ସିଡ୍ନୀ, ୧୫।୮(ପି.ଟି.)- ଅଷ୍ଟ୍ରେଲିଆର ସିନିୟର ସହକାରୀ କୋଚ୍ ଆଣ୍ଡ୍ର୍ୟୁ ମ୍ୟାକଡୋନାଲ୍ଡ ଆସନ୍ତା ମାସରେ ଦଳସହ ଇଂଲଣ୍ଡ ଗସ୍ତରେ ଯାଇପାରିବେ ନାହିଁ। ପୂର୍ବ ପ୍ରତିଶ୍ରୁତି ଅନୁସାରେ ସେ ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ) ଫ୍ରାଞ୍ଚାଇଜ୍ ରାଜସ୍ଥାନ ରୟାଲ୍ସ ସହିତ ରହିବେ। ପୂର୍ବତନ ଅଷ୍ଟ୍ରେଲୀୟ ଅଲରାଉଣ୍ଡର ମ୍ୟାକ୍ଡୋନାଲ୍ଡ ଗତବର୍ଷ ରାଜସ୍ଥାନ ରୟାଲ୍ସର ମୁଖ୍ୟ କୋଚ୍ ନିଯୁକ୍ତ ହୋଇଛନ୍ତି। ପ୍ୟାଡି ଅପ୍ଟନଙ୍କ ସ୍ଥାନରେ ସେ ଏହି ଦାୟିତ୍ୱ ପାଇଛନ୍ତି। ଇଂଲଣ୍ଡ ଗସ୍ତରେ ଯାଇ ଅଷ୍ଟ୍ରେଲିଆ ସେପ୍ଟେମ୍ବର ୪ରୁ ୧୬ ପର୍ଯ୍ୟନ୍ତ ୩ଟି ଲେଖାଏ ଟି୨୦ ଓ ଦିନିକିଆ ମ୍ୟାଚ ଖେଳିବା କାର୍ଯ୍ୟକ୍ରମ ରହିଛି। ଆଇପିଏଲର ୧୩ତମ ସଂସ୍କରଣ ୟୁନାଇଟେଡ ଆରବ ଏମିରେଟ୍ସ(ୟୁଏଇ)ରେ ସେପ୍ଟେମ୍ବର ୧୯ରୁ ନଭେମ୍ବର ୧୦ ପର୍ଯ୍ୟନ୍ତ ଅନୁଷ୍ଠିତ ହେବ। ଏଥିରେ ଭାଗ ନେବାପାଇଁ ରୟାଲ୍ସ ଅଗଷ୍ଟ ୨୦ ପରେ ୟୁଏଇ ଯିବାର କାର୍ଯ୍ୟକ୍ରମ ରହିଛି। ତେଣୁ ଆଇପିଏଲ ଶେଷ ହେବାପରେ ଯାଇ ମ୍ୟାକଡୋନାଲ୍ଡ ଅଷ୍ଟ୍ରେଲିଆ ଦଳ ସହିତ ଯୋଗଦେଇ ପାରିବେ। ଡେଭିଡ ଓ୍ବାର୍ନର, ବେନ୍ ଷ୍ଟୋକ୍ସ, ଜୋଫ୍ରା ଆର୍ଚର, ଷ୍ଟିଭ୍ ସ୍ମିଥ ଏବଂ ପ୍ୟାଟ୍ କୁମିନ୍ସଙ୍କ ସମେତ ଇଂଲଣ୍ଡ ଓ ଅଷ୍ଟ୍ରେଲିଆର ଅନେକ ଖେଳାଳି ଆଇପିଏଲର ପ୍ରଥମ ସପ୍ତାହରେ ଖେଳି ପାରିବେ ନାହିଁ। ଟୁର୍ନାମେଣ୍ଟର ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର(ଏସଓପି) ଅନୁସାରେ ଖେଳାଳି ଏବଂ ଅଫିସିଆଲମାନେ ୟୁଏଇରେ ପହଞ୍ଚତ୍ବାପରେ ୬ ଦିନ କ୍ୱାରାଣ୍ଟାଇନ୍ରେ ରହିବା ବାଧ୍ୟତାମୂଳକ।
