ଭୁବନେଶ୍ୱର,୩୦।୭(ବ୍ୟୁରୋ): କରୋନା କଟକଣାରେ ରାଜ୍ୟ ବାହାରେ ଫସି ରହିଥିବା ପ୍ରବାସୀ ଶ୍ରମିକଙ୍କୁ ଘରକୁ ଫେରାଇ ଆଣିବା ଲାଗି ବିଭିନ୍ନ ରାଜ୍ୟ ସରକାରଙ୍କ ପକ୍ଷରୁ ବ୍ୟବସ୍ଥା କରାଯାଇଛି। ହେଲେ ମାଲିକ ଓ ଠିକାଦାରଙ୍କ ନିକଟରେ ଏବେ ବି ହଜାର ହଜାର ଦାଦନ ବନ୍ଧା ପଡ଼ିଛନ୍ତି। ଓଡ଼ିଶାର ଜଣେ ଆଦିବାସୀ ଯୁବତୀଙ୍କ ସାହସ ଓ ଉପସ୍ଥିତ ବୁଦ୍ଧି ପାଇଁ ତାମିଲନାଡ଼ୁର ବିଭିନ୍ନ ଇଟାଭାଟିରେ ନାନା ନିର୍ଯାତନାର ଶିକାର ୬ହଜାରରୁ ଊର୍ଦ୍ଧ୍ୱ ଶ୍ରମିକ ନିଜ ଭିଟାମାଟିକୁ ଫେରି ଜୀବନ ବଞ୍ଚାଇଥିବା ଜଣାପଡିଛି। ଏମାନଙ୍କ ପାଇଁ ଦେବଦୂତ ସାଜିଥିବା ଯୁବତୀ ହେଲେ ବଲାଙ୍ଗୀରର ମାନସୀ ବରିହା। ଏବେ ତାଙ୍କୁ ସାରା ଦେଶରୁ ସାବାସି ମିଳିବାରେ ଲାଗିଛି।
ମାନସୀଙ୍କ ବୟସ ୧୯ବର୍ଷ। ରୋଗରେ ତାଙ୍କ ମା’ଙ୍କର ମୃତ୍ୟୁ ଘଟିଥିଲା। ତେବେ ମା’ଙ୍କ ଚିକିତ୍ସା ପାଇଁ ବାପା ଉଦ୍ଧାର ଆଣିଥିବା ୨୮ ହଜାର ଟଙ୍କା ଶୁଝିବାକୁ ମାନସୀ କିଛିଦିନତଳେ ତାମିଲନାଡ଼ୁର ତିରୁଭାଲୁରସ୍ଥିତ ଏକ ଇଟାବାଟିକୁ କାମ କରିବାକୁ ଯାଇଥିଲେ। ମାନସୀଙ୍କ ସହ ବଲାଙ୍ଗୀର, ନୂଆପଡ଼ା ଓ କଳାହାଣ୍ଡି ଜିଲାର ପ୍ରାୟ ୩୫୫ଜଣ ଶ୍ରମିକ ଦାଦନ ଖଟୁଥିଲେ। ଇଟାଭାଟି ମାଲିକ ଆଗୁଆ ଟଙ୍କାଦେଇ ସେମାନଙ୍କୁ କିଣିନେଇଯାଇଥିବାରୁ କେବଳ ଖାଇବା ପାଇଁ ଦିନକୁ ମାତ୍ର ୩୦ଟଙ୍କା ଦେଉଥିଲେ। ହେଲେ କରୋନା ଲକ୍ଡାଉନ୍ ପରେ ସେତକ ବି ମିଳି ନ ଥିଲା। ଫଳରେ ସେମାନେ ଭୋକ ଉପାସରେ ଦିନ କାଟୁଥିଲେ। ଘରକୁ ଫେରିବାକୁ ବାହାରିବାରୁ ଭାଟି ମାଲିକ ଛାଡ଼ି ନ ଥିଲେ। ମାଲିକ ଓ ସହଯୋଗୀଙ୍କ ଆକ୍ରମଣରେ ମହିଳା ଓ ଶିଶୁଙ୍କୁ ମିଶାଇ ବହୁ ଶ୍ରମିକ ଗୁରୁତର ଆହତ ହୋଇଥିଲେ। ରକ୍ତ ଜୁଡ଼ୁବୁଡ଼ୁ ଅବସ୍ଥାରେ କେତେଜଣ ଶ୍ରମିକ ଛଟପଟ ହେଉଥିବାବେଳେ ମାନସୀ ସାହସ ଜୁଟାଇ ଉପସ୍ଥିତ ବୁଦ୍ଧି ଖଟାଇ ଏକ ନିରୋଳା ସ୍ଥାନକୁ ଯାଇ ଫୋନ୍ରେ ଜଣେ ସମ୍ପର୍କୀୟଙ୍କୁ ଜଣାଇବା ସହ ଆହତଙ୍କ ଭିଡିଓ ଓ ଫଟୋ ହ୍ବାଟ୍ସଆପ୍ରେ ଛାଡ଼ି ଉଦ୍ଧାର ପାଇଁ ନିବେଦନ ଥିଲେ। ଏହାପରେ ଏକ ସ୍ବେଚ୍ଛାସେବୀ ସଂଗଠନ ସହାୟତାର ହାତ ବଢ଼ାଇଥିଲା। ତିରୁଭାଲୁର ପ୍ରଶାସନକୁ ଘଟଣା ସମ୍ପର୍କରେ ଜଣାଇବା ପରେ ସ୍ଥାନୀୟ ଅଧିକାରୀମାନେ ତୁରନ୍ତ ଇଟାଭାଟିରେ ପହଞ୍ଚତ୍ ଶ୍ରମିକଙ୍କୁ ଉଦ୍ଧାର କରିବା ସହ ଆହତଙ୍କୁ ହସ୍ପିଟାଲରେ ଭର୍ତ୍ତି କରିଥିଲେ। ଏପରି କି ଇଟାଭାଟି ମାଲିକଙ୍କ ବିରୋଧରେ ଥାନାରେ ମାମଲା ରୁଜୁ ମଧ୍ୟ ହୋଇଥିଲା। ଏଥିସହ ନିକଟସ୍ଥ ୩୦ ଇଟାଭାଟିରେ ଚଢାଉ କରାଯାଇ ୬୭୫୦ ଶ୍ରମିକଙ୍କୁ ଉଦ୍ଧାର କରାଯାଇ ସ୍ବତନ୍ତ୍ର ଟ୍ରେନ୍ ଯୋଗେ ସେମାନଙ୍କ ରାଜ୍ୟକୁ ପଠାଇ ଦିଆଯାଇଥିଲା। ଏମାନଙ୍କ ମଧ୍ୟରେ ବିହାର, ଝାଡ଼ଖଣ୍ଡ ଓ ଉତ୍ତରପ୍ରଦେଶର ଶ୍ରମିକ ରହିଥିବାବେଳେ ଅଧିକାଂଶ ଓଡ଼ିଶାର ଥିଲେ। କେବଳ ମାନସୀଙ୍କ ପାଇଁ ଏହା ସମ୍ଭବ ହୋଇପାରିଥିଲା।
‘ମାନବ ଚାଲାଣ ଉପରେ ସରକାର ପଦକ୍ଷେପ ନିଅନ୍ତୁ’
ରାଜ୍ୟରେ ଅଣକୁଶଳୀ ଓ ଦାଦନ ଶ୍ରମିକମାନେ ସର୍ବାଧିକ ହ୍ୟୁମାନ ଟ୍ରାଫିକିଂ ବା ମାନବଚାଲାଣ ଶିକାର ହେଉଛନ୍ତି। ଏହା ସମଗ୍ର ଦେଶରେ ଏକ ସୁଚିନ୍ତିତ ଅପରାଧରେ ପରିଣତ ହେଲାଣି। କୋଭିଡ୍-୧୯ ଲକ୍ଡାଉନ୍ ଯୋଗୁ ଲୋକେ ଧାର ଉଦ୍ଧାରକରି ଗୁଜୁରାଣ ମେଣ୍ଟାଉଥିବାରୁ ଆଗାମୀ ଦିନରେ ଏହି ସମସ୍ୟା ଆହୁରି ବୃଦ୍ଧିପାଇବ। ବିଶେଷକରି ଶିଶୁ ଓ କିଶୋରମାନେ ଏଥିରେ ଅଧିକ ଶିକାର ହେବେ। ତେଣୁ ସରକାର ଏବେଠାରୁ ଏ ଦିଗରେ ପଦକ୍ଷେପ ନେବା ଆବଶ୍ୟକ ବୋଲି ଇଣ୍ଟରନ୍ୟାଶନାଲ ଜଷ୍ଟିସ୍ ମିଶନର ଓଡ଼ିଶା ପ୍ରକଳ୍ପ ନିର୍ଦ୍ଦେଶକ ନୀନୁ ଥୋମାସ୍ କହିଛନ୍ତି।
