ବାରିପଦା ଅଫିସ,୧୧।୧୧: ମୟୂରଭଞ୍ଜ ଜିଲା ଭାଜପା ଯୁବ ମୋର୍ଚ୍ଚା ପକ୍ଷରୁ ବୁଧବାର ବାରିପଦା ସ୍ଥିତ ଏସ୍ପି ଅଫିସ ଘେରାଉ ସମୟରେ ଅଭାବନୀୟ ଘଟଣା ଘଟିଛି। ଭାଜପା କର୍ମୀମାନେ ପୋଲିସ ଉପରକୁ ଅଣ୍ଡାମାଡ଼ କରିଥିବା ବେଳେ ଠେଲାପେଲାରେ ୨ଜଣ କର୍ମୀ ଆହତ ହୋଇଛନ୍ତି। ପୋଲିସ ଉପରକୁ ଏଭଳି ଅଣ୍ଡାମାଡ଼ ଘଟଣାକୁ ଜିଲାର ବିଭିନ୍ନ ମହଲରୁ ନିନ୍ଦା କରାଯାଇଛି। ଭାଜପା ପକ୍ଷରୁ ଏହାକୁ ଅସ୍ବୀକାର କରାଯାଇଥିବା ବେଳେ ଜିଲା ରାଜନୀତି ସରଗରମ ହେବାରେ ଲାଗିଛି।
ସୂଚନା ଅନୁଯାୟୀ, ଗତ ୨୨ ତାରିଖରେ ମୁଖ୍ୟମନ୍ତ୍ରୀଙ୍କ ବାରିପଦା ଗସ୍ତ ସମୟରେ ଭାଜପା କର୍ମୀଙ୍କୁ ବିଜେଡି କର୍ମୀମାନେ ମାଡ଼ ମାରିଥିବା ଅଭିଯୋଗ ହୋଇଥିଲା। ଏହି ଘଟଣାରେ ଦୋଷୀଙ୍କ ଗିରଫ ଦାବି ଓ ମମିତା ମେହେରଙ୍କୁ ନ୍ୟାୟ ଦାବିରେ ଭାଜପା ଯୁବ ମୋର୍ଚ୍ଚାର ଶତାଧିକ କର୍ମକର୍ତ୍ତା ମଧୁବନଠାରୁ ଏକ ରାଲିରେ ଆସି ଏସ୍ପି ଅଫିସ ସମ୍ମୁଖରେ ପହଞ୍ଚିିଥିଲେ। କାର୍ଯ୍ୟାଳୟଠାରୁ ଶହେ ମିଟର ଦୂର ଉଭୟ ପାର୍ଶ୍ୱରେ ବ୍ୟାରିକେଡ୍ ନିର୍ମାଣ କରାଯାଇ ପୋଲିସ ଛାଉଣି କରାଯାଇଥିଲା। ଫଳରେ ବିକ୍ଷୋଭକାରୀମାନେ କାର୍ଯ୍ୟାଳୟ ମଧ୍ୟକୁ ପ୍ରବେଶ କରିପାରି ନ ଥିଲେ। ବାରିପଦା, ସାରସକଣା, ଉଦଳା ଓ ବଡ଼ସାହି ବିଧାୟକଙ୍କ ସହ ବରିଷ୍ଠ ଭାଜପା ନେତୃବୃନ୍ଦ ଏସ୍ପିଙ୍କୁ ଭେଟି ଦାବିପତ୍ର ପ୍ରଦାନ କରିବେ ବୋଲି କହିବାରୁ ପୋଲିସ କର୍ମଚାରୀମାନେ ପ୍ରତିରୋଧ କରିଥିଲେ। ଏହାକୁ ନେଇ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା। ପୋଲିସ ସହ ଠେଲାପେଲା ପରେ ଭାଜପା କର୍ମୀମାନେ ଅଣ୍ଡା ମାଡ଼ କରିଥିଲେ। ତେବେ ଏହି ଅଣ୍ଡା ମାଡ଼ ଘଟଣାକୁ ଭାଜପା ପକ୍ଷରୁ ଖଣ୍ଡନ କରାଯାଇଛି। ଭାଜପା ଜିଲା (ପୂର୍ବ) ସଭାପତି କାନ୍ଦରା ସୋରେନ କୁହନ୍ତି ଶାନ୍ତିଶୃଙ୍ଖଳାର ସହ ଦାବିପତ୍ର ଦେବାକୁ ଯାଉଥିବା ଭାଜପା କର୍ମୀମାନେ ଅଣ୍ଡା ମାଡ଼ ଘଟଣାରେ ଜଡ଼ିତ ନାହାନ୍ତି। ଅବସରପ୍ରାପ୍ତ ଏସ୍ପି ବ୍ରହ୍ମାନନ୍ଦ ଦଣ୍ଡପାଟ କୁହନ୍ତି, କର୍ତ୍ତବ୍ୟରତ ପୋଲିସ କର୍ମଚାରୀଙ୍କ ଉପରକୁ ଅଣ୍ଡାମାଡ଼ କରିବା ଅତ୍ୟନ୍ତ ନିନ୍ଦନୀୟ। ପୋଲିସ ନିଜର କର୍ତ୍ତବ୍ୟ ସମ୍ପାଦନ କରୁଥିବା ବେଳେ ଅଣ୍ଡା ମାଡ଼ କରି ଆନ୍ଦୋଳନକାରୀ କେବେ ସେମାନଙ୍କ ଉଦ୍ଦେଶ୍ୟ ସଫଳ କରିପାରିବେ ନାହିଁ। ଆଇନଜୀବୀ ପରମାନନ୍ଦ ଷଡ଼ଙ୍ଗୀ କୁହନ୍ତି, ପ୍ରତ୍ୟେକ ଘଟଣାକୁ ନେଇ ଆଇନ ବ୍ୟବସ୍ଥା ରହିଥିବା ବେଳେ ପୋଲିସ ନିରପେକ୍ଷ ଭାବେ କାର୍ଯ୍ୟ କରୁଛି। ମମିତା ମେହେର ହତ୍ୟା ଘଟଣାର ତଦନ୍ତ ଜାରି ରହିଥିବା ବେଳେ ଆଇନର ରକ୍ଷକଙ୍କ ଉପରେ ଏପରି ଅଶୋଭନୀୟ ଆଚରଣକୁ ସେ ନିନ୍ଦା କରିଛନ୍ତି।
