ଲସ୍ ଏଞ୍ଜେଲ୍ସ, ୩୧ା୮(ଆଇଏନ୍ଏସ୍): ପପ୍ ଡ୍ୟାନ୍ସର ମାଇକେଲ ଜ୍ୟାକ୍ସନଙ୍କ ମୃତ୍ୟୁ ଉପରେ ପ୍ରକାଶିତ ନୂଆ ଡକ୍ୟୁମେଣ୍ଟାରିରେ ଚକିତ କଲାଭଳି ତଥ୍ୟ ପ୍ରଘଟ ହୋଇଛି। ଅତ୍ୟଧିକ ଡ୍ରଗ୍ସ ସେବନ ଯୋଗୁ ୨୦୦୯ରେ ୫୦ ବର୍ଷୀୟ ମାଇକେଲଙ୍କ ମୃତ୍ୟୁ ଘଟିଥିବା କୁହାଯାଉଥିବାବେଳେ ସେ ଏହି ନିଶାଦ୍ରବ୍ୟ ପାଇବା ପାଇଁ ନକଲି ପରିଚୟ ପ୍ରସ୍ତୁତ କରିଥିବା ସଦ୍ୟ ପ୍ରକାଶିତ ରିପୋର୍ଟରୁ ଜଣାପଡ଼ିଛି। ଗୋଟିଏ କି ଦୁଇଟି ନୁହେଁ ଡ୍ରଗ୍ସ କିଣିବା ନିମନ୍ତେ ସେ ୧୯ଟି ଜାଲ୍ ଆଇଡି ରଖିଥିଲେ। ତାଙ୍କ ଡାକ୍ତର କନ୍ରାଡ ମୁରେ ନିୟମିତ ଭାବେ ମାଇକେଲ୍ଙ୍କୁ ପ୍ରୋପୋଫୋଲ୍ (ଏକ ପ୍ରକାର ଡ୍ରଗ୍ସ) ଦେଉଥିଲେ। ମାଇକେଲ୍ଙ୍କ ମୃତ୍ୟୁ ପରେ ଏହାକୁ ଏକ ହତ୍ୟାକାଣ୍ଡ ବୋଲି କୁହାଯାଇଥିଲା। ଡା. ମୁରେଙ୍କୁ ଏଥିପାଇଁ ଦାୟୀ କରାଯିବା ସହ ୪ ବର୍ଷ ଜେଲଦଣ୍ଡ ହୋଇଥିଲା।
ଇନ୍ଭେଷ୍ଟିଗେଟ୍ସ: ହୁ ରିଅଲି କିଲ୍ଡ ମାଇକେଲ୍ ଜ୍ୟାକ୍ସନ’ ଡକ୍ୟୁମେଣ୍ଟାରି ଅନୁସାରେ, ମାଇକେଲ୍ଙ୍କ ମୃତ୍ୟୁ ପାଇଁ କେବଳ ମୁରେଙ୍କୁ ଦାୟୀ କରାଯାଇଥିଲା। କିନ୍ତୁ ବାସ୍ତବରେ ମାଇକେଲ୍ ତାଙ୍କ ଜୀବନ ସାରା ଅତ୍ୟଧିକ ମାତ୍ରାରେ ଡ୍ରଗ୍ସ ନେଉଥିଲେ, କାରଣ ଏହା ପଛରେ ଅନେକ ଡାକ୍ତରଙ୍କ ସମର୍ଥନ ଥିଲା। କେବଳ ମୁରେଙ୍କୁ ଜେଲଦଣ୍ଡ ହୋଇଥିଲେ ମଧ୍ୟ ଏଯାବତ୍ ଅନ୍ୟ କୌଣସି ଡାକ୍ତର ଦିନେ ହେଲେ କାରାଦଣ୍ଡ ଭୋଗିନାହାନ୍ତି। ମାଇକେଲ୍ଙ୍କ ମୃତ୍ୟୁ ସମୟରେ ସେଠାରେ ମୁରେ ଉପସ୍ଥିତ ଥିବାରୁ ତାଙ୍କ ଉପରେ ହିଁ ଅଙ୍ଗୁଳି ଉଠିଥିଲା ବୋଲି ଏହି ପପ୍ କିଙ୍ଗ୍ଙ୍କ ମାମଲାର ତଦନ୍ତ କରୁଥିବା ଡିଟେକ୍ଟିଭ୍ ଓର୍ଲାଣ୍ଡୋ ମାର୍ଟିନେଜ୍ ଉକ୍ତ ଡକ୍ୟୁମେଣ୍ଟାରିରେ କହିଛନ୍ତି। ଦୀର୍ଘ ବର୍ଷ ଧରି ମାଇକେଲ ନିଜ ସର୍ତ୍ତ ଅନୁସାରେ ଜୀବନ ବଞ୍ଚୁଥିଲେ। ଏଥିପାଇଁ ସେ ବିଭିନ୍ନ ବିଭାଗର ମେଡିକାଲ ପ୍ରଫେସନାଲଙ୍କୁ ରଖିଥିଲେ। ମାଇକେଲ ଯେତେବେଳେ ଯେଉଁ ମେଡିସିନ୍ ଚାହୁଁଥିଲେ ତାହା ତାଙ୍କୁ ଦିଆଯାଉଥିଲା। ଏହା ହିଁ ତାଙ୍କୁ ମୃତ୍ୟୁ ଆଡ଼କୁ ଟାଣିନେଇଥିଲା। ମୃତ୍ୟୁଦିନ ମଧ୍ୟ ମାଇକେଲ ଏକ ବୋତଲ ଭର୍ତ୍ତି ପରିମାଣର ପ୍ରୋପୋଫୋଲ ନେଇଥିଲେ। ସ୍ଥିତି ଏପରି ହୋଇଥିଲା ଯେ, ମାଇକେଲ୍ ପ୍ରୋପୋଫୋଲ୍ ନେବା ପରେ ହିଁ ତାଙ୍କୁ ନିଦ ହେଉଥିଲା। ଡାକ୍ତରମାନେ ବିଶ୍ୱର ବିଭିନ୍ନ ସ୍ଥାନରୁ ତାଙ୍କ ପାଇଁ ଡ୍ରଗ୍ସ ଯୋଗାଡ଼ କରି ଇଞ୍ଜେକ୍ସନ କିମ୍ବା ଔଷଧ ଆକାରରେ ଦେଉଥିଲେ। ଏହା କ୍ଷତିକାରକ ନୁହେଁ ବୋଲି ମଧ୍ୟ ତାଙ୍କ ଡାକ୍ତରମାନେ ମାଇକେଲ୍ଙ୍କୁ କହି ଡ୍ରଗ୍ସ ବ୍ୟବହାରର ଅନୁମତି ଦେଇଥିଲେ। ମାଇକେଲ୍ ଏକସଙ୍ଗରେ ୩୦୦ ମିଲିଗ୍ରାମ୍ର ଡେମିରୋଲ ନେଉଥିଲେ। ବିଭିନ୍ନ ପ୍ରକାର ଡ୍ରଗ୍ସ ପାଇଁ ମାଇକେଲ୍ ୧୯ ନକଲି ପରିଚୟପତ୍ର ପ୍ରସ୍ତୁତ କରିଥିଲେ। ଜଣାଶୁଣା ଚର୍ମବିଭାଗ ଡାକ୍ତର ଆର୍ନୋଲ୍ଡ କ୍ଲେନ୍ ଏସବୁର ତଦାରଖ କରୁଥିଲେ। ଡା. କ୍ଲେନ୍ ଏକ ନୋଟ୍ ବୁକ୍ ରଖି ସେଥିରେ କେଉଁ ଆଇଡିରେ କେଉଁ ପ୍ରକାର ଡ୍ରଗ୍ସ ମଗାଯାଇଛି ତାହା ଲେଖି ରଖୁଥିଲେ ବୋଲି ରିପୋର୍ଟରୁ ଜଣାପଡ଼ିଛି।
