ନୂଆଦିଲ୍ଲୀ,୮।୩: ମହାରାଷ୍ଟ୍ରରେ ମରାଠାଙ୍କ ପାଇଁ ସ୍ଥାନ ରିଜର୍ଭେଶନ ମାମଲାରେ ସୁପ୍ରିମ୍କୋର୍ଟ ସୋମବାର ସମସ୍ତ ରାଜ୍ୟ ସରକାରଙ୍କ ମତାମତ ଲୋଡିଛନ୍ତି। ରିଜର୍ଭେଶନ ୫୦ ପ୍ରତିଶତ ପର୍ଯ୍ୟନ୍ତ ବୃଦ୍ଧି କରାଯାଇ ପାରିବ କି ନାହିଁ ତାହା କୋର୍ଟଙ୍କ ପକ୍ଷରୁ ପ୍ରଶ୍ନ କରାଯାଇଛି। ଏହି ମାମଲାର ଶୁଣାଣି ମାର୍ଚ୍ଚ ୧୮ ପର୍ଯ୍ୟନ୍ତ ପ୍ରତିଦିନ କରାଯିବ। ଏନେଇ ଗଠିତ ୫ ଜଣିଆ ଖଣ୍ଡପୀଠଙ୍କ ପକ୍ଷରୁ ରାଜ୍ୟ ସରକାରଙ୍କ ମତାମତ ଶୁଣାଯିବା ପରେ ବିଚାର କରାଯିବ ବୋଲି କୁହାଯାଇଛି। ସ୍ଥାନ ରିଜର୍ଭେଶନ ନେଇ ସୁପ୍ରିମ୍କୋର୍ଟରେ କେତେକ ମାମଲାର ବିଚାର ଜାରି ରହିଥିବା ନେଇ ବରିଷ୍ଠ ଆଇନଜୀବୀ ଗେପାଳ ଶଙ୍କର ନାରାୟଣ ସୂଚନା ଦେଇଥିଲେ। ଏନେଇ କୋର୍ଟ କହିଥିଲେ ଯେ, ସଂଶୋଧନ ୧୨୨, ଆର୍ଥିକ ଆଧାର ନେଇ ୧୦ ପ୍ରତିଶତ ରିଜର୍ଭେଶନ ଏବଂ ଜାତିର ବର୍ଗୀକରଣ ନେଇ ପ୍ରଶ୍ନ ଆଗତ କରାଯାଇଛି। ଏସମ୍ପର୍କରେ ଆଇନଜୀବୀ ମୁକୁଲ ରୋହତୋଗି କହିଥିଲେ ଯେ, ମାମଲାରେ ଅନୁଚ୍ଛେଦ ୩୪୨-ଏର ବ୍ୟାଖା କରାଯିବାର ଆବଶ୍ୟକତା ରହିଛି। ଏହା ସମସ୍ତ ରାଜ୍ୟକୁ ପ୍ରଭାବିତ କରିବ। ମାମଲା ସମ୍ପର୍କରେ ବରିଷ୍ଠ ଆଇନଜୀବୀ କପିଲ ସିବଲ କହିଲେ, ଯେ ସର୍ବୋଚ୍ଚ ନ୍ୟାୟାଳୟ କେବଳ କେନ୍ଦ୍ର ଅବା ମହାରାଷ୍ଟ୍ର ସରକାରଙ୍କ ପକ୍ଷ ଶୁଣିବା ଅନୁଚିତ। ସମସ୍ତ ରାଜ୍ୟ ସରକାରଙ୍କ ମତାମତ ଲୋଡାଯିବାର ଗୁରୁତ୍ୱ ରହିଛି। ତେଣୁ ସମସ୍ତ ରାଜ୍ୟ ସରକାରଙ୍କୁ ନୋଟିସ୍ ଜାରି କରାଯିବା ଆବଶ୍ୟକ।
