ଚାନ୍ଦବାଲି,୧୮ା୭ (ରତିକାନ୍ତ ବାରିକ): ଭଲ ରାସ୍ତା ନ ଥିବାରୁ ସାହିର ପୁଅଙ୍କୁ କେହି ଝିଅ ଦେବାକୁ ରାଜି ହେଉନାହାନ୍ତି। ଅନେକ ପୁଅଙ୍କ ପ୍ରସ୍ତାବ ଭାଙ୍ଗିଗଲାଣି। କାଦୁଅ ଗଁାକୁ ଝିଅ ଦେବେ ନାହିଁ ବୋଲି କହୁଛନ୍ତି କନ୍ୟାଘର ଲୋକେ। ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ଚଡ଼ଦିଆ ପଞ୍ଚାୟତର ଧ୍ରୁବପହଲ୍ଲୀପୁର ଗଁା ମଣ୍ଡଳସାହିର ଏଭଳି ସମସ୍ୟା ଲୋକଙ୍କୁ ଚିନ୍ତାରେ ପକାଇଛି। ଏହା ଉପକୂଳ ଜିଲା ହୋଇ ମଧ୍ୟ ସ୍ବାଧୀନତାର ୭୮ ବର୍ଷ ପରେ ଉପାନ୍ତ ଅଞ୍ଚଳ ଭଳି ଏଠାରେ ବିକଳ ଚିତ୍ର ଦେଖିବାକୁ ମିଳିଛି।
ଏହି ସାହିରେ ପ୍ରାୟ ୩୦ ପରିବାର ବସବାସ କରୁଛନ୍ତି। ସାହିକୁ ସ୍ଥାୟୀ ରାସ୍ତାଟିଏ ନାହିଁ। ବର୍ଷାଦିନେ କାଦୁଅ ପଚପଚ ରାସ୍ତାରେ ଗାଡ଼ିମୋଟର ଯିବା ତ ଦୂର କଥା, ଚାଲି ଚାଲି ଯିବାରେ ମଧ୍ୟ ଲୋକେ ଅସୁବିଧା ଭୋଗୁଛନ୍ତି। ବିଶେଷକରି ବର୍ଷାଦିନେ ଜରୁରିକାଳୀନ ସ୍ଥିତିରେ ଆମ୍ବୁଲାନ୍ସ କିମ୍ବା ଦମକଳ ସେବା ସାତସପନ ପାଲଟିଛି। ଫଳରେ ଅନେକ ସମୟରେ ଗର୍ଭବତୀ ଓ ଗୁରୁତର ରୋଗୀଙ୍କୁ ସାଙ୍ଗୀ ଭାରରେ ନେବାକୁ ପଡ଼ୁଛି। ଦୀର୍ଘବର୍ଷ ହେଲା ସାହିର ଲୋକେ ଏଭଳି ସମସ୍ୟା ମଧ୍ୟ ଦେଇ ଗତି କରୁଛନ୍ତି। ତେବେ ରାସ୍ତା ସମସ୍ୟା ପାଇଁ ସାହିର ପୁଅମାନଙ୍କ ବିବାହ ପ୍ରସ୍ତାବ ଭାଙ୍ଗିଯିବା ଲୋକଙ୍କ ଚିନ୍ତା ବଢ଼ାଇଛି। ଯେଉଁଠି ସାମାନ୍ୟ ମୌଳିକ ସୁବିଧା ନାହିଁ, ସେଠି ଝିଅ ଦେବାକୁ କନ୍ୟାପିତାମାନେ ରୋକ୍ଠୋକ୍ ମନା କରିଦେଉଛନ୍ତି। ଯଦି କାହାର ବିବାହ ଠିକ୍ ହୋଇଯାଉଛି, ତେବେ ଗଁା ବାହାରକୁ ତଥା ମୁଖ୍ୟରାସ୍ତା ପର୍ଯ୍ୟନ୍ତ ପ୍ରାୟ ୧ କି.ମି. କାଦୁଅ ରାସ୍ତାରେ ବରଙ୍କୁ କାନ୍ଧରେ ନେବାକୁ ପଡ଼ୁଛି। ପୁଣି ବରକନ୍ୟା ଫେରିବା ବେଳେ ବି ସମାନ ଅବସ୍ଥା। ଅନ୍ୟପକ୍ଷେ ବାହାର ଗଁାରୁ ଆସୁଥିବା ବରଙ୍କୁ ମଧ୍ୟ କାନ୍ଧରେ ବେଦି ଯାଏ ନେବାକୁ ପଡ଼ୁଛି। ଭଲ ରାସ୍ତା ନ ଥିବାରୁ ପିଲାମାନେ ସ୍କୁଲ, କଲେଜ ଯିବାରେ ହଇରାଣ ହେଉଛନ୍ତି। ଏନେଇ ଗ୍ରାମବାସୀ ଅନେକ ଥର ପ୍ରଶାସନ ନିକଟରେ ଅଭିଯୋଗ କରିଥିଲେ ମଧ୍ୟ କେହି ଶୁଣୁ ନ ଥିବା ଅଭିଯୋଗ ହେଉଛି। ନିର୍ବାଚନ ଆସିଲେ ନେତାମାନେ ରାସ୍ତା ନିର୍ମାଣର ପ୍ରତିଶ୍ରୁତି ଦିଅନ୍ତି। ପରେ ତାହା ପ୍ରତିଶ୍ରୁତିରେ ରହିଯାଏ। ଲୋକଙ୍କ ସମସ୍ୟାକୁ ଦୃଷ୍ଟିରେ ରଖି ପ୍ରଶାସନ ଶୀଘ୍ର ଏହି ଗଁାକୁ ପକ୍କାରାସ୍ତା ନିର୍ମାଣ କରିବାକୁ ଗ୍ରାମବାସୀ ଦାବି କରିଛନ୍ତି। ଏନେଇ ଚଡ଼ଦିଆ ସରପଞ୍ଚ ପ୍ରଶାନ୍ତ କୁମାର ମାଝୀ କହିଛନ୍ତି, ସେହି ପଡ଼ାକୁ ଯେଉଁ ମାଟି ରାସ୍ତା ରହିଛି, ତାହା ସରକାରୀ ଜାଗା ନୁହେଁ। ବ୍ୟକ୍ତିଗତ ଜାଗା ହୋଇଥିବାରୁ ସରକାରୀ ଅର୍ଥ ରାସ୍ତା ନିର୍ମାଣ ନିମନ୍ତେ ମଞ୍ଜୁର କରିବା ସମ୍ଭବ ନୁହେଁ।
