ବାରିପଦା ଅଫିସ,୮।୧୦: ମୟୂରଭଞ୍ଜ ଜିଲାରେ ଫୁଟବଲ ଏକାଡେମୀ ପ୍ରତିଷ୍ଠା ଦାବିରେ ଭଞ୍ଜସେନା ପକ୍ଷରୁ ଅଭିନବ ପ୍ରତିବାଦ ପ୍ରଦର୍ଶନ କରାଯାଇଛି। ଶୁକ୍ରବାର ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଖେଳାଳିମାନେ ଖେଳ ପୋଷାକ ପରିଧାନ କରି ଫୁଟ୍ବଲ ମ୍ୟାଚ୍ ଖେଳିଛନ୍ତି। ଫୁଟ୍ବଲର ଏନ୍ତୁଡ଼ିଶାଳ କୁହାଯାଉଥିବା ମୟୂରଭଞ୍ଜ ଜିଲାରେ ଏକାଡେମୀ ପ୍ରତିଷ୍ଠା ନିମନ୍ତେ ଜିଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି।
ଦାବି ମୁତାବକ କ୍ରୀଡ଼ାକ୍ଷେତ୍ରରେ ମୟୂରଭଞ୍ଜର ବହୁ ଖେଳାଳି ରାଜ୍ୟ ତଥା ଜାତୀୟସ୍ତରରେ ନିଜର ପ୍ରତିଭା ପ୍ରଦର୍ଶନ କରି ଜିଲା ପାଇଁ ଗର୍ବ ଓ ଗୌରବ ଆଣିପାରୁଛନ୍ତି। ଜିଲାରେ ଫୁଟବଲ ଏକାଡେମୀ ପ୍ରତିଷ୍ଠା ହେଲେ ଅନେକ ଖେଳାଳି ଏହାର ସୁବିଧା ସୁଯୋଗ ପାଇ ନିୟମିତ ଅଭ୍ୟାସ ଜାରି ରଖିଲେ ଉଚ୍ଚକୋଟୀର ଖେଳ ପ୍ରଦର୍ଶନ କରି ଜାତୀୟ ଅନ୍ତର୍ଜାତୀୟସ୍ତରକୁ ମନୋନୀତ ହୋଇପାରିବେ। ଏଥିପାଇଁ ରାଜ୍ୟ ସରକାରଙ୍କ ନିକଟରେ ବାରମ୍ବାର ଦାବି କରାଯାଉଥିଲେ ମଧ୍ୟ କୌଣସି ପଦକ୍ଷେପ ଗ୍ରହଣ କରୁ ନାହାନ୍ତି। ଭଞ୍ଜସେନା ଆଦିବାସୀ ଶାଖା ସଭାପତି ବାଜୁନ ହାଁସଦାଙ୍କ ନେତୃତ୍ୱରେ ଜିଲାର ଫୁଟବଲ ଖେଳାଳିମାନେ ଏକଜୁଟ ହୋଇ ଦାବି ଜଣାଇଛନ୍ତି। ଜିଲାର ବହୁ ସ୍ଥାନରେ ଫୁଟବଲ ଖେଳ ନିମନ୍ତେ ଭିତ୍ତିଭୂମି ରହିଥିଲେ ମଧ୍ୟ ଏହାର ରକ୍ଷଣାବେକ୍ଷଣ କରାଯାଉନାହିଁ। ରାଜ୍ୟ ସରକାରଙ୍କ କ୍ରମାଗତ ଅବହେଳା ଯୋଗୁ ବହୁ ପ୍ରତିଭାଧାରୀ ଖେଳାଳି ବଣମଲ୍ଲୀ ସଦୃଶ ହୋଇପଡ଼ିଛନ୍ତି ବୋଲି ସଙ୍ଗଠନର ଓବିସି ଶାଖା ସଭାପତି ରାକେଶ ବେହେରା ଓ ପରିତୋଷ ବାରିକ ପ୍ରକାଶ କରିଛନ୍ତି। ଖୁବ୍ଶୀଘ୍ର ଦାବି ପୂରଣ କରା ନ ଗଲେ ସେନା ପକ୍ଷରୁ ସମସ୍ତ ଜାତୀୟ ରାଜପଥ, ରାଜ୍ୟ ରାଜପଥ ଅବରୋଧ କରି ଫୁଟବଲ ଖେଳି ହରତାଳ କରିବେ ବୋଲି ଚେତାବନୀ ଦେଇଛନ୍ତି। ଉକ୍ତ କାର୍ଯ୍ୟକ୍ରମରେ ସେନାର ସଭାପତି ପିଣ୍ଟୁ ମାଇତି, ଉପାଧ୍ୟକ୍ଷ ନିମାଇଁ ତ୍ରିପାଠୀ, ସରପଞ୍ଚ ବାର୍ଷା ହେମ୍ବ୍ରମ, ରାମଚନ୍ଦ୍ର ମୁମୁ, ରବିନ ମହାନ୍ତି, ସଞ୍ଜୟ ହାଁସଦା, ହିକିମ ମାରାଣ୍ଡି, ରାଜେନ ମୁର୍ମୁ, ରାମଦାସ ମୁର୍ମୁ, ମଧୁସୂଦନ ମୁମୁ, କାଞ୍ଚନ ସୋରେନଙ୍କ ସମେତ ବହୁ କର୍ମକର୍ତ୍ତା ଏଥିରେ ସାମିଲ ହୋଇ ଦାବି ଉପସ୍ଥାପନା କରିଛନ୍ତି।
