ଭାରତକୁ ବିଶ୍ୱସ୍ତରରେ ଅନ୍ୟତମ କ୍ଷମତାଶାଳୀ ଦେଶ ଭାବେ ଏଠାକାର ରାଷ୍ଟ୍ରୀୟ ନେତାମାନେ ପ୍ରଦର୍ଶନ କରିଚାଲିଛନ୍ତି। ବିଭିନ୍ନ ମଞ୍ଚରେ ଭାରତର ଉତ୍ଥାନ ବିଷୟରେ ଅନେକ ନେରେଟିଭ୍ ବା ବ୍ୟାଖ୍ୟାନ କରାଯାଉଛି। କେତେକେ ଭାରତ ଭୂମିର ସଫଳତାର ଊର୍ଦ୍ଧ୍ୱକୁ ଉଠି ମହାକାଶ କ୍ଷେତ୍ରରେ ଉଲ୍ଲେଖନୀୟ ଅଗ୍ରଗତି ବିଷୟରେ ବଖାଣୁଛନ୍ତି। ଏତେ ଭିତରେ ଅଶାନ୍ତ ମଣିପୁର ବିଷୟଟି ଅନ୍ଧାରରେ ଦୀର୍ଘ ଦେଢ଼ବର୍ଷ ଧରି ଘାଣ୍ଟି ହେଉଥିଲେ ମଧ୍ୟ ସେଥିପ୍ରତି ଜାତୀୟଠାରୁ ପ୍ରାନ୍ତୀୟ ସ୍ତରଯାଏ କାହାରି ନଜର ପଡ଼ୁ ନ ଥିଲା ଭଳି ମନେ ହେଉଛି। ୨୦୨୩ ମେ’ରୁ ହିଂସା କବଳିତ ମଣିପୁର ଦେଶର ଅନେକ ରାଜ୍ୟରେ ହୋଇଥିବା ନିର୍ବାଚନଠାରୁ ୨୦୨୪ ଲୋକ ସଭା ନିର୍ବାଚନ ଭଳି ସର୍ବଭାରତୀୟ ଭୋଟ ବ୍ୟାଙ୍କ ରାଜନୀତି ଦେଖିସାରିଲାଣି। ଏବେ ଝାଡ଼ଖଣ୍ଡ ନିର୍ବାଚନର ପ୍ରଥମ ପର୍ଯ୍ୟାୟ ସରିଥିବା ବେଳେ ଆସନ୍ତା ୨୦ ତାରିଖରେ ମହାରାଷ୍ଟ୍ର ନିର୍ବାଚନ ହେବାକୁ ଯାଉଛି। ହେଲେ ମଣିପୁର ହିଂସା କୁନ୍ଥେଇ ମୁନ୍ଥେଇ କେଉଁଠି କେମିତି ନିର୍ବାଚନୀ ପ୍ରସଙ୍ଗ ପାଲଟି ପୁଣି ମିଳେଇ ଯାଉଛି। ଏଭଳି ଜନମାନସିକତାକୁ ଦେଖିଲେ ମନେ ହେଉଛି ସତେ ଯେମିତି ମଣିପୁର ଭାରତ ଭିତରେ ନାହିଁ। ଏହା ଜଣାଶୁଣା ଯେ ମଣିପୁର ସମେତ ଉତ୍ତର ପୂର୍ବାଞ୍ଚଳବାସୀଙ୍କ ପ୍ରତି ଅବଶିଷ୍ଟ ଭାରତୀୟଙ୍କ ଏକ ଭିନ୍ନ ଦୃଷ୍ଟି ଥିବାରୁ ସେଠାକାର ବାସିନ୍ଦାଙ୍କ ମଧ୍ୟରୁ ଅଧିକାଂଶ ଅସନ୍ତୋଷ ପ୍ରକାଶ କରିଥାଆନ୍ତି। ଭାରତ ସରକାର ସହି ଅଂଶକୁ ଅଣଦେଖା କରୁଥିବାରୁ ସ୍ଥିତି ବିଗିଡ଼ିବାରେ ଲାଗିଛି।
ସଦ୍ୟ ହିଂସାକୁ ଦେଖିଲେ ମଣିପୁରରେ ମେଇତିଙ୍କ ଉପରେ କୁକି ଉଗ୍ରପନ୍ଥୀମାନେ ଭାରିପଡ଼ିଲେଣି। ଜରିବାମ୍ ଜିଲାରୁ ସନ୍ଦିଗ୍ଧ କୁକି ଉଗ୍ରପନ୍ଥୀ ୧୧ ନଭେମ୍ବରରେ ୬ ଜଣଙ୍କୁ ଅପହରଣ କରି ନେବାର ୫ ଦିନ ପରେ ସେମାନଙ୍କୁ ହତ୍ୟା କରି ନଦୀରେ ଫିଙ୍ଗିଦେଇଥିବା ଦେଖିବାକୁ ମିଳିଛି। ସେମାନଙ୍କ ମଧ୍ୟରୁ ୩ ଜଣ ମହିଳା ହୋଇଥିବା ବେଳେ ଆଉ ୩ ଜଣ ଶିଶୁ। ଏହି ଘଟଣାକୁ ନେଇ ୧୬ ତାରିଖରେ ବିକ୍ଷୋଭକାରୀମାନେ ବିଭିନ୍ନ ସ୍ଥାନରେ ବ୍ୟାପକ ପୋଡ଼ାଜଳା କରିବା ସହ ଇମ୍ଫାଲରେ ଥିବା ୩ ମନ୍ତ୍ରୀ ଓ ୬ ଜଣ ବିଧାୟକଙ୍କ ଘରେ ଆକ୍ରମଣ କରିଛନ୍ତି। ଏପରି କି ଭାଜପା ନେତା ତଥା ମୁଖ୍ୟମନ୍ତ୍ରୀ ଏନ୍. ବୀରେନ ସିଂଙ୍କ ବାସଭବନ ଆଡ଼କୁ ସେମାନେ ପ୍ରବେଶ ଉଦ୍ୟମ କରିଥିଲେ। ସାନି ହିଂସା ବ୍ୟାପିବା ପଛରେ ଜରିବାମ ଅଞ୍ଚଳରେ ନଭେମ୍ବର ୧୧ରେ କିଛି ଲୋକ ଥାନା ଉପରେ ଆକ୍ରମଣ କରିଥିବା ଦେଖାଯାଇଥିଲା। ସୁରକ୍ଷାକର୍ମୀ ପରିସ୍ଥିତିର ମୁକାବିଲା କରିବାକୁ ଯାଇ ପ୍ରତିଆକ୍ରମଣ କରିବାରୁ ୧୧ ଜଣଙ୍କ ମୃତ୍ୟୁ ଘଟିଥିଲା ଓ ସେମାନେ କୁକି ଉଗ୍ରପନ୍ଥୀ ଥିଲେ ବୋଲି କୁହାଯାଉଛି। ପରବର୍ତ୍ତୀ ସମୟରେ ଉଗ୍ରପନ୍ଥୀ ଗୋଷ୍ଠୀ ପ୍ରତିହିଂସାପରାୟଣ ହୋଇ ମେଇତିମାନେ ରହୁଥିବା ଶରଣାର୍ଥୀ ଶିବିର ଉପରେ ଆକ୍ରମଣ କରି ୬ ଜଣଙ୍କୁ ଅପହରଣ କରିନେଇଥିଲେ। ସେମାନଙ୍କ ମୃତଦେହ ଉଦ୍ଧାର ହେବା ପରେ ଦେଖାଦେଇଥିବା ଉତ୍ତେଜନାକୁ ପ୍ରଶମିତ କରିବା ସକାଶେ ଇମ୍ଫାଲ ନିକଟବର୍ତ୍ତୀ ଅଞ୍ଚଳରେ କର୍ଫ୍ୟୁ ଜାରି କରାଯିବା ସହ ଇଣ୍ଟରନେଟ୍କୁ ବନ୍ଦ କରି ଦିଆଯାଇଛି। ଇତିମଧ୍ୟରେ କୋଅର୍ଡିନେଟିଂ କମିଟି ଅନ୍ ମଣିପୁର ଇଣ୍ଟିଗ୍ରିଟି (କୋକୋମି) ହିଂସା ଘଟାଇଥିବା ଉଗ୍ରପନ୍ଥୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ସହ ବିଭିନ୍ନ ଜିଲାରେ ଚଳିତ ମାସ ପ୍ରାରମ୍ଭରୁ ପୁନଃଲାଗୁ କରାଯାଇଥିବା ସଶସ୍ତ୍ର ସେନା ସ୍ବତନ୍ତ୍ର କ୍ଷମତା ଆଇନ (ଆଫ୍ସା) ହଟେଇ ଦେବାକୁ ଦାବି କରିଛି। ଉଲ୍ଲେଖଯୋଗ୍ୟ, ଏହି କଠୋର ଆଇନ ଲାଗୁ ହୋଇଥିବା ଅଞ୍ଚଳରେ ସେନା ଲୋକଙ୍କ ଉପରେ ଜୁଲମ କରିଥିବାର ଇତିହାସ ଅନେକ ରହିଆସିଛି।
ଦେଶରେ ଆଭ୍ୟନ୍ତରୀଣ ବ୍ୟାପାର ପରିଚାଳନା ଦାୟିତ୍ୱ ସ୍ବରାଷ୍ଟ୍ର ମନ୍ତ୍ରଣାଳୟ ଉପରେ ନ୍ୟସ୍ତ ଥାଏ। ଦେଢ଼ ବର୍ଷ ହେଲାଣି ମଣିପୁର ସମସ୍ୟା ଲାଗି ରହିଥିଲେ ମଧ୍ୟ ତାହାର ସ୍ଥାୟୀ ସମାଧାନ ହୋଇପାରୁ ନାହିଁ। ସତେ ଯେମିତି ବିଭିନ୍ନ ଅପଶକ୍ତି ଏହି ରାଜ୍ୟକୁ ହିଂସାର ପ୍ରୟୋଗଶାଳା କରିଦେଲେଣି। ସେଠାକାର ସ୍ଥିତି ଯାଞ୍ଚ କରିବା ଲାଗି ୧୭ ନଭେମ୍ବରରେ କେନ୍ଦ୍ରୀୟ ରିଜର୍ଭ ପୋଲିସ ବାହିନୀ(ସିଆର୍ପିଏଫ୍) ମହାନିର୍ଦ୍ଦେଶକ ଅନିସ ଦୟାଲ ସିଂ ଇମ୍ଫାଲରେ ପହଞ୍ଚତ୍ଛନ୍ତି। ତେଣୁ ହିଂସା ଯେଭଳି ଉଗ୍ର ହେବାରେ ଲାଗିଛି କେନ୍ଦ୍ର ତାହାକୁ ପ୍ରଶମିତ କରିବା ଲାଗି ରାଜ୍ୟ ସରକାର ସହିତ ଉଭୟ ଗୋଷ୍ଠୀକୁ ଶାନ୍ତି ଟେବୁଲକୁ ଡାକି ତୁରନ୍ତ ପ୍ରତିକାର ବ୍ୟବସ୍ଥା କରିବା ଉଚିତ। ଏପର୍ଯ୍ୟନ୍ତ ସେଭଳି କୌଣସି ପଦକ୍ଷେପ ନିଆଯାଉଥିବାର ଖବର ମିଳୁନାହିଁ। ପ୍ରତ୍ୟେକ ଦିନ ପରିସ୍ଥିତି ଜଟିଳ ହେବାରେ ଲାଗିଛି। ନିଆଁ ଲିଭାଇବାର ସବୁ ପ୍ରକାର ଉଦ୍ୟମ କରାଗଲେ ଏହି ଉତ୍ତର ପୂର୍ବାଞ୍ଚଳ ଭାରତ ସାଙ୍ଗରେ ରହିବ। ନଚେତ୍ ଭବିଷ୍ୟତର ମାନଚିତ୍ର ବଦଳିଯିବାର ସବୁ ଆଶଙ୍କା ରହିଛି।
