ପଦ୍ମପୁର,୭।୧୨(ଡି.ଏନ.ଏ.): ବର୍ତ୍ତମାନ ସାରା ରାଜ୍ୟର ଆଖି ପଦ୍ମପୁର ଉପନିର୍ବାଚନ ଉପରେ କେନ୍ଦ୍ରୀଭୂତ ହୋଇରହିଛି। ବିଭିନ୍ନ ଦୃଷ୍ଟିରୁ ଏହି ଉପନିର୍ବାଚନ ନିଜର ପୁରୁଣା ରେକର୍ଡ ଭାଙ୍ଗିଛି। ଏଥର ଦୁଇ ନମ୍ବର ଉପନିର୍ବାଚନର ସମ୍ମୁଖୀନ ହୋଇଥିବା ପଦ୍ମପୁର ନିର୍ବାଚନ ମଣ୍ଡଳୀର ଭୋଟର ସର୍ବାଧିକ ୮୧.୨୯ % ପ୍ରତିଶତ ମତଦାନ କରିଛନ୍ତି। ଯାହାକି ନିର୍ବାଚନ ମଣ୍ଡଳୀ ପାଇଁ ସର୍ବକାଳୀନ ରେକର୍ଡ।
ଗତ ୨୦୦୪ ସାଧାରଣ ନିର୍ବାଚନରେ ୭୪.୦୯%, ୨୦୦୯ରେ ୭୫.୫୧ %, ୨୦୧୪ରେ ୭୯.୧୬ % ଏବଂ ୨୦୧୯ ନିର୍ବାଚନରେ ୭୯.୧୬ % ମତଦାନ ହୋଇଥିବା ବେଳେ ଏଥର ସେହିସବୁ ରେକର୍ଡକୁ ଭାଙ୍ଗିଛି। ସୋମବାର ସକାଳୁ ଦିନ ୧୧ଟା ଯାଏ ଭୋଟ୍ ହାର ଅତି ମାନ୍ଦା ରହିଥିଲା। କିନ୍ତୁ ଦିନ ୧୧ଟା ପରେ ମତଦାନ ବଢିଥିଲା। ଏହା ପୂର୍ବରୁ ପ୍ରାର୍ଥୀ ସଂଖ୍ୟାରେ ମଧ୍ୟ ଉପନିର୍ବାଚନ ନିଜସ୍ବ ରେକର୍ଡ ଭାଙ୍ଗିଛି । ୧୯୫୪ ଉପନିବାଚନରେ କେବଳ କଂଗ୍ରେସ ଓ ଗଣପରିଷଦର ଦୁଇ ଜଣ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରିଥିବା ବେଳେ ଏଥର କିନ୍ତୁ ମଇଦାନରେ ୧୦ ଜଣ ପ୍ରାର୍ଥୀ ନିର୍ବାଚନ ଲଢିଛନ୍ତି । ସେହିପରି ଏଥର ପଦ୍ମପୁର ନିର୍ବାଚନ ମଣ୍ଡଳୀରେ ପ୍ରଥମ ଥର ମହିଳା ପ୍ରାର୍ଥୀ ହୋଇଛନ୍ତି। ଆଶାରୁ ବେଶୀ ୮୧.୨୯ % ପୋଲିଂ ରେକର୍ଡ ସୃଷ୍ଟି କରିଛି। ମୋଟ ୨ଲକ୍ଷ ୫୭ ହଜାର ୪୭୪ ଭୋଟରରୁ ୨ ଲକ୍ଷ ୯ ହଜାର ୩୦୩ ଜଣ ନିଜର ମତଦାନ ସାବ୍ୟସ୍ତ କରିଛନ୍ତି। ସବୁଠାରୁ ବେଶୀ ଝାରବନ୍ଧ ବ୍ଲକରେ ୮୩.୮୧% ମତଦାନ ହୋଇଥିବା ବେଳେ ପଦ୍ମପୁର ଏନ୍ଏସିରେ ସର୍ବନିମ୍ନ ୬୯.୧୪% ମତଦାନ ହୋଇଛି। ଝାରବନ୍ଧ ବ୍ଲକର ୬୦,୫୬୬ ମତଦାତାଙ୍କ ମଧ୍ୟରୁ ୫୦,୭୬୨ ଜଣ (୮୩.୮୧%) ମତଦାନ କରିଥିଲେ। ସେହିପରି ପାଇକମାଳ ବ୍ଲକରେ ୮୯,୨୯୮ ଭୋଟରଙ୍କ ମଧ୍ୟରୁ ୭୨,୭୧୦ (୮୧.୪୨%)ଜଣ ମତଦାନ କରିଛନ୍ତି। ପଦ୍ମପୁର ରାଜବୋଡାସମ୍ବର ବ୍ଲକରେ ୯୩,୯୩୬ ମଧ୍ୟରୁ ୭୬,୩୮୩ (୮୧.୩୧%) ଓ ପଦ୍ମପୁର ଏନ୍ଏସିରେ ୧୩,୬୩୪ ଭୋଟର ମଧ୍ୟରୁ ୯,୪୫୪ (୬୯.୧୪%) ମତଦାନ କରିଥିବା ପଦ୍ମପୁର ଉପଜିଲାପାଳ ତଥା ରିଟର୍ନିଂ ଅଫିସର ତ୍ରିଲୋଚନ ପାତ୍ର ସୂଚନା ଦେଇଛନ୍ତି। ମତଦାନ ହାର ଯାହା ହେଉ ନା କାହିଁକି ଆସନ୍ତା ୮ ତାରିଖ ଉପରେ ସମସ୍ତଙ୍କ ନଜର ରହିଛି।
