ଖଇରା, ୨୧।୩: ବାଲେଶ୍ୱର ଜିଲା ଖଇରା ବ୍ଲକ ଅଧୀନ ପଳସାସ୍ଥିତ ପଞ୍ଚାୟତସ୍ତରୀୟ ମହାସଂଘ ଜଗଜ୍ଜନନୀ ଗ୍ରୁପର ୬୦ସଦସ୍ୟ ଚଳିତବର୍ଷ ଗେଣ୍ଡୁଫୁଲ ଚାଷ କରି ସମଗ୍ର ଖଇରା ବ୍ଲକରେ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି। ଅନ୍ୟ ସଂଘଗୁଡିକ ପାଇଁ ମଧ୍ୟ ସ୍ବାବଲମ୍ବୀ ହେବାର ଏକ ବାର୍ତ୍ତା ମଧ୍ୟ ପ୍ରଦାନ କରିଛନ୍ତି ା ତାଙ୍କର ଏହି ଫୁଲ ବଗିଚା ବୁଲିବା ପରେ ନିକଟରେ ଜିଲାପାଳ ଦତ୍ତାତ୍ରେୟ ଭାଉସାହେବ ଶିନ୍ଦେ, ବିଡିଓ ପର୍ଶୁରାମ ପଣ୍ଡା, ସ୍ଥାନୀୟ ବିଧାୟକ ଜ୍ୟୋତି ପ୍ରକାଶ ପାଣିଗ୍ରାହୀ ପ୍ରମୁଖ ମହିଳା ଗୋଷ୍ଠୀର ଏହି ପରିଶ୍ରମ ପାଇଁ ସେମାନଙ୍କୁ ପ୍ରଶଂସା କରିଛନ୍ତି ା ଏଭଳି ପରିଚୟରେ ଆମତ୍ନିର୍ଭରଶୀଳ ହେବାର ସ୍ବପ୍ନ ଦେଖିଥିବା ସଂଘ ସଭାପତି ଜ୍ୟୋତିପ୍ରଭା ବେହେରା, ସମ୍ପାଦିକା ରାଜଶ୍ରୀ ସାହୁ ଓ ଏମବିକେ ଅନିତାରାଣୀ ମହାନ୍ତି ୫ବର୍ଷ ପାଇଁ ଏହି ଫୁଲ ଚାଷ ଜାରି ରଖିବେ ବୋଲି କହିଛନ୍ତି।
ପ୍ରଥମେ ସଂଘ ସଦସ୍ୟମାନେ ଓଡିଶା ଜୀବିକା ମିଶନର ଅଧିକାରୀଙ୍କ ପରାମର୍ଶକ୍ରମେ ଫୁଲଚାଷ କରିବାକୁ ନିଷ୍ପତ୍ତି ନେଇଥିଲେ। ଏଥିପାଇଁ ବ୍ୟାଙ୍କରୁ ୧ଲକ୍ଷ ୪୦ହଜାର ଟଙ୍କା ଋଣ ନେଇଥିଲେ। ଉଦ୍ୟାନ ବିଭାଗଠାରୁ ଚାରାନେବା ପରେ ପଳସା ପଞ୍ଚାୟତ ପଛପଟେ ଥିବା ୨ ଏକର ଜମିକୁ ଭଡାସୂତ୍ରରେ ଆଣି ସେଥିରେ ଚାଷ ଆରମ୍ଭ କରିଥିଲେ। ସମସ୍ତ ସଦସ୍ୟ ପରିବାର କାମ ଧନ୍ଦା ସାରିବା ପରେ ମାତ୍ର ୨ଘଣ୍ଟା ଲେଖାଏଁ ସମୟ ଦେଇ ଏହାର ଯତ୍ନ ନେଇଥିଲେ। ଏବେ ଗେଣ୍ଡୁଫୁଲ ଫୁଟି ବାସ୍ନା ଯେତେ ଯେତେ ଦୂରକୁ ଯାଉଛି ଉକ୍ତ ସଂଘର ପ୍ରଶଂସାର ସୁଅ ମଧ୍ୟ ସେହି ଅନୁପାତରେ ବଢିଚାଲିଛି ା ସବୁ ଆନନ୍ଦ ଭିତରେ ଫୁଲ ବିକ୍ରି ସମସ୍ୟା ସେମାନଙ୍କୁ ଟିକେ ଅଡୁଆରେ ପକାଇଛି ା ଖଇରା, କୁପାରୀ, ଡୁଙ୍ଗୁରା ଭଳି ବଜାରଗୁଡିକରେ ଫୁଲ ବ୍ୟବସାୟୀମାନେ କୋଲକାତା ଉପରେ ଫୁଲ ପାଇଁ ନିର୍ଭର କରୁଛନ୍ତି, ମାତ୍ର ସେହି ମୂଲ୍ୟରେ ସେମାନେ ସଂଘ ନିକଟରୁ ଫୁଲ କିଣିବାକୁୁ ଅନିଚ୍ଛା ପ୍ରକାଶ କରୁଛନ୍ତି ା ନେବାକୁ ବାଧ୍ୟ କଲେ କମ ଦରରେ ଦେବାକୁ କହୁଛନ୍ତି ଯାହା ମହିଳା ଗୋଷ୍ଠୀ ପାଇଁ ଅଡୁଆ ହେଉଛି। ତଥାପି ଅନେକ ଘରୋଇ ଲୋକ ନେଇଯାଉଥିବାରୁ ଖର୍ଚ୍ଚ ଭରଣା ହୋଇପାରୁଥିବା ସେମାନେ କହିଛନ୍ତି।
ଉତ୍କଳବନ୍ଧୁ ପଣ୍ଡା
