ନବରଙ୍ଗପୁର,୧୦।୭ (ସଦାଶିବ ପ୍ରହରାଜ): ନବରଙ୍ଗପୁର ଜିଲାର ଉମରକୋଟ ଅଞ୍ଚଳରୁ ଏକ ହୃଦୟବିଦାରକ ଘଟଣା ସାମ୍ନାକୁ ଆସିଛି। ପ୍ରାୟ ୧୦ କିଲୋମିଟର ଦୂର ବାଇକରେ ଜଣେ ନାବାଳିକାଙ୍କ ମୃତଦେହ ବୋହି ନେବାକୁ ପରିବାର ଲୋକେ ବାଧ୍ୟ ହୋଇଥିଲେ। ଏହି ଘଟଣା ପୁଣିଥରେ ସ୍ୱାସ୍ଥ୍ୟ ବ୍ୟବସ୍ଥା ଓ ଜରୁରୀକାଳୀନ ସେବାର ବାସ୍ତବ ଚିତ୍ରକୁ ପଦାରେ ପକାଇଛି।
ସୂଚନା ଅନୁଯାୟୀ, ଉମରକୋଟ ବ୍ଲକ ଅନ୍ତର୍ଗତ ସାନଭରଣ୍ଡୀ ଗ୍ରାମରେ ଥିବା ଜଣେ ସମ୍ପର୍କୀୟଙ୍କ ଘରେ ନାବାଳିକା ଅନିତା ଲହରାଙ୍କର ଶୁକ୍ରବାର ସକାଳେ ମୃତ୍ୟୁ ଘଟିଥିଲା। ପରିବାର ଲୋକଙ୍କ କହିବା ଅନୁସାରେ, ସେ ଦୀର୍ଘଦିନ ଧରି ଏକ ରୋଗରେ ପୀଡ଼ିତ ଥିଲେ।
ମୃତ୍ୟୁ ପରେ ତାଙ୍କ ମୃତଦେହକୁ ଉମରକୋଟ ବ୍ଲକର ମୁର୍ତ୍ତୁମା ପଞ୍ଚାୟତ ଅନ୍ତର୍ଗତ ଅମ୍ବାଗୁଡ଼ା ଗ୍ରାମରେ ଥିବା ତାଙ୍କ ମାମୁଁ ଘରକୁ ନିଆଯାଇଥିଲା। ସମ୍ପର୍କୀୟମାନଙ୍କ କହିବା ଅନୁସାରେ, ସାନଭରଣ୍ଡୀ ଗ୍ରାମରେ ମୃତ୍ୟୁ ଘଟିଥିବାରୁ ସେଠାରେ ଶବ ସତ୍କାର ନ କରି ନାବାଳିକାଙ୍କ ପୂର୍ବ ବାସସ୍ଥାନ ଥିବା ମାମୁଁ ଘରକୁ ଶବ ସତ୍କାର ପାଇଁ ମୃତଦେହ ଅଣାଯାଇଥିଲା।
ତେବେ ମୃତଦେହ ପରିବହନ ପାଇଁ କୌଣସି ସରକାରୀ ଶବବାହୀ ଗାଡ଼ିର ସୁବିଧା ନ ମିଳିବାରୁ ପରିବାର ଲୋକେ ଏକ ବାଇକରେ ପ୍ରାୟ ୧୦ କିଲୋମିଟର ଦୂର ମୃତଦେହକୁ ବୋହି ଅମ୍ବାଗୁଡ଼ା ଗ୍ରାମକୁ ନେଇଥିଲେ। ଏହି ଦୃଶ୍ୟ ସ୍ଥାନୀୟ ଅଞ୍ଚଳରେ ଆଲୋଚନାର ବିଷୟ ପାଲଟିଛି।
ଅନ୍ୟପକ୍ଷରେ, ନାବାଳିକାଙ୍କ ମୃତ୍ୟୁ ସମ୍ପର୍କୀୟଙ୍କ ଘରେ ଘଟିଥିବାରୁ ସରକାରୀ ଶବ ପରିବହନ ସୁବିଧା ମିଳିବ କି ନାହିଁ ସେନେଇ ଅନିଶ୍ଚିତତା ଥିଲା। ଫଳରେ ସମ୍ପର୍କୀୟମାନେ ବାଧ୍ୟ ହୋଇ ବାଇକରେ ମୃତଦେହକୁ ପ୍ରାୟ ୧୦ କିଲୋମିଟର ଦୂର ବୋହି ନେଇଥିବା କହିଛନ୍ତି। ଏହି ଘଟଣା ପୁଣିଥରେ ଗ୍ରାମାଞ୍ଚଳରେ ଜରୁରୀକାଳୀନ ସ୍ୱାସ୍ଥ୍ୟ ଓ ଶବ ପରିବହନ ସେବାର ଉପଲବ୍ଧତାକୁ ନେଇ ପ୍ରଶ୍ନ ସୃଷ୍ଟି କରିଛି।