ଚେନ୍ନାଇ, ୨୧।୧୨: ତାମିଲନାଡ଼ୁର ଚେନ୍ନାଇ ଉପକଣ୍ଠ ଥିରୁପୋରୁରସ୍ଥିତ ଅରୁଲ୍ମିଗୁ କନ୍ଦସ୍ବାମୀ ମନ୍ଦିରରୁ ଏକ ଅଜବ ଘଟଣା ସାମ୍ନାକୁ ଆସିଛି। ବିନାୟଗପୁରମ ନିବାସୀ ଦୀନେଶ ଗତ ମାସରେ ସପରିବାର ଏହି ମନ୍ଦିରକୁ ଦର୍ଶନ କରିବା ପାଇଁ ଆସିଥିଲେ। ଦର୍ଶନ ସାରି ସେ ମନ୍ଦିରକୁ ଦାନ କରିବା ଉଦ୍ଦେଶ୍ୟର ଦାନବାକ୍ସ ନିକଟକୁ ଯାଇଥିଲେ। ଦାନ ଦେବା ବେଳେ ଅସାବଧାନତା ବଶତଃ ତାଙ୍କ ଶାର୍ଟ ପକେଟରେ ଥିବା ଆଇ ଫୋନ୍ଟି ଭୁଲ୍ରେ ଦାନବାକ୍ସ ମଧ୍ୟରେ ଖସିପଡ଼ିଥିଲା। ଘଟଣା ସମ୍ପର୍କରେ ଦୀନେଶ ତୁରନ୍ତ ମନ୍ଦିରରେ ଅଧିକାରୀଙ୍କୁ ଜଣାଇଥିଲେ ଏବଂ ତାଙ୍କ ଆଇ ଫୋନ୍ ଫେରାଇବାକୁ ଅନୁରୋଧ କରିଥିଲେ। ତେବେ ଆଇ ଫୋନ୍ ଫେରାଇବାକୁ ମନ୍ଦିର ପ୍ରଶାସନ ଅରାଜି ହୋଇଥିଲା। ଦାନବାକ୍ସରେ ଦିଆଯାଇଥିବା ପ୍ରତ୍ୟେକ ବସ୍ତୁକୁ ଈଶ୍ୱରଙ୍କର ସମ୍ପତ୍ତି ଭାବେ ଧରାଯାଇଥାଏ ବୋଲି ମନ୍ଦିର ପ୍ରଶାସନ ପକ୍ଷରୁ ତାଙ୍କୁ ଉତ୍ତର ମିଳିଥିଲା।
ସେହିପରି ଦାନବାକ୍ସ ୨ ମାସକୁ କେବଳ ଥରଟିଏ ପାଇଁ ଖୋଲାଯାଇଥାଏ ବୋଲି ମନ୍ଦିର ପ୍ରଶାସନ ପକ୍ଷରୁ ଦୀନେଶଙ୍କୁ କୁହାଯାଇଥିଲା। ଘଟଣା ସମ୍ପର୍କରେ ଦୀନେଶ ହିନ୍ଦୁ ରିଲିଜିଅନ ଆଣ୍ଡ ଚାରିଟେବଲ ଏଣ୍ଡାଓମେଣ୍ଟସ୍ (ଏଚ୍ଆର୍ ଆଣ୍ଡ ସିଇ) ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ। ଡିସେମ୍ବର ୨୧ରେ ଦାନବାକ୍ସ ଖୋଲାଯିବ, ତେଣୁ ସେହିଦିନ ମନ୍ଦିର ଆସିବାକୁ ଦୀନେଶଙ୍କୁ ‘ଏଚ୍ଆର୍ ଆଣ୍ଡ ସିଇ’ର ଅଧିକାରୀମାନେ ପରାମର୍ଶ ଦେଇଥିଲେ। ପୂର୍ବ ନିର୍ଦ୍ଧାରିତ ନିଷ୍ପତ୍ତି ଅନୁଯାୟୀ, ଶନିବାର ମନ୍ଦିରର ଦାନବାକ୍ସ ଖୋଲାଯାଇଥିଲା, କିନ୍ତୁ ଦୀନେଶଙ୍କୁ ତାଙ୍କ ଆଇ ଫୋନ୍ ମିଳି ନ ଥିଲା। ଫୋନ୍ ବଦଳରେ କେବଳ ଜରୁରୀ ଡେଟା ଡାଉନ୍ଲୋଡ୍ କରାଯାଇ ସିମ୍କାର୍ଡ ଯୋଗେ ଦିଆଯାଇପାରିବ ବୋଲି ଦୀନେଶଙ୍କୁ ଏଚ୍ଆର୍ ଆଣ୍ଡ ସିଇ ଅଧିକାରୀଙ୍କ ପକ୍ଷରୁ ବିକଳ୍ପ ଦିଆଯାଇଥିଲା। ଇତିମଧ୍ୟରେ ଏକ ନୂଆ ସିମ୍ କିଣି ସାରିଥିବା ଦୀନେଶ ଅଧିକାରୀଙ୍କ ଏହି ବିକଳ୍ପକୁ ଅଗ୍ରାହ୍ୟ କରିଦେଇଥିଲେ।
iPhone accidentally fell into the temple’s hundi..
The temple administration refused to return it the owner, saying it belonged to the temple.pic.twitter.com/4VgfcRk0Ib
— Vije (@vijeshetty) December 20, 2024
ଘଟଣାକୁ ନେଇ ତାମିଲନାଡ଼ୁ ଏଚ୍ଆର୍ ଆଣ୍ଡ ସିଇ ମନ୍ତ୍ରୀ ପି.କେ. ଶେକର ବାବୁ କହିଛନ୍ତି, ଇଚ୍ଛାଧୀନ ଭାବେ ହେଉ ଅଥବା ଅନିଚ୍ଛାକୃତ ଭାବେ ଦାନବାକ୍ସ ମଧ୍ୟରେ ପଡ଼ିଥିବା ବସ୍ତୁଗୁଡ଼ିକୁ ଭକ୍ତଙ୍କୁ ଫେରାଇବା ନେଇ କୌଣସି ନିୟମ ନାହିଁ। ମନ୍ଦିର ପ୍ରଶାସନ ନିୟମ ବିରୋଧରେ ଯାଇପାରିବ ନାହିଁ। ତେବେ ଏହି ମାମଲାରେ ଦୀନେଶଙ୍କୁ କ୍ଷତିପୂରଣ ଦିଆଯାଇ ପାରିବ। ବିଭାଗର ପରବର୍ତ୍ତୀ ବୈଠକରେ ଏନେଇ ଆଲୋଚନା କରାଯିବ ବୋଲି ସେ କହିଛନ୍ତି। ମନ୍ଦିର ପ୍ରଶାସନର ଜଣେ ଅଧିକାରୀ କହିଛନ୍ତି, ଆଇ ଫୋନ୍ଟିକୁ ଦାନ ହିସାବରେ ଦାନବାକ୍ସ ମଧ୍ୟରେ ପକାଯାଇଛି କି ଏହା ଭୁଲ୍ରେ ପଡ଼ିଯାଇଛି, ତାହା ମନ୍ଦିର ପ୍ରଶାସନ ସ୍ଥିର କରିପାରିବ ନାହିଁ। ତେଣୁ ଦାନବାକ୍ସ ମଧ୍ୟରୁ ମିଳିଥିବା ଆଇ ଫୋନ୍ ଉପରେ କେବଳ ଠାକୁରଙ୍କର ଅଧିକାର ରହିଛି ବୋଲି ସେ କହିଛନ୍ତି। ଉକ୍ତ ଘଟଣା ଏବେ ଦେଶବ୍ୟାପୀ ଚର୍ଚ୍ଚାର ବିଷୟ ପାଲଟିଛି।
