ପୁରୁଷୋତ୍ତମପୁର,୨।୮(ସବିତା ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ସହରର ଗଡ଼ସାହିରେ ନାବାଳିକାଙ୍କ ଆତ୍ମହତ୍ୟା ଘଟଣାରେ ପୋଲିସ ଦୁଇଜଣଙ୍କୁ ଗିରଫ କରି କୋର୍ଟଚାଲାଣ କରିଛି । ସୂଚନା ଅନୁସାରେ, ବ୍ଲାକମେଲରେ ମହିଳାଜଣକ ମାନସିକ ଭାବେ ଭାଙ୍ଗିପଡିଥିଲେ । ଏହାପରେ ୧୫ ବର୍ଷୀୟ ନାବାଳିକା ଜୀବନ ହାରିଥିବା ଘଟଣାରେ ପୁରୁଷୋତ୍ତମପୁର ପୋଲିସ ଦୁଇ ଅଭିଯୁକ୍ତଙ୍କୁ ଗିରଫକରି ରବିବାର ବ୍ରହ୍ମପୁର ପୋକସ କୋର୍ଟକୁ ଚାଲାଣ କରିଛନ୍ତି । ସେମାନେ ହେଲେ ପୁରୁଷୋତ୍ତମପୁର ଗଡସାହିର ରାମାରାଓ ଦୋରା(୫୪) ଓ କନକାସାହିର ଜେ.ଗୋପାଳପାତ୍ର (୩୫) । ଏହି ଘଟଣାକୁ ନେଇ ପୁରୁଷୋତ୍ତମପୁର ଥାନା ଆଇଆଇସି କୁଳମଣି ସେଠୀ କହିଛନ୍ତିଯେ, ମୃତ ନାବାଳିକାଙ୍କ ପରିବାର ପକ୍ଷରୁ ହୋଇଥିବା ଅଭିଯୋଗ ପ୍ରକାରେ ତଦନ୍ତ କରାଯିବା ବେଳେ ରାମାରାଓ ଦୋରାଙ୍କୁ ଗୋପାଳ ପାତ୍ର ଫଟୋ ଭାଇରଲ କରିବାରେ ସହଯୋଗ କରିଥିବାର ଜଣାପଡିଛି ।
ସୂଚନାଯୋଗ୍ଯଯେ, ଏ. ଯଶୋଦା ଆଚାରୀଙ୍କ ପରିବାର ଗରିବ ଶ୍ରେଣୀର ହୋଇଥିବା ବେଳେ ତାଙ୍କ ସ୍ବାମୀ ବୁଲୁ ଆଚାରୀଙ୍କ ମୃତ୍ୟୁ ପରେ ସେ ଅସହାୟ ହୋଇ ସ୍କୁଲରେ ମଧ୍ୟାହ୍ନ ଭୋଜନ ରାନ୍ଧିବା ସହ ଦିନମଜୁରି କରି ଦୁଇ ଝିଅ ଓ ଗୋଟିଏ ପୁଅଙ୍କୁ ପ୍ରତିପୋଷଣ କରୁଛନ୍ତି । ତେବେ ପେଟପାଇଁ ଉକ୍ତ ସାହିର ରାମାରାଓ ନାମକ ଜଣେ ବ୍ୟକ୍ତିଙ୍କ ଘରକୁ ଯଶୋଦା ଓ ତାଙ୍କ ନାବାଳିକା ଝିଅ କିଏକେତେବେଳେ ଯାଇ ରୋଷେଇ, ବାସନ ମଜା ଓ ଅନ୍ୟାନ୍ୟ ଘରୋଇ କାମ କରୁଥିଲେ । ଏହି ସମୟରେ ଉକ୍ତ ବ୍ୟକ୍ତି ନାବାଳିକାଙ୍କୁ ପ୍ରଲୋଭନ ଦେଖାଇ ତାଙ୍କର କିଛି ଫଟୋ ଉଠାଇ ରଖିଥିଲେ ଏବଂ ତାଙ୍କ ଉପରେ କୁଦୃଷ୍ଟି ପକାଇ ଶାରୀରିକ ସମ୍ପର୍କ ରଖିବା ପାଇଁ ବାଧ୍ୟ କରିଥିଲେ । ନାବାଳିକା ଏ ସମ୍ପର୍କରେ ମା’ଙ୍କୁ ଜଣାଇବା ପରେ ଗତ ତିନି ମାସ ଧରି ଉଭୟ ମା’ ଓ ଝିଅ ସେହି ଘରକୁ କାମ କରିବାକୁ ଯିବା ବନ୍ଦ କରିଦେଇଥିଲେ ।
ପରେ ଉକ୍ତ ବ୍ୟକ୍ତି ନାବାଳିକାଙ୍କୁ ବିଭିନ୍ନ ପ୍ରକାରର ଧମକ ଦେବା ସହ ଫଟୋ ଭାଇରାଲ କରିଦେବାକୁ ବ୍ଲାକମେଲ କରୁଥିବା ମୃତାଙ୍କ ମା’ ଅଭିଯୋଗ କରିଥିଲେ । ଏହି ଘଟଣାକୁ ନେଇ ନାବାଳିକାଙ୍କ ସମ୍ପର୍କୀୟମାନେ ରାମାରାଓଙ୍କୁ ଭେଟି ପଚାରିବା ସହ ତାଗିଦ କରିଥିଲେ। ତଥାପି ସେ ନାବାଳିକାଙ୍କୁ ପୁନର୍ବାର ଧମକ ଦେଇଥିବାରୁ ମାନସିକ ଭାବେ ଭାଙ୍ଗିପଡ଼ି ସେ ଘରେ କେହି ନ ଥିବା ସମୟରେ ବିଷପିଇ ଆତ୍ମହତ୍ୟା କରିଥିବା ପରିବାର ପକ୍ଷରୁ ଅଭିଯୋଗ ହୋଇଥିଲା ।