ମୁମ୍ବାଇ:ସଙ୍ଗୀତ ଜଗତର ଆଶା ଭୋସଲେ ୯୨ ବର୍ଷ ବୟସରେ ଦୁନିଆରୁ ବିଦାୟ ନେିଇଛନ୍ତି। ଶନିବାର ମୁମ୍ବାଇର ଏକ ଘରୋଇ ହସ୍ପିଟାଲରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ନିଜ କଣ୍ଠର ଯାଦୁରେ ସାରା ବିଶ୍ୱକୁ ବାନ୍ଧି ରଖିଥିବା ଏହି ମହାନ ଗାୟିକାଙ୍କ ବ୍ୟକ୍ତିଗତ ଜୀବନ କିନ୍ତୁ ଅନେକ ଘାତ-ପ୍ରତିଘାତ ଏବଂ ଦୁଃଖରେ ପରିପୂର୍ଣ୍ଣ ଥିଲା।
୧୯୩୩ ମସିହାରେ ମହାରାଷ୍ଟ୍ରର ସାଙ୍ଗଲିରେ ଜନ୍ମଗ୍ରହଣ କରିଥିଲେ ଆଶା। ସେ ପ୍ରସିଦ୍ଧ ଗାୟକ ଦୀନାନାଥ ମଙ୍ଗେଶକରଙ୍କ ଝିଅ ଥିଲେ। ମାତ୍ର ୯ ବର୍ଷ ବୟସରେ ପିତାଙ୍କୁ ହରାଇବା ପରେ ପରିବାରର ସମସ୍ତ ବୋଝ ସେ ଓ ତାଙ୍କ ବଡ଼ ଭଉଣୀ ଲତା ମଙ୍ଗେଶକରଙ୍କ କାନ୍ଧକୁ ଆସିଯାଇଥିଲା। ଅଳ୍ପ ବୟସରୁ ରୋଜଗାର ପାଇଁ ସେ ଗୀତ ଗାଇବା ଆରମ୍ଭ କରିଥିଲେ।
ଆଶାଙ୍କ ବ୍ୟକ୍ତିଗତ ଜୀବନର ସବୁଠାରୁ ବଡ଼ ନିଷ୍ପତ୍ତି ଥିଲା ତାଙ୍କର ପ୍ରଥମ ବିବାହ। ମାତ୍ର ୧୬ ବର୍ଷ ବୟସରେ ପରିବାର ବିରୋଧରେ ଯାଇ ସେ ନିଜଠାରୁ ୧୫ ବର୍ଷ ବଡ଼ ଗଣପତରାଓ ଭୋସଲେଙ୍କୁ ବିବାହ କରିଥିଲେ। କିନ୍ତୁ ଏହି ସୁଖ ବେଶୀ ଦିନ ରହି ନ ଥିଲା। ଶ୍ୱଶୁର ଘରେ ସେ ଘରୋଇ ହିଂସାର ଶିକାର ହୋଇଥିଲେ। ପରିସ୍ଥିତି ଏପରି ହୋଇଥିଲା ଯେ ଗର୍ଭବତୀ ଥିବା ଅବସ୍ଥାରେ ତାଙ୍କୁ ସ୍ବାମୀଙ୍କ ଘର ଛାଡ଼ି ପିଲାମାନଙ୍କ ସହ ବାପଘରକୁ ଫେରିବାକୁ ପଡ଼ିଥିଲା।
ଆଶାଙ୍କ ଜୀବନରେ ଦୁଃଖର ପାହାଡ଼ ସେତେବେଳେ ଭାଙ୍ଗି ପଡ଼ିଥିଲା, ଯେତେବେଳେ ତାଙ୍କ ପିଲାମାନେ ତାଙ୍କୁ ଛାଡ଼ି ଚାଲିଗଲେ। ତାଙ୍କ ବଡ଼ ପୁଅ ହେମନ୍ତ ଭୋସଲେଙ୍କର ୨୦୧୫ରେ କର୍କଟ ରୋଗରେ ମୃତ୍ୟୁ ହୋଇଥିବା ବେଳେ, ଝିଅ ବର୍ଷା ଭୋସଲେ ୨୦୧୨ରେ ଆତ୍ମହତ୍ୟା କରିଥିଲେ। ଏହି ଘଟଣା ତାଙ୍କୁ ଭିତରୁ ଭାଙ୍ଗି ଦେଇଥିଲେ ମଧ୍ୟ ସେ ନିଜକୁ ସମ୍ଭାଳି କାମ ଜାରି ରଖିଥିଲେ।
ପ୍ରଥମ ବିବାହ ବିଫଳ ହେବାର ପ୍ରାୟ ୨୦ ବର୍ଷ ପରେ ସେ ପ୍ରସିଦ୍ଧ ସଙ୍ଗୀତ ନିର୍ଦ୍ଦେଶକ ଆର.ଡି. ବର୍ମନ (ପଞ୍ଚମ ଦା)ଙ୍କୁ ବିବାହ କରିଥିଲେ। ସଙ୍ଗୀତ ଦୁନିଆରେ ଏହି ଯୋଡ଼ି ଅନେକ ସୁପରହିଟ ଗୀତ ଭେଟି ଦେଇଥିଲେ। କିନ୍ତୁ ଆର.ଡି. ବର୍ମନଙ୍କ ଅକାଳ ବିୟୋଗ ତାଙ୍କୁ ପୁଣି ଥରେ ଏକା କରିଦେଇଥିଲା।
ଏତେ ସବୁ ଦୁଃଖ, ଅପମାନ ଏବଂ ସଂଘର୍ଷ ସତ୍ତ୍ୱେ ଆଶା ଭୋସଲେ କେବେ ହାର ମାନି ନ ଥିଲେ। ସେ ହଜାର ହଜାର ଗୀତ ଗାଇ ଗିନିଜ ବୁକ ଅଫ ୱାଲର୍ଡ ରେକର୍ଡରେ ନିଜ ନାମ ସ୍ଥାନିତ କରିବା ସହ ଭାରତୀୟ ସଙ୍ଗୀତର ଏକ ଅମର ସ୍ବର ପାଲଟି ଯାଇଛନ୍ତି। ତାଙ୍କର ଏହି ମହାପ୍ରୟାଣ ସହ ଭାରତୀୟ ସଙ୍ଗୀତର ଏକ ଗୌରବମୟ ଅଧ୍ୟାୟ ଶେଷ ହୋଇଛି।
