ନୂଆଦିଲ୍ଲୀ,୨୦।୩: ବର୍ତ୍ତମାନ ସାରା ବିଶ୍ୱ ଏକ ଅସ୍ଥିର ପରିସ୍ଥିତି ଦେଇ ଗତି କରୁଛି। ଗୋଟିଏ ପଟେ ରୁଷିଆ-ୟୁକ୍ରେନ ଯୁଦ୍ଧ ଜାରି ରହିଥିବା ବେଳେ ଅନ୍ୟପଟେ ଇରାନ, ଇସ୍ରାଏଲ ଏବଂ ଆମେରିକା ମଧ୍ୟରେ ସଂଘର୍ଷ ଏକ ନୂଆ ମୋଡ଼ ନେଇଛି। ଏହି ଯୁଦ୍ଧକାଳୀନ ସ୍ଥିତି ମଧ୍ୟରେ ରୁଷିଆ ସରକାର ଦେଶର କିଛି ପ୍ରମୁଖ ଅଞ୍ଚଳରେ ମୋବାଇଲ ଇଣ୍ଟରନେଟ୍କୁ ବନ୍ଦ କରିଦେଇଛନ୍ତି। ଏଥିସହିତ ଲୋକପ୍ରିୟ ମେସେଜିଂ ଆପ୍ WhatsApp ଏବଂ Telegram ଉପରେ ମଧ୍ୟ କଟକଣା ଲଗାଯାଇଛି।
ମିଡିଆ ରିପୋର୍ଟ ଅନୁଯାୟୀ, ମସ୍କୋ ସମେତ ଅନେକ ବଡ଼ ସହରରେ ମୋବାଇଲ ଇଣ୍ଟରନେଟ ଜାମ କରିଦିଆଯାଇଛି। ଏହାର ପ୍ରଭାବ ସାଧାରଣ ଲୋକଙ୍କ ଉପରେ ଗମ୍ଭୀର ଭାବେ ପଡ଼ିଛି। ଇଣ୍ଟରନେଟ ନ ଥିବାରୁ ଅଫିସରେ କାମ କରୁଥିବା କର୍ମଚାରୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଅନଲାଇନ ନେଭିଗେସନ (Maps) କାମ କରୁ ନ ଥିବାରୁ ଟ୍ୟାକ୍ସି ଚାଳକମାନେ ରାସ୍ତା ଖୋଜିବାରେ ସଂଘର୍ଷ କରୁଛନ୍ତି। କଟକଣାରୁ ବଞ୍ଚିବା ପାଇଁ ଯୁବପିଢ଼ି ବାରମ୍ବାର VPN ବଦଳାଇବାକୁ ବାଧ୍ୟ ହେଉଛନ୍ତି, କିନ୍ତୁ ସରକାର ଏବେ VPN ସେବାକୁ ମଧ୍ୟ ବନ୍ଦ କରୁଛନ୍ତି।
ଇଣ୍ଟରନେଟ ବ୍ୟାନ୍ ଏବଂ ମେସେଜିଂ ଆପ ଉପରେ କଟକଣା ସମ୍ପର୍କରେ କ୍ରେମଲିନ ପ୍ରବକ୍ତା ଦିମିତ୍ରି ପେସ୍କୋଭ ଏକ ବଡ଼ ବୟାନ ଦେଇଛନ୍ତି। ତାଙ୍କ କହିବା ଅନୁଯାୟୀ ଏହି ପଦକ୍ଷେପ ପଛରେ ଦୁଇଟି ମୁଖ୍ୟ କାରଣ ରହିଛି। ଅନେକ ବିଦେଶୀ ଟେକ୍ କମ୍ପାନୀ ରୁଷିଆର ଆଇନ ଏବଂ ନିୟମକୁ ମାନିବାକୁ ମନା କରିଦେଇଛନ୍ତି। ପେସ୍କୋଭ କହିଛନ୍ତି ଯେ, ଶତ୍ରୁ ପକ୍ଷର ଡ୍ରୋନ୍ଗୁଡ଼ିକ ନେଭିଗେସନ ପାଇଁ ସେଲ୍ୟୁଲାର୍ ନେଟୱାର୍କର ସାହାଯ୍ୟ ନେଇଥାନ୍ତି। ସୁରକ୍ଷା ଦୃଷ୍ଟିରୁ ଏହି ନେଟୱାର୍କକୁ ଜାମ କରାଯାଇଛି ଯେପରି ଡ୍ରୋନ ଆକ୍ରମଣକୁ ରୋକାଯାଇପାରିବ।
ମସ୍କୋ ଏବଂ ସେଣ୍ଟ ପିଟର୍ସବର୍ଗ ଭଳି ସହରରେ ଗତ ଏକ ସପ୍ତାହ ଧରି ପ୍ରତିଦିନ କିଛି ସମୟ ପାଇଁ ମୋବାଇଲ ଇଣ୍ଟରନେଟ ସମ୍ପୂର୍ଣ୍ଣ ବନ୍ଦ ରହୁଛି। ରୁଷିଆ ସରକାର ନିଜ ସାର୍ବଭୌମତ୍ୱ ଏବଂ ସୁରକ୍ଷାକୁ ଅଗ୍ରାଧିକାର ଦେଇ ଇଣ୍ଟରନେଟ ଉପରେ ଏହି ନିୟନ୍ତ୍ରଣ ଜାରି କରିଛନ୍ତି।
