ନୂଆଦିଲ୍ଲୀ,୧।୮: ବିଶ୍ୱର ଅଗ୍ରଣୀ ସଫ୍ଟଓ୍ବେର କମ୍ପାନୀ ‘ମାଇକ୍ରୋସଫ୍ଟ’ ଖୁବ୍ଶୀଘ୍ର ସହଜ ଓ ସୁଲଭ ମୂଲ୍ୟରେ ଆତିଥେୟତା ଯୋଗାଇ ଦେଉଥିବା ଭାରତୀୟ କମ୍ପାନୀ ଓୟୋକୁ ଅଧିଗ୍ରହଣ କରିପାରେ ବୋଲି ସୂଚନା ମିଳିଛି। ଏ ନେଇ ଓୟୋ କର୍ତ୍ତୃପକ୍ଷଙ୍କ ସହ ମାଇକ୍ରୋସଫ୍ଟର ଆଲୋଚନା ଅନ୍ତିମ ପର୍ଯ୍ୟାୟରେ ରହିଛି। ଯଦି ଏହି ବ୍ୟବସାୟିକ ଆଲୋଚନା ସଫଳ ହୁଏ, ତେବେ ଓୟୋର ଅଂଶଧନକୁ ମାଇକ୍ରୋସଫ୍ଟ କିଣିବ ବୋଲି ଜଣାପଡ଼ିଛି। ଫଳରେ ଏହା ୯ ବିଲିୟନ ଡଲାର ( ଭାରତୀୟ ମୁଦ୍ରାରେ ଏହା ମୂଲ୍ୟ ପ୍ରାୟ ୬୭ ହଜାର କୋଟି ଟଙ୍କା) କମ୍ପାନୀରେ ପରିଣତ ହେବ ବୋଲି କୁହାଯାଉଛି।
୨୦୧୯ ଶେଷ ଆଡ଼କୁ ଓୟୋର ଡିମାଣ୍ଡ ସାରା ବିଶ୍ୱରେ ୨ ନମ୍ବରରେ ରହିଥିଲା। କୋଭିଡ୍-୧୯ ଯୋଗୁ ଏହି କ୍ଷେତ୍ର ବ୍ୟାପକ କ୍ଷତିଗ୍ରସ୍ତ ହୋଇଛି। ଫଳରେ ଏହାର ଚାହିଦା ସମୟାନୁସାରେ ହ୍ରାସ ପାଇଚାଲିଛି। ୨୦୧୯ରେ ଏହାର ମୂଲ୍ୟ ୧୦ ବିଲିୟନ ଡଲାର ରହିଥିଲା। ସେହିପରି ୨୦୧୭ ବେଳକୁ ମଧ୍ୟ ଓୟୋର ଚାହିଦା ଅନୁସାରେ ବଜାର ମୂଲ୍ୟ ୮୫୦ ମିଲିୟନ ଡଲାରରେ ଶେୟାର କାରବାର ପାଇଁ ବିଭିନ୍ନ ନିବେଶକ ଆଗ୍ରହ ପ୍ରକାଶ କରିଥିଲେ ବୋଲି ଓୟୋ ପକ୍ଷରୁ କୁହାଯାଇଛି। ସେହିଭଳି ଆଗାମୀ ଦିନରେ ଓୟୋ ଆଇପିଓ ଆଣିବା ଲାଗି ଯୋଜନା କରିଛି। ତେବେ ଏହି କାରବାର ଏହା ପୂର୍ବରୁ ଶେଷ ହେବ ବୋଲି ଆଶଙ୍କା କରାଯାଉଛି। ଆଇପିଓ ଲାଗି ଓୟୋ ପକ୍ଷରୁ କୌଣସି ନିର୍ଦ୍ଦିଷ୍ଟ ସମୟସୂଚୀ ରଖାଯାଇନାହିଁ।
ତେବେ ଏ ପ୍ରସଙ୍ଗରେ ଓୟୋ ଏବଂ ମାଇକ୍ରୋସଫ୍ଟ କର୍ତ୍ତୃପକ୍ଷଙ୍କ ପକ୍ଷରୁ କୌଣସି ସ୍ପଷ୍ଟ ସୂଚନା ଦିଆଯାଇ ନ ଥିଲେ ମଧ୍ୟ ବର୍ତ୍ତମାନ ସୁଦ୍ଧା ଏହି ଆଲୋଚନା ସମ୍ପୂର୍ଣ୍ଣ ଗୋପନୀୟ ରହିଛି। ସେହିଭଳି ଉଭୟ ସଂସ୍ଥାର ଅଧିକାରୀଙ୍କୁ ମଧ୍ୟ ନୀରବତା ଅବଲମ୍ବନ କରିବାକୁ କୁହାଯାଇଛି।
ଜୁଲାଇ ପହିଲାରୁ ଓୟୋ ସଂସ୍ଥାଗତ ନିବେଶକଙ୍କଠାରୁ ପ୍ରାୟ ୪,୯୨୦ କୋଟି ଟଙ୍କା ଋଣ ଆକାରରେ ସଂଗ୍ରହ କରିଥିଲା। ଏହି ଧନକୁ ସଂସ୍ଥା ପୁରୁଣା ଋଣ ଓ ଅନ୍ୟ ବ୍ୟବସାୟିକ ନିବେଶ ହ୍ରାସ ଲାଗି ଉପଯୋଗ କରିଥିବା ଜଣାପଡ଼ିଛି। ତେବେ ଓୟୋ ପକ୍ଷରୁ ଦିଆଯାଇଥିବା ଏହି ଅଫରକୁ ୧.୭ ଗୁଣା ସବ୍ସ୍କ୍ରାଇବର ମିଳିଥିବା ବେଳେ କମ୍ପାନୀକୁ ପ୍ରମୁଖ ସଂସ୍ଥାଗତ ନିବେଶକଙ୍କଠାରୁ ପାଖାପାଖି ୧ ବିଲିୟନ ଡଲାରର ପ୍ରତିଶ୍ରୁତି ମିଳିଥିବା ଓୟୋ ପକ୍ଷରୁ କୁହାଯାଇଛି। ୨୭ ବର୍ଷୀୟ ଓଡ଼ିଆ ପୁଅ ରିତେଶ ଅଗ୍ରଓ୍ବାଲ ଏହି ହୋଟେଲ ଚେନ୍ ବ୍ୟବସାୟ ‘ଓୟୋ’ର ଆରମ୍ଭ କରିଥିଲେ। ଗ୍ରାହକ ସେବାରେ ଏହାର ପ୍ରଭାବ ସାରା ବିଶ୍ୱରେ ଦେଖାଦେଇଥିଲା। ପର୍ଯ୍ୟଟକଙ୍କଠାରୁ ଆରମ୍ଭକରି ଅଜଣା ଲୋକଙ୍କ ପାଇଁ ଓୟୋ ଏକ ସ୍ବତନ୍ତ୍ର ସ୍ଥାନ ହାସଲ କରିଥିଲା। କୋଭିଡ୍-୧୯ ଓ ଅନ୍ୟ କେତେକ ସମସ୍ୟା ଯୋଗୁ ଓୟୋ ବର୍ତ୍ତମାନ ନିବେଶକ ସନ୍ଧାନରେ ରହିଛି ବୋଲି ବିଶେଷ ସୂତ୍ରରୁ ଜଣାପଡ଼ିଛି।
