ଇଷ୍ଟ ରଦରଫୋର୍ଡ (ଆମେରିକା),୧୮।୬: ଫୁଟ୍ବଲ ସୁପର ଷ୍ଟାର ଲିଓନେଲ ମେସିଙ୍କ ହାଟ୍ରିକ୍ ଗୋଲ ବଳରେ ଡିଫେଣ୍ଡିଂ ଚାମ୍ପିୟନ ଆର୍ଜେଣ୍ଟିନା ୩-୦ ଗୋଲରେ ଆଲ୍ଜେରିଆକୁ ପରାସ୍ତ କରିଛି। ଏହି ମ୍ୟାଚ୍ ମେସିଙ୍କ ଲାଗି ଐତିହାସିକ ସାବ୍ୟସ୍ତ ହୋଇଛି। ଏହି ମ୍ୟାଚ୍ ଜରିଆରେ ମେସି ବିଶ୍ୱକପ୍ ଇତିହାସରେ ପ୍ରଥମ ଖେଳାଳି ଭାବେ ୬ଷ୍ଠ ଫିଫା ବିଶ୍ୱକପ୍ରେ ଖେଳିଛନ୍ତି। ହାଟ୍ରିକ୍ ଯୋଗୁ ବିଶ୍ୱକପ୍ରେ ତାଙ୍କ ଗୋଲ ସଂଖ୍ୟା ୧୬ରେ ପହଞ୍ଚତ୍ଛି। ବିଶ୍ୱକପ୍ ଇତିହାସରେ ସର୍ବାଧିକ ସଂଖ୍ୟକ ଗୋଲ ସ୍କୋର କରିଥିବା ଖେଳାଳିଙ୍କ ତାଲିକାରେ ମେସି ବ୍ରାଜିଲର ମହାନ୍ ଫୁଟ୍ବଲର ରୋନାଲ୍ଡୋଙ୍କୁ ପଛରେ ପକାଇ ଜର୍ମାନୀର ଲିଜେଣ୍ଡ ମିରୋସ୍ଲାଭ କ୍ଲୋଜଙ୍କ ସମକକ୍ଷ ହୋଇଛନ୍ତି। ୧୯୯୪ରୁ ୨୦୦୬ ପର୍ଯ୍ୟନ୍ତ ଖେଳିଥିବା ରୋନାଲ୍ଡୋ ୪ଟି ବିଶ୍ୱକପ୍ ସଂସ୍କରଣରେ ୧୫ ଗୋଲ କରିଥିବା ବେଳେ ୨୦୦୨ରୁ ୨୦୧୪ ମଧ୍ୟରେ ୪ ବିଶ୍ୱକପ୍ରେ କ୍ଲୋଜ୍ ୧୬ ଗୋଲ କରିଥିଲେ। ୩୮ ବର୍ଷ ଓ ୩୫୭ ଦିନ ବୟସରେ ମେସି ବିଶ୍ୱକପ୍ରେ ବୟୋଜ୍ୟେଷ୍ଠ ଖେଳାଳି ଭାବେ ହାଟ୍ରିକ କରିବାର ରେକର୍ଡ ମଧ୍ୟ ନିଜ ନାମରେ କରିଛନ୍ତି। ଏହି ରେକର୍ଡ ପୂର୍ବରୁ ପର୍ତ୍ତୁଗାଲର କ୍ରିଷ୍ଟିଆନୋ ରୋନାଲ୍ଡୋଙ୍କ ନାମରେ ଥିଲା। ସେ ୨୦୧୮ ବିଶ୍ୱକପ୍ରେ ୩୩ ବର୍ଷ ଓ ୧୩୦ ଦିନ ବୟସରେ ସ୍ପେନ୍ ବିପକ୍ଷ ମ୍ୟାଚ୍ରେ ହାଟ୍ରିକ୍ ଗୋଲ ଦେଇଥିଲେ।
