ଭୁବନେଶ୍ୱର,୧୩।୬: ଡାକ୍ତରୀ ଛାତ୍ରୀ ଚନ୍ଦ୍ରିକା ଭଞ୍ଜବାଳା ହେମ୍ବ୍ରମ୍ଙ୍କ ମୃତ୍ୟୁ ଘଟଣାରେ ପର୍ଦ୍ଦାଫାଶ ହୋଇଛି। ଭୀମସେନଙ୍କ ପାଇଁ ଚନ୍ଦ୍ରିକାଙ୍କ ମୃତ୍ୟୁ ହୋଇଥିବା ପ୍ରାଥମିକ ତଦନ୍ତରୁ ତଥ୍ୟ ମିଳିଛି ବୋଲି ଡିସିପି ନିଜ ପ୍ରତିକ୍ରିୟାରେ କହିଛନ୍ତି। ଡିସିପି କହିଛନ୍ତି, ଲାପଟପ, ଟାବଲେଟ ଜବତ ହୋଇଛି, ହ୍ବାଟସଆପ ତଥ୍ୟ ବି ମିଳିଛି। ମୃତ୍ୟୁ ପୂର୍ବରୁ ଚନ୍ଦ୍ରିକା ଭୀମସେନଙ୍କୁ ଫୋନ କରିଥିଲେ, କିନ୍ତୁ ସେ ଫୋନ ଉଠାଇ ନ ଥିଲେ। ଅନ୍ୟ ଜଣଙ୍କ ନମ୍ବରରୁ ବି ଚନ୍ଦ୍ରିକା କଲ କରିଥିଲେ, କିନ୍ତୁ ତାହା ବି ଉଠାଇ ନଥିଲେ। ଆବଶ୍ୟକ ହେଲେ ଭୀମସେନଙ୍କୁ ରିମାଣ୍ଡରେ ଆଣି ପଚରାଉଚରା କରିବୁ।
ସୂଚନାଯୋଗ୍ୟ, ଫେରାର ଥିବା ଚନ୍ଦ୍ରିକାଙ୍କ ପୁରୁଷ ବନ୍ଧୁ ଭୀମସେନ ଟୁଡୁଙ୍କୁ ଶୁକ୍ରବାର କମିଶନରେଟ୍ ପୋଲିସ ମୟୂରଭଞ୍ଜରୁ ଗିରଫ କରିଛି। ମୟୂରଭଞ୍ଜ ଜିଲାର ବିଶୋଇ ଥାନାରେ ଭୀମସେନ ପ୍ରଥମେ ଆତ୍ମସମର୍ପଣ କରିଥିଲେ। ପରେ କମିଶନରେଟ୍ ପୋଲିସ ତାଙ୍କୁ ଗିରଫ କରିଛି। ଚନ୍ଦ୍ରିକାଙ୍କ ମୃତ୍ୟୁ ପାଇଁ ଭୀମସେନ ଦାୟୀ ବୋଲି ଚନ୍ଦ୍ରିକାଙ୍କ ମା’ ବାରଙ୍ଗ ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ଭୀମସେନଙ୍କୁ ଗିରଫକରିବା ପାଇଁ ଖୋଜୁଥିବାବେଳେ ପାଉ ନ ଥିଲା। ଭୀମସେନ ଆଗୁଆ ଜାମିନ ପାଇବାକୁ ହାଇକୋର୍ଟଙ୍କ ଦ୍ୱାରସ୍ଥ ମଧ୍ୟ ହୋଇଥିଲେ।
ଅନ୍ୟପକ୍ଷରେ ଭୀମସେନ ଓଏଏସ୍ ପ୍ରଶିକ୍ଷଣ ନେଉଥିବା ମଧୁସୂଦନ ଏକାଡେମୀର ୪ ଅଧିକାରୀଙ୍କୁ ଶୁକ୍ରବାର ପୋଲିସ ବାରଙ୍ଗ ଥାନାକୁ ଡକାଇ ଜେରା କରିଛି। ପୋଲିସ ସେମାନଙ୍କୁ ବିଭିନ୍ନ ଦିଗରୁ ପଚରାଉଚରା କରିଛି। ସେମାନଙ୍କ ମଧ୍ୟରେ ଜଣେ ଭୀମସେନଙ୍କ ବନ୍ଧୁ ଥିବା ଜଣାପଡ଼ିଛି। ଭୀମସେନ ଏକାଡେମୀ ଛାଡ଼ିବା ପୂର୍ବରୁ ସେ ବ୍ୟବହାର କରୁଥିବା ଲାପ୍ଟପ୍, ଟାବ୍ଲେଟ, ଜରୁରୀ କାଗଜପତ୍ର ଆଦିକୁ ଅଫିସ୍ରେ ଜମା କରିଥିଲେ। ପୋଲିସ ଏହିସବୁ ସାମଗ୍ରୀକୁ ଜବତକରି ଥାନାକୁ ଆଣି ଯାଞ୍ଚ କରୁଛି। ଏସବୁରୁ ଅନେକ କିଛି ତଥ୍ୟ ମିଳିପାରିବ ବୋଲି ପୋଲିସ ଆଶା ରଖିଛି।
ସୂଚନାନୁଯାୟୀ, ଚଳିତ ମାସ ୪ତାରିଖରେ ତ୍ରିଶୂଳିଆ ନେତାଜୀ ସୁଭାଷ ସେତୁ ତଳୁ କାଠଯୋଡ଼ି ନଦୀରୁ ଚନ୍ଦ୍ରିକାଙ୍କ ମୃତଦେହ ବାରଙ୍ଗ ପୋଲିସ ଜବତ କରିଥିଲା। ଚନ୍ଦ୍ରିକାଙ୍କ ମୃତ୍ୟୁକୁ ନେଇ ପରିବାର ଲୋକେ ହତ୍ୟା ଅଭିଯୋଗ ଆଣିଥିଲେ। ଭୀମସେନ ଓ ତାଙ୍କ ନୂତନ ବାନ୍ଧବୀ ସ୍ବାତୀ ମିଶି ଚନ୍ଦ୍ରିକାଙ୍କୁ ହତ୍ୟା କରିଥିବା ନେଇ ଚନ୍ଦ୍ରିକାଙ୍କ ପରିବାର ଲୋକେ ବାରଙ୍ଗ ଥାନାରେ ଅଭିଯୋଗ କରିଥିଲେ। ଇତିମଧ୍ୟରେ ଚନ୍ଦ୍ରିକାଙ୍କ ବ୍ୟବଚ୍ଛେଦ ରିପୋର୍ଟରେ ଶ୍ୱାସରୁଦ୍ଧ ଓ ପାଣିରେ ବୁଡ଼ି ମୃତ୍ୟୁ ଘଟିଥିବା ପୋଲିସ ସୂଚନା ଦେଇଛି। ଚନ୍ଦ୍ରିକାଙ୍କ ମୃତ୍ୟୁ ପରଠାରୁ ଭୀମସେନ ଫେରାର ହୋଇଯାଇଥିଲେ। ଘଟଣାର ୮ଦିନ ପରେ ତାଙ୍କୁ ଗିରଫ କରାଯାଇଛି। ଭୀମସେନଙ୍କ ବାପା, ନୂତନ ବାନ୍ଧବୀ ସ୍ବାତୀ ଏବଂ ଘଟଣା ଦିନ ଯେଉଁ ଅଟୋରେ ଚନ୍ଦ୍ରିକା ଆସିଥିଲେ ସେହି ଅଟୋର ଚାଳକଙ୍କୁ ବାରଙ୍ଗ ପୋଲିସ ଜେରା କରିସାରିଛି।
Dharitri – Odisha’s No.1 Odia Daily
