ପୁରୀ ଅଫିସ,୧୬।୧: ରାଜ୍ୟରେ ପଞ୍ଚାୟତ ନିର୍ବାଚନ ବିଗୁଲ ବାଜିବା ପରେ ଶନିବାର ରାଜ୍ୟର ସମସ୍ତ ପୌରପାଳିକାର ଅଧ୍ୟକ୍ଷ ଆସନ ସଂରକ୍ଷଣ ସମ୍ପର୍କିତ ବିଜ୍ଞପ୍ତି ପ୍ରକାଶ ପାଇଛି। ଏହି ବିଜ୍ଞପ୍ତି ଅନୁଯାୟୀ ପୁରୀ ପୌରପାଳିକାର ଅଧ୍ୟକ୍ଷ ପଦବୀ ମହିଳାଙ୍କ ନିମନ୍ତେ ସଂରକ୍ଷଣ ରହିଛି। ଯାହାକୁ ନେଇ ପୁରୀରେ ବିଭିନ୍ନ ରାଜନୈତିକ ମହଲରେ ମିଶ୍ରିତ ପ୍ରତିକ୍ରିୟା ଦେଖିବାକୁ ମିଳିଛି। ବିଶେଷ କରି ବହୁଦିନରୁ ଚେୟାରମ୍ୟାନ ନିମନ୍ତେ ଆଶାୟୀ ଥିବା ପୁରୁଷ ପ୍ରାର୍ଥୀମାନେ ସରକାରଙ୍କ ଏପରି ନିଷ୍ପତ୍ତିକୁ ବିରୋଧ କରିବା ସହ ପ୍ରତ୍ୟାହର ଦାବି କରିଛନ୍ତି।
ପୁରୀ ପୌରସଂସ୍ଥାର ଅଧ୍ୟକ୍ଷ ପଦ ମହିଳା ସଂରକ୍ଷଣକୁ ନେଇ ପୁରୀ ଏମ୍ପିଙ୍କ ପ୍ରତିନିଧି ଘନଶ୍ୟାମ ମର୍ଦ୍ଦରାଜ ବିରୋଧ କରି କହିଛନ୍ତି, ପୁରୀ ଦେଶର ଏକ ପ୍ରମୁଖ ସ୍ଥଳ। ଚାରି ଧାମ ମଧ୍ୟରେ ଅନ୍ୟତମ। ସରକାର ପୁରୀର ଉନ୍ନତି ପାଇଁ ସର୍ବଦା ଚେଷ୍ଟା କରି ଆସୁଛନ୍ତି। ତେଣୁ ପୁରୀ ପୌରସଂସ୍ଥାର ଅଧ୍ୟକ୍ଷ ପଦ ମହିଳାଙ୍କ ପାଇଁ ସଂରକ୍ଷଣ କରିବା ପରିବର୍ତ୍ତେ ସାଧାରଣଙ୍କ ନିମନ୍ତେ କରାଗଲେ ପୁରୀର ଅନେକ ଉନ୍ନତି ହୋଇପାରିବ। ଏହି ନିଷ୍ପତ୍ତି ବିରୋଧରେ ସରକାରଙ୍କୁ ଆପତ୍ତି ଜଣାଇବେ ବୋଲି ସୂଚନା ଦେଇଛନ୍ତି। ସରକାରଙ୍କ ଏହି ନିଷ୍ପତ୍ତିକୁ ଜିଲା ବିଜେଡି ମହିଳା ସଭାନେତ୍ରୀ ତଥା ପୁରୀ ପୌରପାଳିକାର ପୂର୍ବତନ ଚେୟାରମ୍ୟାନ ଶାନ୍ତିଲତା ପ୍ରଧାନ ସ୍ବାଗତ କରିଛନ୍ତି। ମୁଖ୍ୟମନ୍ତ୍ରୀ ସର୍ବଦା ମହିଳାଙ୍କୁ ଗୁରୁତ୍ୱ ଦେଇ ଆସୁଛନ୍ତି। ତେଣୁ ପୁରୀର ଉନ୍ନତି ପାଇଁ ପୁନର୍ବାର ମହିଳାଙ୍କ ଉପରେ ଆସ୍ଥାପ୍ରକଟ କରିଥିବାରୁ କୃତଜ୍ଞତା ଜଣାଉଛି। ଭାଜପା ଜିଲା ମହିଳା ମୋର୍ଚ୍ଚା ସଭାନେତ୍ରୀ ଜ୍ୟୋତି ମହାପାତ୍ର ସରକାରଙ୍କ ନିଷ୍ପତ୍ତିକୁ ସ୍ବାଗତ କରିଛନ୍ତି। କେନ୍ଦ୍ର ଏବଂ ରାଜ୍ୟ ସରକାର ମହିଳାଙ୍କୁ ଆଗ୍ରାଧିକାର ଦେଉଛନ୍ତି। ପ୍ରଦେଶ କଂଗ୍ରେସର ମୁଖପାତ୍ର ବିନାୟକ ଦାସ ମହାପାତ୍ର ବିରୋଧ କରି କହିଛନ୍ତି ଏ ନେଇ ଦଳ ପକ୍ଷରୁ ଜିଲାପାଳଙ୍କୁ ଭେଟି ଆପତ୍ତି ଜଣାଇବ। ପୁରୀରେ ଅନେକ ସମସ୍ୟା ରହିଛ, ତେଣୁ ଏଠାରେ ମହିଳାଙ୍କୁ ଚେୟାରମ୍ୟାନ କରା ନ ଯାଇ ପୁରୁଷଙ୍କୁ ଅଗ୍ରାଧିକାର ଦେବା ଆବଶ୍ୟକ। ମାତ୍ର ସରକାର ପଞ୍ଚାୟତ ନିର୍ବାଚନ ଭଳି ନିଜ ସ୍ବାର୍ଥ ରଖି ଏପରି ସଂରକ୍ଷଣ କରିଛନ୍ତି।
