତ କାଟ କରିବ ଦିନ ହେଉ କି ରାତି ଜିଓ ଆଉ ଚାଲୁନାହିଁ । ବର୍ତ୍ତମାନ ସିରଜାପାଲି ଜିଓ ଟାୱାର ଅଧୀନରେ ଥିବା ପ୍ରାୟ ୫ ଟି ଗ୍ରାମର ହିତାଧିକାରୀ ଜିଓ ସିମ ବ୍ୟବହାର କରୁଥୁବାରୁ କୌଣସି ଆମ୍ବୁଲାନ୍ସ କିମ୍ବା କୌଣସି ଆପାତ୍ତ କାଳୀନ ସେବାରେ କାହା ସହିତ ଯୋଗାଯୋଗ କରିପାରୁନାହାନ୍ତି । ଜିଓ ଟାୱାର ତଳେ ଦୁଇଟି ବଡ ଜେନେରେଟର ଥିବା ସତ୍ତ୍ୱେ ତାହା ୨ ମାସ ହେଲା କାମ କରୁନାହିଁ ତେଣୁ ଲୋକଙ୍କ ଜିଓ ପ୍ରତି ଆଗ୍ରହ କମି ଯାଉଛି । ଅନେକ ଗ୍ରାହକ ଜିଓ ସିମକୁ ଅନ୍ୟ ସେବା ପାଇଁ ବଦଳାଇବା ଆରମ୍ଭ କରିଦେଇଥିବା ଜଣା ପଡିଛି । ଯଦି ଜିଓ ତାର ନେଟୱର୍କ ସେବା ଠିକ ନ କରେ ତାହେଲେ ଜିଓ ସିମକୁ ପୋର୍ଟ କରି ଅନ୍ୟ ଟେଲିକମ ସେବା ବ୍ୟବହାର କରିବାକୁ ଅଂଚଳବାସୀ ଅଭିଯୋଗ କରିଥିବା ସହ ଟାଟା ପାୱାରର ମନମୁଖୀ ବିଦ୍ୟୁତ କାଟକୁ ମଧ୍ୟ ଲୋକେ ବିରୋଧ କରିଛନ୍ତି । ରାତିରେ ବିଦ୍ୟୁତ ଗଲେ ଆଉ ଆସୁନାହିଁ କି କୌଣସି ଅଧିକାରୀ ଶୁଣୁ ନାହାନ୍ତି, ବର୍ଷା ଦିନ ମଶା ମାଛି, ସାପ ଏବଂ ବିଭିନ୍ନ ବିଷଧର ଜୀବଜନ୍ତୁର ପ୍ରକୋପ ଅଧିକ ଥିବା ବେଳେ ଟାଟା ପାୱାରର କେନ୍ଦୁବାହାଳୀ ଫିଡ଼ରରୁ ବାରମ୍ବାର ବିଦ୍ୟୁତ କାଟ ଲୋକଙ୍କୁ ଅତିଷ୍ଠ କରି ସାରିଲାଣି । ଏଭଳି ବିଦ୍ୟୁତ କାଟ ହେବାରୁ ଲୋକଙ୍କ ଜୀବନ ଯାପନ ପ୍ରକ୍ରିୟାରେ ବାଧା ହେଉଥୁବାରୁ କେନ୍ଦୁବାହାଳୀ ଗ୍ରୀଡ଼ ଘେରାଉ ପାଇଁ ସଜବାଜ ହେଉଥିବା ସୂଚନା ମିଳିଛି ।
