ଚମ୍ପୁଆ, ୨୮।୮(ଡି.ଏନ.ଏ.): ୧୯୫୪ ମସିହାରେ ସ୍ଥାପିତ ମଥୁରାପୁର ସରକାରୀ ବିଦ୍ୟାଳୟର ସମସ୍ୟା ଦିନକୁ ଦିନ ବଢିବାରେ ଲାଗିଛି। ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରଙ୍କୁ ଶିକ୍ଷାଦାନ କରୁଥିବା ଏହି ବିଦ୍ୟାଳୟ ଆନୁଷଙ୍ଗିକ ଅବ୍ୟବସ୍ଥା ପାଇଁ ତାର ଗାରିମା ହରାଇ ଚାଲିଛି। ଟାଇଲ ଛପର ଘରେ ଶିକ୍ଷାଦାନ ଦିଆ ହୋଇ ଆସୁଥିବା ବେଳେ ପ୍ରାୟ ୧୦ ବର୍ଷ ପୂର୍ବରୁ ବିଭାଗ ପକ୍ଷରୁ ଛାତ୍ରୀଛାତ୍ରଙ୍କ ଶିକ୍ଷାଦାନ ପାଇଁ ଏକ ଛାତ ଘର ନିର୍ମାଣ କରାଯାଇଥିଲା। ହେଲେ ନିମ୍ନମାନର ନିର୍ମାଣ ଯୋଗୁ ଛାତରୁ ପ୍ଲାଷ୍ଟର ଖସି ରଡ୍ ଦେଖାଯାଉଛି। ବର୍ଷା ହେଲେ ଘର ଭିତରେ ବର୍ଷାଜଳ ଲହଡ଼ି ମାରୁଥିବାରୁ ବିଦ୍ୟାଳୟର ଶିକ୍ଷୟିତ୍ରୀଶିକ୍ଷକମାନେ ଉକ୍ତ ଘରକୁ ଅସୁରକ୍ଷିତ ମନେକରି ଦୀର୍ଘ ଦିନରୁ ନିର୍ମାଣ ହୋଇଥିବା ପୂର୍ବ ଟାଇଲ ଛପର ଘରକୁ ଶ୍ରେଣୀ ସ୍ଥାନାନ୍ତର କରିଥିଲେ।
ଉକ୍ତ ଟାଇଲ ଛପର ଘର ସଙ୍ଗା ଦବି ଯାଇଥିବା ବେଳେ ଲାଗିଥିବା କାଠ ଗୁଡିକ ଦୁର୍ବଳ ହୋଇଗଲାଣି। ଏହି ଗୃହରେ ପିଲାଙ୍କୁ ବସାଇ ଶିକ୍ଷୟିତ୍ରୀଶିକ୍ଷକ ଶିକ୍ଷାଦାନ କରୁଥିବା ଦେଖିବାକୁ ମିଳିଛି। ଅନ୍ୟପକ୍ଷରେ ଉକ୍ତ ବିଦ୍ୟାଳୟରେ ଫ୍ୟାନ୍, ପାଣି ପାଇଁ ମଟର ଲଗାଯାଇଥିଲେ ମଧ୍ୟ ୨ବର୍ଷରୁ ଉର୍ଦ୍ଧ୍ୱ ହେବ ବିଦ୍ୟୁତ୍ ସଂଯୋଗ କରାଯାଇ ପାରିନାହିଁ। ବିଦ୍ୟାଳୟ କାନ୍ଥରେ ବଡ଼ ବଡ଼ ଅକ୍ଷରରେ ନିରାପତ୍ତାରକ୍ଷା ନିମନ୍ତେ ଲେଖାଯାଇଥିବା ‘ଆମ ବିଦ୍ୟାଳୟ ସମସ୍ତଙ୍କ ପାଇଁ ଏକ ବିପଦ ମୁକ୍ତ, ସୁରକ୍ଷିତ ଓ ଆନନ୍ଦ ଦାୟକ ସ୍ଥାନ ଅଟେ’। ମାତ୍ର ଏହାର ବିପରୀତ ପ୍ରତିଫଳନ ଏହି ବିଦ୍ୟାଳୟରେ ଦେଖିବାକୁ ମିଳିଛି। ବିଦ୍ୟାଳୟରେ ବିଦ୍ୟୁତ୍ ସଂଯୋଗ ନ ଥିବାବେଳେ ଛାତ୍ରୀଛାତ୍ରଙ୍କ ପାଇଁ ଉଦ୍ଦିଷ୍ଟ ଏକ ପାଇଖାନା ମଧ୍ୟ ନାହିଁ। ଏନେଇ ବିଦ୍ୟାଳୟର ପ୍ରଧାନ ଶିକ୍ଷକ ସନ୍ତୋଷ ପ୍ରଧାନଙ୍କୁ ପଚାରିବାରୁ ଆମ୍ଭେ ବିଦ୍ୟାଳୟରେ ଏଭଳି ପରିସ୍ଥିତି ନେଇ ବିଡିଓ, ବ୍ଲକ ଶିକ୍ଷା ଅଧିକାରୀ ଓ ସରପଞ୍ଚଙ୍କୁ ବାରମ୍ବାର ଜଣାଇଥିଲେ ମଧ୍ୟ ଆଜି ପର୍ଯ୍ୟନ୍ତ ସୁଫଳ ମିଳି ପାରିଲା ନାହିଁ। ଉକ୍ତ ବିଦ୍ୟାଳୟର ଉନ୍ନତି ସହିତ ଶ୍ରେଣୀ ଗୃହର ଉନ୍ନତି ପାଇଁ ବିଭାଗୀୟ ପଦକ୍ଷେପର ନିହାତି ଆବଶ୍ୟକ ବୋଲି ସ୍ଥାନୀୟବାସୀନ୍ଦାମାନେ କହିଛନ୍ତି। ଏସମ୍ପର୍କରେ ସରପଞ୍ଚ ସନ୍ତୋଷ କୁମାର ନାୟକ କହିଛନ୍ତି, ଏହି ଅବହେଳିତ ବିଦ୍ୟାଳୟର ଶ୍ରେଣୀଗୃହର ନିର୍ମାଣ ପ୍ରତି ପ୍ରାଥମିକତା ଦିଆଯିବା ସହ ଆବଶ୍ୟକ ପାଚେରୀ ନିର୍ମାଣ କରାଯିବ।
