ଲୋଇସିଂହା,୧୫।୧୨(ଡି.ଏନ୍.ଏ): ଲୋଇସିଂହା ବିଧାୟକ ମୁକେଶ ମହାଲଙ୍ଗ ଗୁରୁବାର ଆଗଲପୁର ଗସ୍ତ କରି ବିଭିନ୍ନ ମଣ୍ଡି ପରିଦର୍ଶନ କରିଥିଲେ। ଆଗଲପୁର, ଭରସୁଜା, ରୋତ, ବକଟି, ପଟୁଆପାଲି ଓ ମୁରଷୁଣ୍ଢି ପାକ୍ସ ପରିଦର୍ଶନରେ ଯାଇ ସମସ୍ୟା ଉପରେ ସ୍ଥାନୀୟ ଚାଷୀଙ୍କ ସହ ସେ ଆଲୋଚନା କରିଥିଲେ। ମଣ୍ଡି ପରିଦର୍ଶନ ବେଳେ ନାନା ଅବ୍ୟବସ୍ଥା ପରିଲକ୍ଷିତ ହୋଇଥିବା ବିଧାୟକ ମହାଲିଙ୍ଗ କହିଛନ୍ତି।
୨୫ ନଭେମ୍ବରରୁ ଜିଲାରେ ଧାନକିଣା ଶୁଭାରମ୍ଭ ହୋଇଛି। ହେଲେ କିଣା ବିଳମ୍ବରେ ହେବାରୁ ଏବେ ୧୫ଦିନ ପିଛଲା ଧାନ କିଣା ଚାଲିଛି ା ପ୍ରତ୍ୟେକ ମଣ୍ଡିରେ ୨ରୁ ୪ କେଜି ଧାନ କଟ୍ନିି କରାଯାଉଥିବା ଚାଷୀ ଅଭିଯୋଗ କରିଥିବା ସେ କହିଛନ୍ତି। ପାକ୍ସରେ ଅନୁବନ୍ଧିତ ମିଲର୍ସମାନେ ଚାଷୀଙ୍କୁ ବସ୍ତା ଓ ସୁତଲି ଯୋଗାଉ ନାହାନ୍ତି। ଧାନ ଅନଲୋଡ ଓ ବୋଝେଇ ପାଇଁ ମିଲର୍ସ ଶ୍ରମିକଙ୍କୁ ଟଙ୍କା ପୈଠ କରିଥାନ୍ତି। ଶ୍ରମିକମାନେ ଚାଷୀଙ୍କଠାରୁ ଟଙ୍କା ନେଉଥିବାରୁ ମଣ୍ଡିରେ ଚାଷୀ ଶୋଷଣ ନୀତି ଅପଣାଉଥିବା ସେ ଅଭିଯୋଗ କରିଛନ୍ତି। ଧାନ ମାପ ବେଳେ କେବଳ ରାଉଣ୍ଡ ଫିଗର ଲେଖା ଯାଉଛି, ବଳକା ଧାନ ଗଣନା କରାଯାଉନାହିଁ। ଏପଟେ କଟ୍ନି ହେଉଥିବାରୁ ଚାଷୀ ମଣ୍ଡିରେ କ୍ଷତିସହୁଛି। ମଣ୍ଡିରେ ଚାଷୀଙ୍କ ସୁବିଧା ପାଇଁ ଆରଏମସି ସହାୟତା କରିଥାନ୍ତି। ହେଲେ ମଣ୍ଡିରେ କୌଣସି ଆନୁସଙ୍ଗିକ ବ୍ୟବସ୍ଥା ନ ଥିବାରୁ କ୍ଷୋଭ ପ୍ରକାଶ କରିଥିଲେ। ରାଜ୍ୟ ସରକାର ମଣ୍ଡି ପରିଚାଳନା ଏବଂ କମିଶନ ବାବଦକୁ ୨୫ ଟଙ୍କା ଦେଇଥାନ୍ତି। ହେଲେ ୨୦୧୮ମସିହାରୁ ଏଯାଏ ଦେଇ ନ ଥିବାରୁ ରାଜ୍ୟ ସରକାରଙ୍କ ଉପରେ ସେ ଅସନ୍ତୋଷ ବ୍ୟକ୍ତ କରିଥିଲେ।
