ଖୋର୍ଦ୍ଧା ଅଫିସ,୧।୨: ଖୋର୍ଦ୍ଧା ଜିଲା ଜଟଣୀ ସହରରେ ରବିବାର ସନ୍ଧ୍ୟାରେ ‘ଧରିତ୍ରୀ’ ଖବରଦାତା ରବୀନ୍ଦ୍ର ନାଥ ମହାକୁଡ଼ଙ୍କୁ ଗାଳିଗୁଲଜ ଓ ଆକ୍ରମଣ କରାଯିବା ଘଟଣାକୁ ନେଇ ବିଭିନ୍ନ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି। ସୋମବାର ଏକାଧିକ ଗଣମାଧ୍ୟମ ପ୍ରତିନିଧି ଜଟଣୀ ଥାନା ଆଗରେ ଧାରଣା ଦେବା ସହ ସମ୍ମନ୍ବିତ କର୍ମଜୀବୀ ସାମ୍ବାଦିକ ସଂଘ(ଓୟୁଡବ୍ଲ୍ୟୁଜେ) ଖୋର୍ଦ୍ଧା ଜିଲା ଶାଖା ପକ୍ଷରୁ ଜିଲାପାଳ ସଂଗ୍ରାମ କେଶରୀ ମହାପାତ୍ରଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ଆକ୍ରମଣକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଏବଂ କୋଭିଡ୍ ଗାଇଡ୍ଲାଇନ ଉଲ୍ଲଂଘନ ନେଇ ଜଟଣୀ ରାମଚନ୍ଦ୍ରପୁର ବଜାର ସ୍ଥିତ ମୋର ସୁପରମାର୍କେଟ (ଶପିଂ ମଲ୍) ସିଲ୍ କରିବା ପାଇଁ ଦାବି ହୋଇଛି। ଏହି ଘଟଣାର ନିରପେକ୍ଷ ତଦନ୍ତ ସହ ସିସିଟିଭି ଯାଞ୍ଚ କରାଯିବ ବୋଲି ଡିସିପି ଉମାଶଙ୍କର ଦାଶ କହିଛନ୍ତି।
ଅଭିଯୋଗ ଅନୁଯାୟୀ, ରାଜ୍ୟରେ କରୋନାର ତୃତୀୟ ଲହର ଜାରି ରହିଛି। ଏନେଇ ସରକାରଙ୍କ ପକ୍ଷରୁ କୋଭିଡ୍ ନିୟମକୁ କଡ଼ାକଡି କରାଯାଇଛି। ମାସ୍କ ପରିଧାନ ସହ ସାମାଜିକ ଦୂରତ୍ୱକୁ ବାଧ୍ୟତାମୂଳକ କରାଯାଇଛି। କୌଣସି ବ୍ୟବସାୟିକ ପ୍ରତିଷ୍ଠାନ, ଶପିଂ ମଲରେ କୋଭିଡ ନିୟମ ଉଲ୍ଲଂଘନ ହେଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲାପାଳ ନିର୍ଦ୍ଦେଶନାମା ଜାରି କରିଛନ୍ତି। ରବିବାର ଜଟଣୀ ରାମଚନ୍ଦ୍ରପୁର ବଜାର ସ୍ଥିତ ନୂତନ ମୋର ସୁପରମାର୍କେଟ (ଶପିଂ ମଲ୍) ଉଦ୍ଘାଟନ ବେଳେ ଶତାଧିକ ଲୋକ ଜମା ହେବା ସହ କୋଭିଡ୍ ନିୟମକୁ ଖୋଲାଖୋଲି ଉଲ୍ଲଂଘନ କରିଥିଲେ। ଏହି ସମୟରେ ଖବରଦାତା ମହାକୁଡ଼ ସେଠାରେ ପହଞ୍ଚି ଫଟୋ ଉଠାଉଥିଲେ। ଏହା ଦେଖି ଶୋ’ରୁମ୍ ମ୍ୟାନେଜର ଉତ୍କ୍ଷିପ୍ତ ହୋଇ ମହାକୁଡଙ୍କୁ ଗାଳିଗୁଲଜ କରିଥିଲେ। ସଙ୍ଗେ ସଙ୍ଗେ ଉକ୍ତ ମଲ୍ର କେତେଜଣ ବାଉନ୍ସର ପହଞ୍ଚି ମହାକୁଡ଼ଙ୍କ କ୍ୟାମେରା ଛଡ଼ାଇନେବା ସହ ଧକ୍କା ମାରିଥିଲେ। ସେଠାରେ ଉପସ୍ଥିତ କେତେଜଣ ଗ୍ରାହକ ଏହାର ବିରୋଧ କରିଥିଲେ ମଧ୍ୟ ବାଉନ୍ସରମାନେ ଶୁଣି ନ ଥିଲେ। କାର୍ଯ୍ୟରତ ଖବରଦାତାଙ୍କ ପ୍ରତି ଏଭଳି ବ୍ୟବହାର ଗ୍ରହଣୀୟ ନୁହଁ। ତୁରନ୍ତ ସମ୍ପୃକ୍ତ ଶପିଂ ମଲ କର୍ତ୍ତୃପକ୍ଷଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରା ନ ଗଲେ ଆଗାମୀ ଦିନରେ ସଂଘ ରାଜରାସ୍ତାକୁ ଓହ୍ଲାଇବାକୁ ବାଧ୍ୟ ହେବ ବୋଲି ଚେତାବନୀ ଦେଇଛି। ଏ ସମ୍ପର୍କରେ ଜିଲାପାଳ ମହାପାତ୍ର କହିଛନ୍ତି, ଘଟଣାର ତଦନ୍ତ କରାଯିବ ସହ କୋଭିଡ୍ ନିୟମ ଉଲ୍ଲଘଂନ ହୋଇଥିଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
