ସମ୍ବଲପୁର,୫ା୫(ବ୍ୟୁରୋ): ସମ୍ବଲପୁରରେ ଖୁବ୍ଶୀଘ୍ର ମୋ ବସ୍ ସେବା ଆରମ୍ଭ ହେବ। ଆସନ୍ତା ସେପ୍ଟେମ୍ବର ସୁଦ୍ଧା ଏହା ଲୋକାର୍ପଣ ହୋଇପାରେ ବୋଲି ଆଲୋଚନା ହେଉଛି। ଏଥିପାଇଁ ଜିଲା ପ୍ରଶାସନ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଛି। ମହାନଗର ନିଗମ ଅନ୍ତର୍ଗତ କାଇଁଶିିର ରାସ୍ତାରେ ବସ୍ଷ୍ଟାଣ୍ଡ ପାଇଁ ଜମି ଚିହ୍ନଟ ହୋଇଛି। ଜମି ଅଧିଗ୍ରହଣ ପ୍ରକ୍ରିୟା ମଧ୍ୟ ଖୁବ୍ଶୀଘ୍ର ହେବ। ପ୍ରଥମ ପର୍ଯ୍ୟାୟରେ ୫୦ ଓ ଦ୍ୱିତୀୟ ପର୍ଯ୍ୟାୟରେ ଆଉ ୫୦ ମୋଟ ୧୦୦ ବସ୍ ଚଳାଚଳ କରିବ। ଭୁବନେଶ୍ୱର ପରେ ସମ୍ବଲପୁରରେ ସରକାର ମୋ ବସ୍ ସେବା ଆରମ୍ଭ କରିବେ ବୋଲି ଆଲୋଚନା ହେଉଛି। ସମ୍ବଲପୁରରେ ଏବେ ସିଟି ବସ୍ ସେବା ରହିଛି। ମୋଟ ୪୨ ଗୋଟି ସିଟି ବସ୍ ଚଳାଚଳ କରୁଛି। ଟ୍ରାଫିକ ଓ ଅନ୍ୟାନ୍ୟ ସମସ୍ୟା ଯୋଗୁ ସହର ଭିତରେ ଏହି ବସ୍ ଚଳାଚଳ କରୁନାହିଁ। ହେଲେ ହୀରାକୁଦ ଓ ବୁର୍ଲା ସହ ପଡ଼ୋଶୀ ଝାରସୁଗୁଡ଼ା ଏବଂ ବରଗଡ଼ ଜିଲାକୁ ସିଟି ବସ୍ ଚଳାଚଳ କରୁଛି। କେଉଁ ରୁଟ୍ରେ କେତେ ବସ୍ ଚାଲିବ, ବସ୍ଷ୍ଟାଣ୍ଡ ଓ ଆନୁଷଙ୍ଗିକ ବ୍ୟବସ୍ଥା ନେଇ ପ୍ରଶାସନ ଏକ ରିପୋର୍ଟ ତିଆରି କରି ପଠାଇଥିବା ଜଣାପଡିଛି। ପରିବହନ ଓ ସରକାରୀ ସ୍ତରରେ ଅନୁମୋଦନ ପରେ ଆରମ୍ଭ ହେବ ବୋଲି ଆଶା କରାଯାଉଛି। କିଛିଦିନ ପୂର୍ବରୁ ଉତ୍ତରାଞ୍ଚଳ ରାଜସ୍ବ କମିଶନର ଡ. ସୁରେଶ ଚନ୍ଦ୍ର ଦଳାଇ, ମହାନଗର ନିଗମ କମିଶନର ପ୍ରଦୀପ ସାହୁ ବସ୍ଷ୍ଟାଣ୍ଡ ପାଇଁ ଜମି ଚିହ୍ନଟ କରିଥିଲେ। ପ୍ରାୟ ସାଢେ ୪ ଏକର ଜମିରେ ଏକ ଅତ୍ୟାଧୁନିକ ବସ୍ଷ୍ଟାଣ୍ଡ ନିର୍ମାଣ ହେବ। ମୁଖ୍ୟତଃ ମୋ ବସ୍ଗୁଡିକ ଏହି ବସ୍ଷ୍ଟାଣ୍ଡରେ ରହି ଚଳାଚଳ କରିବ। ସମ୍ବଲପୁର ମହାନଗର ନିଗମ କମିଶନର ସାହୁ କହିଛନ୍ତି, ଏବେ ମୋ ବସ୍ ଚଳାଚଳ ପାଇଁ ଚୂଡ଼ାନ୍ତ ହୋଇ ନାହିଁ। ଅନୁମୋଦନ ମଧ୍ୟ ଆସି ନାହିଁ। ଡିଜେଲ ଚାଳିତ ବସ୍ ଚଳାଚଳ କରିବା କଷ୍ଟକର। ତେଣୁ ବିକଳ୍ପ ବ୍ୟବସ୍ଥା ଥିବା ଯାନ କିଣାଯାଇ ପାରେ ା ଏବେ ମୋ ବସ୍ ଚଳାଚଳ ନେଇ କେବଳ ପ୍ରକ୍ରିୟା ଆରମ୍ଭ ହୋଇଛି।
