ଗାନ୍ଧିନଗର,୧।୧୨: କୋର୍ଟ ରୁମ୍ରେ ଶୁଣାଣି ଚାଲିଥିବା ସମୟରେ ଜଣେ ବ୍ୟକ୍ତିଙ୍କ ମୋବାଇଲ୍ ଫୋନ୍ ରିିଙ୍ଗ୍ ହେବାରୁ ସେ ବସିବା ସ୍ଥାନରୁ ଉଠି ଚାଲିଯାଇଥିଲେ। ଏନେଇ ଉପସ୍ଥିତ ଥିବା ମୁଖ୍ୟ ବିଚାରପତି ଅରବିନ୍ଦ କୁମାର ସମ୍ପୃକ୍ତ ବ୍ୟକ୍ତିଙ୍କଠାରୁ ମୋବାଇଲ୍ ଫୋନ୍ ଅପରାହ୍ନ ୫ଟା ପର୍ଯ୍ୟନ୍ତ ଜବତ କରିବାକୁ ନିର୍ଦ୍ଦେଶ ଦେଇଛନ୍ତି।
ଏଭଳି ଘଟଣା ଗୁଜରାଟ ହାଇକୋର୍ଟରେ ଘଟିଛି। କୋର୍ଟ ରୁମ୍ରେ ମୁଖ୍ୟ ବିଚାରପତିଙ୍କ ସମେତ ବିଚାରପତି ଆଶୁତୋଷ ଜେ. ଶାସ୍ତ୍ରୀ ମଧ୍ୟ ଉପସ୍ଥିତ ଥିଲେ। କୋର୍ଟ ରୁମ୍ର କାର୍ଯ୍ୟ ବାଧା ନ ଉପୁଜିବା ଲାଗି ପ୍ରବେଶ ପୂର୍ବରୁ ମୋବାଇଲ୍କୁ ସୁଇଚ୍ ଅଫ୍ କରିବା ଲାଗି ସୂଚନା ଲଗାଯାଇଥିଲେ ବି ଏହାକୁ ସମ୍ପୃକ୍ତ ବ୍ୟକ୍ତି ଅଣଦେଖା କରିଥିବା ଦର୍ଶାଇ ଖଣ୍ଡପୀଠ ଏଭଳି ଆଦେଶ ଦେଇଛନ୍ତି।
ଏସମ୍ପର୍କରେ ରେଜିଷ୍ଟାର ଜେନେରାଲଙ୍କୁ ନିର୍ଦ୍ଦେଶ ଦିଆଯାଇଛି। ତେବେ ସତ୍ୟପାଠ କରିବାକୁ ଆସିଥିବା ସମ୍ପୃକ୍ତ ବ୍ୟକ୍ତିଙ୍କ ମାନସିକ ସ୍ଥିତି ଖରାପ ଥିବାରୁ ମୁଖ୍ୟ ବିଚାରପତି ଜରିମାନା ଆଦାୟ କରିବାକୁ ମନା କରିଛନ୍ତି। ଏହା ସହିତ ମୁଖ୍ୟ ବିଚାରପତି କହିଛନ୍ତି ଯେ, କୋର୍ଟ ରୁମ୍ରେ ମୋବାଇଲ୍ ରିଙ୍ଗ୍ ହେଲେ ପ୍ରଥମେ ତାଗିଦ୍ ପାଇଁ ୧୦୦ ଟଙ୍କା ଜରିମାନା ଦେବାକୁ ପଡ଼ିବ। ଏଭଳି ଭୁଲ୍ ଦ୍ୱିତୀୟ ଥର ହେଲେ ୫୦୦ ଟଙ୍କା ଜରିମାନା ଦାଖଲ କରିବାକୁ ପଡ଼ିବ। ଯଦି ତୃତୀୟ ଥର ଲାଗି ଏହା ହୁଏ ତେବେ ୧୦୦୦ ଟଙ୍କା ଜରିମାନା ଦେବାକୁ ପଡ଼ିବ ବୋଲି ମୁଖ୍ୟ ବିଚାରପତି କହିଛନ୍ତି।
