ଭୁବନେଶ୍ୱର,୧୦।୭(ବ୍ୟୁରୋ): ବିଶିଷ୍ଟ ସାହିତି୍ୟକ ତଥା ଲେଖକ ମନୋଜ କୁମାର ପଣ୍ଡାଙ୍କର ଗୁରୁବାର ପରଲୋକ ଘଟିଛି। ତାଙ୍କୁ ୬୫ବର୍ଷ ବୟସ ହୋଇଥିଲା। ହୃଦ୍ଘାତରେ ତାଙ୍କର ମୃତ୍ୟୁ ଘଟିଥିବା ଜଣାପଡିଛି। ୧୯୫୪ରେ ବଲାଙ୍ଗୀରରେ ଜନ୍ମଗ୍ରହଣ କରିଥିବା ମନୋଜ ଜଣେ କଥାଶିଳ୍ପୀ ତଥା ଭାଷା ବିଚାରକଭାବେ ବେଶ୍ ପରିଚିତ। ‘ହାଡ଼ ବଗିଚା’, ‘ବର୍ଣ୍ଣ ବଗିଚା’ ଓ ‘ମାୟା ବଗିଚା’ ଗଳ୍ପ ସଂକଳନ ପାଇଁ ସେ ପ୍ରସିଦ୍ଧି ଲାଭ କରିଥିଲେ। ‘ମାୟା ବଗିଚା’ ଗଳ୍ପ ସଂକଳନ ପାଇଁ ସେ ୨୦୧୫ରେ ସମ୍ମାନଜନକ ଶାରଳା ପୁରସ୍କାର ଲାଭ କରିଥିଲେ। ଏହାସହ ସେ ଅଖିଳ ମୋହନ ସାହିତ୍ୟ ସମ୍ମାନ ଓ ଅଶୋକ ଚନ୍ଦନ ସାହିତ୍ୟ ସମ୍ମାନ ହାସଲ କରିଥିଲେ। ୨୦୧୦ରେ ତାଙ୍କ ଦ୍ୱାରା ଅନୁଦିତ ପୁସ୍ତକ ‘ଦି ବୋନ ଗାର୍ଡେନ ଆଣ୍ଡ୍ ଅଦର ଷ୍ଟୋରିଜ’ ଅନ୍ତର୍ଜାତୀୟ ଗଳ୍ପ ପୁରସ୍କାର ପାଇଁ ଏସିଆ ମହାଦେଶରୁ ୧୦ ଜଣ ଗାଳ୍ପିକଙ୍କ ମଧ୍ୟରେ ସ୍ଥାନ ପାଇଥିଲେ। ଖୁବ୍ ବେଶି ଲେଖି ନ ଥିଲେ ମଧ୍ୟ ତାଙ୍କର କଥନଶୈଳୀ ଅତ୍ୟନ୍ତ ପ୍ରଭାବଶାଳୀ ଥିଲା। ସମକାଳୀନ ଗଳ୍ପ କ୍ଷେତ୍ରରେ ତାଙ୍କର ଏକ ନିଜସ୍ବ ଶୈଳୀ ରହିଥିଲା। ବର୍ଣ୍ଣନାବହୁଳ ଗପର ଧାରାଠାରୁ ଭିନ୍ନ ପ୍ରତୀକାତ୍ମକ ଗଳ୍ପଧାରାର ସେ ଜଣେ ଅଗ୍ରଣୀ ଶିଳ୍ପୀ ଥିଲେ। ଭାଷା, ଶୈଳୀ, ବିଷୟବସ୍ତୁ ଓ ଚରିତ୍ର ନିର୍ମାଣରେ ତାଙ୍କର ସ୍ବାତନ୍ତ୍ର୍ୟ ରହିଥିଲା। ବୃତ୍ତିରେ ଇଂଲିଶ ଶିକ୍ଷକ ଥିବା ପଣ୍ଡା ଚାକିରିରୁ ଅବସର ଗ୍ରହଣ କରି ସାହିତ୍ୟ ସାଧନାରେ ବ୍ରତୀ ଥିଲେ। କେବଳ ଗଳ୍ପ ରଚନା ନୁହେଁ, ପ୍ରବନ୍ଧ ଓ ଭାଷା ଚର୍ଚ୍ଚା କ୍ଷେତ୍ରରେ ମଧ୍ୟ ମନୋଜଙ୍କର ସ୍ବତନ୍ତ୍ର ଅବଦାନ ରହିଛି।
