ଭଦ୍ରକ ଅଫିସ, ୨୭।୧୨: ଭଦ୍ରକ ପୌରପାଳିକାରେ ଫେରିଛି ମାଇକ୍ରୋ କଣ୍ଟେନମେଣ୍ଟ ଜୋନ୍ ବ୍ୟବସ୍ଥା। ଗତ ୧୮ ତାରିଖରେ ସାଉଦି ଆରବରୁ ଫେରିଥିବା ଜଣେ ଯୁବକ କରୋନା ପଜିଟିଭ୍ ଚିହ୍ନଟ ହେବା ପରେ ଜିଲା ମୁଖ୍ୟ ଚିକିତ୍ସାଳୟର କୋଭିଡ୍ ୱାର୍ଡରେ ଭର୍ତ୍ତି ହୋଇଛନ୍ତି। ଓମିକ୍ରନ ଭାରିଆଣ୍ଟ ଆକ୍ରାନ୍ତ କି ନାହିଁ ପରୀକ୍ଷା ପାଇଁ ନମୁନା ଭୁବନେଶ୍ୱର ପଠାଯାଇଛି। ଏନେଇ ପୌରପାଳିକା ପକ୍ଷରୁ ୧୮ ନଂ ୱାର୍ଡର ମୁଲନାସାହିରେ ନିର୍ଦ୍ଦିଷ୍ଟ ଭାବେ ଦୁଇଟି ଘରକୁ ମାଇକ୍ରୋ କଣ୍ଟେନମେଣ୍ଟ ଜୋନ୍ ଘୋଷଣା କରାଯାଇ ରବିବାର ବିଶୋଧନ କରାଯାଇଛି। ଉକ୍ତ ପରିବାର ଓ ପଡ଼ୋଶୀ ପରିବାରର ସମସ୍ତ ସଦସ୍ୟଙ୍କ ନମୁନା ମଧ୍ୟ ସଂଗ୍ରହ କରାଯାଇ ପରୀକ୍ଷା ପାଇଁ ଭୁବନେଶ୍ୱର ପଠାଯାଇଥିବା ପୌରପାଳିକା କାର୍ଯ୍ୟନିର୍ବାହୀ ଅଧିକାରୀ ଦେବୀପ୍ରସାଦ ରାଉତ ସୂଚନା ଦେଇଛନ୍ତି।
ତାରିଖ ସୁଦ୍ଧା ଜିଲାକୁ ୧୯୩ ଜଣ ବିଦେଶ ଫେରନ୍ତା ଆସିଥିବା ବେଳେ ସେମାନଙ୍କ ମଧ୍ୟରୁ ୨୭ ଜଣ ରେଡ୍ ଜୋନ୍ରୁ ଫେରିଥିବା ପ୍ରଶାସନ ନିକଟରେ ଖବର ରହିଛି। ସଂକ୍ରମଣ ଆଶଙ୍କାରେ ସେମାନଙ୍କ ଉପରେ ନଜର ରଖାଯାଇ ୧୫ ଦିନ ବ୍ୟବଧାନରେ ଦୁଇଥର ପରୀକ୍ଷା ଓ ସଂଗରୋଧରେ ରହିବା ପାଇଁ ନିର୍ଦ୍ଦେଶ ଦିଆଯାଇଥିବା ସିଡିଏମ୍ଓ ଡା. ସନ୍ତୋଷ କୁମାର ପାତ୍ର କହିଛନ୍ତି। ସେମାନଙ୍କ ମଧ୍ୟରୁ ୧୮୬ ଜଣଙ୍କୁ ପ୍ରଶାସନ ଚିହ୍ନଟ କରିଥିବା ବେଳେ ୭ ଜଣଙ୍କ କୌଣସି ତଥ୍ୟ ମିଳିପାରି ନ ଥିବା ଏବଂ ବର୍ତ୍ତମାନ ସୁଦ୍ଧା ୫୯ ଜଣ ସଂଗରୋଧରେ ରହିଥିବା କୁହାଯାଇଛି।
