ନୟାଗଡ଼ ଅଫିସ,୧୯।୧ – ନୟାଗଡ଼ ଜିଲାରେ ୧୫୩ ଧାନମଣ୍ଡି ଓ ୧୪ ସଂଲଗ୍ନ ମଣ୍ଡି ଖୋଲିବାକୁ ପ୍ରଶାସନ ନିଷ୍ପତ୍ତି ନେଇଥିଲା । ଗତ ୭ ତାରିଖରେ ନୟାଗଡ଼ ଜିଲା ସଦର ମହକୁମାରୁ ଧାନକିଣା ଆରମ୍ଭ ହୋଇଥିଲା । ତେବେ ଜିଲାର ସବୁ ଧାନ ମଣ୍ଡି ଖୋଲିିଲାଣି ବୋଲି ଜିଲା ଯୋଗାଣ ଅଧିକାରୀ କହୁଥିଲେ ମଧ୍ୟ ଗ୍ରାଉଣ୍ଡ ଜିରୋ ରିପୋର୍ଟ କହୁଛି ଭିନ୍ନ। ଧାନ କିଣିବାର ୧୨ଦିନ ବିତିବାକୁ ବସିଥିବାବେଳେ ସରକାରୀ ଘୋଷଣାର ଅଧା ମଣ୍ଡି ଏଯାବତ ଖୋଲି ପାରିନାହିଁ। ଅନ୍ୟପକ୍ଷେ ଖୋଲିଥିବା ଧାନମଣ୍ଡିରେ ଚାଷୀ ଧାନ ବିକ୍ରି କରିପାରୁ ନାହିଁ। ଚାଷୀର ଧାନ କଞ୍ଚା ଓ ସବୁଜ ଭାଗ ଅଧିକ ରହୁଛି ଦର୍ଶାଇ ମିଲର ଫେରାଇ ଦେଉଛି । ଅମଳ ସମୟରେ ଧାନ ବର୍ଷାରେ ଭିଜିବା ଓ ପାଣି,ମାଟିରେ ପଡ଼ି ରହିବା କାରଣରୁ ମାନ କମିବା ପ୍ରଶାସନ ଓ ସରକାର ଜାଣିଥିଲେ ମଧ୍ୟ ଚାଷୀଙ୍କୁ ହଇରାଣ କରିବ କେତେଦୂର ଠିକ୍ ବୋଲି ପ୍ରଶ୍ନ ଉଠିଛି । ମିଲର ଧାନକୁ ଏଫ୍ଏକ୍ୟୁ ମାନର ନୁହଁ କହି ଫେରାଇ ଦେବାପରେ ଚାଷୀ ପୁଣି ଖର୍ଚ୍ଚାନ୍ତ ହୋଇ ଧାନ ଘରକୁ ଫେରାଇ ନେଉଛି । ସେହିପରି ସୋମବାର ବାହାଡ଼ାଝୋଲାରେ ମଣ୍ଡି ଖୋଲିଥିଲା । ଧାନସଫା ହୋଇ ନାହିଁ, ଓଦାଳିଆ ଅଛି କହି ମିଲର ଧାନ ଫେରାଇ ଦେଇଛି। ଏନେଇ ଭାପୁରର ଚାଷୀ ସୁଦାମ ପ୍ରଧାନ କୁହନ୍ତି, ଭାପୁର ସେବା ସମବାୟ ସମିତିରେ ରବିବାର ଧାନମଣ୍ଡି ଖୋଲିଥିଲା। ଚାଷୀଧାନ ବିକ୍ରି କରିବାକୁ ମଣ୍ଡିକୁ ଆସିଥିଲେ । ସରକାରଙ୍କ ଘୋଷଣା ଅନୁସାରେ ଆଦ୍ରତା ୧୭ପ୍ରତିଶତ ଥିଲେ ଧାନ କିଣା ହେବ। ମାତ୍ର ଆଦତ୍ରା ୧୭.୫ ଥିବା ଦର୍ଶାଇ ମିଲର ଧାନ କିଣିଲା ନାହିଁ । ପରାମର୍ଶ ଦେଲା ଧାନ କଞ୍ଚା ଓ ସବୁଜ ଭାଗ ଠିକ କରି ଆଣିଲେ ଧାନ କିଣାଯିବ । ମିଲର ଧାନ ନେବାକୁ ବାରଣ କରିବା ପରେ ଚାଷୀମାନେ ଖର୍ଚ୍ଚାନ୍ତ ହୋଇ ଧାନ ଫେରାଇ ନେଲେ। ଯେଉଁ ଚାଷୀ ଧାନ ଫେରାଇ ନେଲେ ସେମାନେ କ’ଣ ମଣ୍ଡିକୁ ପୁଣି ଆସିବେ, ଏକଥା ସରକାର ଓ ପ୍ରଶାସନ ବୁଝିବା ଦରକାର । ହେଲେ ସମସ୍ୟା କେହି ବୁଝୁ ନ ଥିବାରୁ ଚାଷୀଙ୍କ ଚିନ୍ତା ବଢ଼ି ଚାଲିଛି ବୋଲି ବହୁ ଚାଷୀ କହିଛନ୍ତି ।
ମେସେଜ ଆସୁଛି,ଖୋଲୁନି ମଣ୍ଡି
ମଣ୍ଡିରେ ଧାନ ବିକ୍ରି କରିବାକୁ ଚାଷୀଙ୍କ ପାଖକୁ ମେସେଜ ଆସୁଛି । ହେଲେ ପ୍ରଶାସନ ଧାନମଣ୍ଡି ଖୋଲିବାରେ ବିଫଳ ହୋଇଛି । ଏଣୁ ଚାଷୀ ମଣ୍ଡିକୁ ଯାଇ ଧାନ ଧରି ଫେରୁଛି । ଏହାର ନଜିର ଓଡ଼ଗାଁ ପ୍ରାଥମିକ କୃଷି ସମବାୟ ସମିତିକୁ ନିଆଯାଇପାରେ । ଏଠାର ଚାଷୀଙ୍କୁ ଜାନୁୟାରୀ୧୬ରେ ଧାନ ବିକ୍ରି କରିବାକୁ ମେସେଜ ଆସିଥିଲା । ଚାଷୀ ୧୬,୧୭,୧୮ ତିନି ଦିନ ଧରି ଅପେକ୍ଷା କଲା । ହେଲେ ମଣ୍ଡି ଖୋଲିଲାନି । ସମାନ ଅଭିଯୋଗ ନୂଆଗାଁରୁ ଆସିଛି। ଏଠାରେ ମୋବାଇଲକୁ ମେସେଜ ଆସିଥିଲେ ମଧ୍ୟ ମଣ୍ଡି ଖୋଲି ପାରୁନି ପ୍ରଶାସନ ।
