ସମ୍ବଲପୁର,୨୮ା୪(ବ୍ୟୁରୋ): ସମ୍ବଲପୁର ସହରର ଧନକଉଡାସ୍ଥିତ ଶିଶୁଯତ୍ନ କେନ୍ଦ୍ରରେ ଗୁରୁବାର ଏକ ଭିନ୍ନ ବାତାବରଣ ଦେଖିବାକୁ ମିଳିଥିଲା। ଏଠାକାର ଅନ୍ତେବାସୀ, ପରିଚାଳନା କମିଟି ସଦସ୍ୟ ଓ ଅଧିକାରୀ ଯେତିକି ଖୁସି ଥିଲେ, ସେତିକି ଭାବପ୍ରବଣ ହୋଇପଡ଼ୁଥିବା ବାରିହୋଇ ପଡୁଥିଲା। କାରଣ ପ୍ରାୟ ୨୦ବର୍ଷରୁ ଅଧିକ ସମୟ ଧରି ଏହି କେନ୍ଦ୍ରରେ ସଭିଙ୍କ ପ୍ରିୟଭାଜନ ହୋଇ ରହିଆସିଥିବା ପୂଜା ବିବାହ ବନ୍ଧନରେ ବାନ୍ଧିହୋଇ ସବୁଦିନ ପାଇଁ ଶାଶୁ ଘରକୁ ଚାଲିଯାଇଛନ୍ତି। ଜିଲା ପ୍ରଶାସନ ଓ ସାମାଜିକ କର୍ମୀଙ୍କ ସହଯୋଗରେ ରୀତିନୀତି ଅନୁସାରେ ନିରାଡ଼ମ୍ବର ଭାବେ ବିବାହ କାର୍ଯ୍ୟ ସମ୍ପନ୍ନ ହୋଇଥିଲା। ଏଭଳି ଏକ ନିଆରା ବିବାହକୁ ବିଭିନ୍ନ ମହଲରେ ସ୍ବାଗତ କରାଯାଇଛି।
ମିଳିଥିବା ସୂଚନା ମୁତାବକ ପୂଜା ଓ ତାଙ୍କର ଦୁଇଜଣ ଭାଇ ମାଆବାପା ଛେଉଣ୍ଡ ହେବା ପରେ ପ୍ରଶାସନ ସହଯୋଗରେ ଏହି କେନ୍ଦ୍ରରେ ଆଶ୍ରୟ ନେଇଥିଲେ। ବୟସ ବଢିବା ସହ ପୂଜା ପାଠପଢି ଉଚ୍ଚଶିକ୍ଷିତ ହୋଇଛନ୍ତି। କିଛିଦିନ ପୂର୍ବରୁ ଶିଶୁଯତ୍ନ କେନ୍ଦ୍ରର ପୂଜାଙ୍କ ସହ ବିବାହ ପାଇଁ ବରଗଡ ଜିଲା ବରପାଲି ନିବାସୀ ପ୍ରମୋଦ ପଣ୍ଡାଙ୍କ ପରିବାର ପକ୍ଷରୁ ପ୍ରସ୍ତାବ ଆସିଥିଲା। କେନ୍ଦ୍ର କର୍ତ୍ତୃପକ୍ଷ ରାଜି ହେବା ପରେ ପ୍ରମୋଦ ଝିଅ ଦେଖିବା ପାଇଁ ଆସିଥିଲେ। ଉଭୟ ରାଜି ହେବା ପରେ ଏ ନେଇ ଆଶ୍ରମ କର୍ତ୍ତୃପକ୍ଷ ଜିଲା ପ୍ରଶାସନକୁ ଜଣାଇଥିଲେ। ବିବାହ ପାଇଁ ଉଭୟ ପକ୍ଷ ସହମତ ହେବା ପରେ ଗୁରୁବାର ଲଗ୍ନ ଧାର୍ଯ୍ୟ ହୋଇଥିଲା। ଧନକଉଡ଼ା ଆଶ୍ରମରେ ବିବାହ ମଣ୍ଡପ ହୋଇଥିଲା। ବାଜା ବଜାଇ ବାଣ ଫୁଟାଇ ବରଯାତ୍ରୀ ପହଞ୍ଚତ୍ବା ପରେ ସେମାନଙ୍କୁ ସ୍ବାଗତ କରି ପାଛୋଟି ନିଆଯାଇଥିଲା। ହିନ୍ଦୁ ରୀତିନୀତିରେ ଏହି ଆଦର୍ଶ ବାହାଘର ଶେଷ ହୋଇଥିଲା। ବିଜୁ ଶିଶୁ ସୁରକ୍ଷା ଯୋଜନା ଅଧୀନରେ ଜିଲା ପ୍ରଶାସନ ତରଫରୁ ବିବାହ ସହାୟତା ରାଶି ୫୦ ହଜାର ଟଙ୍କା ପ୍ରଦାନ କରାଯାଇଛି। କନ୍ୟା ମାତା ଭାବେ ଜିଲା ଶିଶୁ ମଙ୍ଗଳ ଅଧିକାରୀ ଗୀତାଞ୍ଜଳି ମହାପାତ୍ର କନ୍ୟାଦାନ କରିଛନ୍ତି। ପୂର୍ବତନ ବିଧାୟିକା ଡା. ରାସେଶ୍ୱରୀ ପାଣିଗ୍ରାହୀ, ଜିଲା ଶିଶୁ ସୁରକ୍ଷା ଅଧିକାରୀ ସୁଚିସ୍ମିତା ପଟ୍ଟନାୟକ, ଜିଲା ଶିଶୁ ମଙ୍ଗଳ ଅଧିକାରୀ ଗୀତାଞ୍ଜଳି ମହାପାତ୍ର, ଜିଲା ପରିଷଦ ଅଧ୍ୟକ୍ଷା କୁମୁଦିନୀ ନାୟକ, ଅତିରିକ୍ତ ଜିଲାପାଳ ଅଜାମ୍ବର ମହାନ୍ତି, ଉମାକାନ୍ତ ରାଜ, ସମ୍ବଲପୁର ମହାନଗର ନିଗମ କମିଶନର ପ୍ରଦୀପ କୁମାର ସାହୁ, ଜିଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ଧର୍ମେନ୍ଦ୍ର ମଲ୍ଲିକ, ଆଞ୍ଚଳିକ ପରିବହନ ଅଧିକାରୀ ରାମଦାସ ଟୁଡୁ, ଡେପୁଟି କଲେକ୍ଟର ଆଦିତ୍ୟ ପଣ୍ଡା, ଜିଲା ଶ୍ରମ ଅଧିକାରୀ ସୁମିତ୍ରା ମାଝି, ଜିଲା ଯୋଗାଣ ଅଧିକାରୀ ରାମଚନ୍ଦ୍ର ଟୁଡୁ ପ୍ରମୁଖ ଉପସ୍ଥିତ ରହି ବରକନ୍ୟାଙ୍କୁ ଆଶୀର୍ବାଦ ଦେଇଥିଲେ। ୧୯୭୨ ମସିହାରୁ ଆରମ୍ଭ ହୋଇଥିବା ଏହି କେନ୍ଦ୍ର ପରିସରରେ ଏହା ପ୍ରଥମ ବିବାହ।
