ନୂଆଦିଲ୍ଲୀ,୨୬।୨: ଦିଲ୍ଲୀ ମ୍ୟୁନିସିପାଲ କର୍ପୋରେଶନ (ଏମ୍ସିଡି) ଷ୍ଟାଣ୍ଡିଂ କମିଟିର ୬ ସଦସ୍ୟଙ୍କ ପୁନଃ ନିର୍ବାଚନ ଉପରେ ଦିଲ୍ଲୀ ହାଇକୋର୍ଟ ଶନିବାର ସ୍ଥଗିତାଦେଶ ଲଗାଇଛନ୍ତି। ଫଳରେ ଶାସକ ଏଏପିକୁ ଶକ୍ତ ଝଟକା ଲାଗିଛି। ନିର୍ବାଚନ ନିୟମାବଳୀ ୫୧ରେ ଷ୍ଟାଣ୍ଡିଂ କମିଟି ନିର୍ବାଚନକୁ ବାତିଲ ଘୋଷଣା କରିବା ଅଧିକାର ମେୟରଙ୍କର ରହିଥିବା ଉଲ୍ଲେଖ କରାଯାଇ ନାହିଁ ବୋଲି ହାଇକୋର୍ଟ କହିଥିଲେ। ଶୁକ୍ରବାର ଏମ୍ସିଡି ଷ୍ଟାଣ୍ଡିଂ କମିଟି ନିର୍ବାଚନରେ ଗୋଟିଏ ଭୋଟକୁ ମେୟର ଶେଲି ଓବେରୟ ଅବୈଧ ଘୋଷଣା କରିଥିଲେ। ଏହାକୁ ଚ୍ୟାଲେଞ୍ଜ କରି ଭାଜପା କାଉନସିଲର ଶିଖା ରାୟ ଏବଂ କମଲଜିତ୍ ସେହରାଓ୍ବତ୍ ଦିଲ୍ଲୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଉକ୍ତ ପିଟିଶନ ଉପରେ ହାଇକୋର୍ଟ ଦିଲ୍ଲୀ ଉପରାଜ୍ୟପାଳ ଭି.କେ. ସାକ୍ସେନା ଏବଂ ମେୟର ଓବେରୟଙ୍କୁ ନୋଟିସ ଜାରି କରିଛନ୍ତି। ବାଲଟ ପେପର, ସିସିଟିଭି ଫୁଟେଜ ଏବଂ ଭୋଟିଂ ସମୟର ଅନ୍ୟାନ୍ୟ ତଥ୍ୟ ପ୍ରମାଣକୁ ସଂରକ୍ଷିତ ରଖିବା ଲାଗି ମେୟରଙ୍କୁ କୁହାଯାଇଛି। ସୂଚନାଯୋଗ୍ୟ, ଏମ୍ସିଡି ଷ୍ଟାଣ୍ଡିଂ କମିଟି ସଦସ୍ୟ ନିର୍ବାଚନରେ ଭୋଟ ପୁନଃଗଣନାକୁ ମେୟର ଶୁକ୍ରବାର ବନ୍ଦ କରିବା ପରେ ଏହାକୁ ନେଇ ଗୃହରେ ରଣକ୍ଷେତ୍ର ପାଲଟିଥିଲା। ଏଏପି ଏବଂ ଭାଜପା କାଉନସିଲରମାନେ ପରସ୍ପରକୁ ମୁଥ ଓ ଗୋଇଠା ମାରିବା ସହ ଚୁଟି ଘୋଷାଡିଥିଲେ। ଏହି ସଂଘର୍ଷ ବେଳେ କେତେଜଣଙ୍କ କୁର୍ତ୍ତା ଚିରିବା ସହ ଦୁଇଜଣ ସଦସ୍ୟ ତଳେ ପଡ଼ିଯାଇଥିଲେ। ଏପରିକି ମହିଳା ସଦସ୍ୟମାନେ ମଧ୍ୟ ଆକ୍ରମଣରୁ ବାଦ୍ ପଡ଼ି ନ ଥିଲେ। ମେୟର ଓବେରୟଙ୍କୁ ମଧ୍ୟ ଭାଜପା ଗୁଣ୍ଡାମାନେ ଆକ୍ରମଣ କରିଥିବା ଏଏପି ଅଭିଯୋଗ କରିଥିଲା।
