ଥୁଆମୂଳ ରାମପୁର, ୧୨ା୮ (ଦୁର୍ଗା କୀର୍ତ୍ତି):ଶେଷରେ ନିଖୋଜ ଦାଦନ ଶ୍ରମିକ ଘାସିରାମ ମାଝୀ (୩୦)ଙ୍କୁ ନେଇ ସୃଷ୍ଟିହୋଇଥିବା ଆଶଙ୍କା ଦୂରହୋଇଛି। କେରଳରେ ଦିଗହରା ହୋଇ ବୁଲୁଥିବା କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ୍ ଅଡ଼ିଗୁନା ଗ୍ରାମର ଘାସିରାମ ନିଜ ପୂର୍ବ କମ୍ପାନୀରେ ସୁରକ୍ଷିତ ଭାବେ ପହଞ୍ଚତ୍ଛନ୍ତି। ଘାସିରାମଙ୍କ କହିବା ଅନୁଯାୟୀ, ଗତମାସ ୩୦ ତାରିଖରେ ସେ ଗାଁର ଅନ୍ୟ କେତେଜଣଙ୍କ ସହ କେସିଙ୍ଗା ରେଳ ଷ୍ଟେଶନରୁ କେରଳର ଏର୍ନାକୁଲମ ଜିଲା କୋଚିସ୍ଥିତ ଏକ କମ୍ପାନୀକୁ କାମ କରିବା ପାଇଁ ଯାଉଥିଲେ। ତେବେ ଏର୍ନାକୁଲମ ଷ୍ଟେଶନ ଆସିବା ସମୟରେ ଘାସିରାମ ଶୋଇପଡ଼ିଥିବାରୁ ପରବର୍ତ୍ତୀ ଷ୍ଟେଶନରେ ଓହ୍ଲାଇପଡ଼ିଥିଲେ। ଟିକେଟ ନ ଥିବାରୁ ସେଠାରେ ରେଲୱେ ପୋଲିସ ତାଙ୍କୁ ଅଟକାଇ ପଚରାଉଚୁରାକରି ଛାଡ଼ିଦେଇଥିଲା। କିନ୍ତୁ ଭାଷା ନ ବୁଝିପାରିବା ଏବଂ ପ୍ରଥମ ଥର ପୋଲିସର ସାମ୍ନା କରିଥିବାରୁ ଭୟ ଓ ମାନସିକ ଚାପରେ ସେ ସେଠାରୁ ପ୍ରାୟ ୧୩ କି.ମି. ଦୂର ସେଲୱାଇ ଅଞ୍ଚଳକୁ ଚାଲି ଚାଲି ପଳାଇଥିଲେ। କିଛିଦିନ ମାନସିକ ଅସନ୍ତୁଳନ ସ୍ଥିତିରେ ଏଣେତେଣେ ବୁଲି ସ୍ବାଭାବିକ ହେବା ପରେ ସେ ଗତ ୮ତାରିଖରେ ଏର୍ନାକୁଲମ ଆସି ସେଠାରୁ ଅଟୋ ଯୋଗେ କାମ କରୁଥିବା କମ୍ପାନୀରେ ପହଞ୍ଚିଥିଲେ। ସେଠାରେ ଥିବା ଅନ୍ୟ ଓଡ଼ିଆ ଶ୍ରମିକ ଏ ନେଇ ଗାଁ ଓ ପରିବାର ଲୋକଙ୍କୁ ଖବର ଦେଇଥିଲେ। ଏହି ସୂଚନା ପାଇ ପରିବାର ଲୋକେ ଥୁଆମୂଳ ରାମପୁର ଥାନା ଅଧିକାରୀଙ୍କୁ ଅବଗତ କରାଇଥିଲେ। ପୂର୍ବରୁ ଥାନାରେ ରୁଜୁହୋଇଥିବା ନିଖୋଜ ମାମଲା (ନଂ.୧୯/୨୬) ଅନୁଯାୟୀ ଘାସିରାମ ସୁରକ୍ଷିତ ଥିବା ନେଇ ଥାନା ଅଧିକାରୀ ଗଣମାଧ୍ୟମକୁ ସ୍ପଷ୍ଟ କରିଛନ୍ତି। ଘାସିରାମ ସୁରକ୍ଷିତ ଥିବା ଖବର ପାଇ ପରିବାର ଓ ଗ୍ରାମରେ ଖୁସିର ଲହରି ଖେଳିଯାଇଛି।