ମୁମ୍ବାଇ,୨୧।୯: ଜମ୍ମୁ ଓ କଶ୍ମୀରରୁ ଭାରତୀୟ ପ୍ରିମିୟର ଲିଗ (IPL) ରେ ଖେଳିଥିବା ପ୍ରଥମ ଖେଳାଳି ମିଥୁନ ମାନହସ ଭାରତୀୟ କ୍ରିକେଟ ନିୟନ୍ତ୍ରଣ ବୋର୍ଡ (BCCI) ର ନୂଆ ସଭାପତି ହେବାକୁ ଯାଉଛନ୍ତି। ଇଣ୍ଡିଆନ ଏକ୍ସପ୍ରେସର ରିପୋର୍ଟ ଅନୁଯାୟୀ, ମାନହସ ରୋଜର ବିନ୍ନୀଙ୍କ ସ୍ଥାନରେ ଏହି ପଦ ପାଇଁ ମୁଖ୍ୟ ପ୍ରାର୍ଥୀ ଭାବେ ଉଭା ହୋଇଛନ୍ତି। ମାନହସ ପୂର୍ବରୁ ଦୁଲୀପ ଟ୍ରଫିର ନର୍ଥ ଜୋନର କନଭେନର ଏବଂ IPL ଫ୍ରାଞ୍ଚାଇଜ ଗୁଜରାଟ ଟାଇଟାନ୍ସରେ ସପୋର୍ଟ ଷ୍ଟାଫ ଭାବେ କାର୍ଯ୍ୟ କରିଛନ୍ତି। ବର୍ତ୍ତମାନ ସେ ଜମ୍ମୁ ଓ କାଶ୍ମୀର କ୍ରିକେଟ ଆସୋସିଏସନ (JKCA) ର ପ୍ରଶାସକ ଅଛନ୍ତି।
ମାନହସ ଭାରତ ପାଇଁ ଅନ୍ତର୍ଜାତୀୟ କ୍ରିକେଟରେ ଡେବ୍ୟୁ କରି ନଥିଲେ, କିନ୍ତୁ ଫାର୍ଷ୍ଟ କ୍ଲାସ କ୍ରିକେଟରେ ସେ ୧୫୭ଟି ମ୍ୟାଚରେ ୯,୭୧୪ ରନ ସଂଗ୍ରହ କରି । ସେ ଦିଲ୍ଲୀ ଡେୟାରଡେଭିଲ୍ସ, ପୁଣେ ୱାରିୟର୍ସ ଏବଂ ଚେନ୍ନାଇ ସୁପର କିଙ୍ଗସ ଭଳି ତିନୋଟି IPL ଫ୍ରାଞ୍ଚାଇଜ ପାଇଁ ଖେଳିଛନ୍ତି।
ରିପୋର୍ଟ ଅନୁସାରେ, କର୍ଣ୍ଣାଟକର ପୂର୍ବତନ ଖେଳାଳି ରଘୁରାମ ଭଟ ଟ୍ରେଜରର ପଦ ପାଇଁ ଏବଂ ଛତିଶଗଡ଼ କ୍ରିକେଟ ସଂଘର ପ୍ରଭତେଜ ସିଂ ଭାଟିଆ ଯୁଗ୍ମ ସଚିବ ପଦ ପାଇଁ ପ୍ରମୁଖ ପ୍ରାର୍ଥୀ ଅଛନ୍ତି। ରବିବାର ମାନହସ ମଧ୍ୟ BCCI ସଭାପତି ପଦ ପାଇଁ ନାମାଙ୍କନ ଦାଖଲ କରିଛନ୍ତି। BCCI ଉପସଭାପତି ରାଜୀବ ଶୁକ୍ଲା କହିଛନ୍ତି, “ମିଥୁନ ମାନହସଙ୍କୁ ସଭାପତି କରିବାକୁ ନିଷ୍ପତ୍ତି ହୋଇଛି। ଅରୁଣ ଧୁମାଲ ଆଇପିଏଲ ଗଭର୍ନିଂ କାଉନସିଲର ଅଧ୍ୟକ୍ଷ ଭାବେ କାର୍ଯ୍ୟ ଜାରି ରଖିବେ।”
ଏହା ସହିତ, BCCI ରେ ଅନ୍ୟାନ୍ୟ ପରିବର୍ତ୍ତନ ମଧ୍ୟ ହେଉଛି। ପ୍ରଜ୍ଞାନ ଓଝା ଅଜିତ ଅଗ୍ରକରଙ୍କ ନେତୃତ୍ୱାଧୀନ ଜାତୀୟ ସିନିୟର ପୁରୁଷ ଚୟନ କମିଟିରେ ଶରତଙ୍କ ସ୍ଥାନ ନେବେ। ଶରତ ଜୁନିୟର ଚୟନ କମିଟିର ଅଧ୍ୟକ୍ଷ ଭାବେ VS ଥିଲକ ନାଇଡୁଙ୍କୁ ବଦଳାଇବେ। ପୂର୍ବତନ ଭାରତୀୟ ପେସର RP ସିଂ ସୁବ୍ରତ ବାନାର୍ଜୀଙ୍କ ସ୍ଥାନ ନେବେ। ନୂଆ ସଦସ୍ୟମାନେ ସେପ୍ଟେମ୍ବର ୨୮ରୁ ଦାୟିତ୍ୱ ଗ୍ରହଣ କରିବେ।
