ଭୁବନେଶ୍ୱର,୨ା୭: ଭୁବନେଶ୍ୱର ମହାନଗର ନିଗମ (ବିଏମସି) ଅତିରିକ୍ତ କମିଶନର ରତ୍ନାକର ସାହୁଙ୍କ ଉପରେ ଆକ୍ରମଣ ଅଭିଯୋଗରେ ଗିରଫ ହୋଇଥିବା ବିଜେପି କର୍ପୋରେଟର ଜଗନ୍ନାଥ ପ୍ରଧାନଙ୍କ ମାମଲାକୁ ନେଇ ବିଜେପି ରାଜ୍ୟ ସଭାପତି ମନମୋହନ ସାମଲ ଗୁରୁତ୍ୱପୂର୍ଣ୍ଣ ବୟାନ ଦେଇଛନ୍ତି। ଜଗନ୍ନାଥ ପ୍ରଧାନଙ୍କ ସହ ଭାଜପା ରାଜ୍ୟ କାର୍ଯ୍ୟାଳୟରେ ହୋଇଥିବା ଆଲୋଚନା ସମ୍ପର୍କରେ ସେ କହିଛନ୍ତି ଯେ, ଏହା ଦଳର ଆଭ୍ୟନ୍ତରୀଣ ବ୍ୟାପାର ଏବଂ ଏ ସମ୍ପର୍କରେ ମିଡିଆକୁ ଅଧିକ ସୂଚନା ଦିଆଯାଇ ପାରିବ ନାହିଁ।
ବୁଧବାର ଜଗନ୍ନାଥ ପ୍ରଧାନଙ୍କ ସହ ଘଣ୍ଟାଏରୁ ଅଧିକ ସମୟ ଧରି ବୈଠକ ପରେ ସାମଲ ଗଣମାଧ୍ୟମକୁ କହିଛନ୍ତି, “ଯାହା ଘଟିଛି, ତାହାକୁ ସମସ୍ତେ ନିନ୍ଦା କରିଛନ୍ତି। ଏହି ମାମଲାରେ ଯାହା ନିଷ୍ପତ୍ତି ନେବାର ଅଛି, ତାହା ସରକାର ନେବେ।” ସେ ଆହୁରି କହିଛନ୍ତି, “ଯଦି କୌଣସି ନିଷ୍ପତ୍ତି ହୁଏ, ଆମ ଦଳୀୟ ମୁଖପାତ୍ର ଡାକି ଆପଣଙ୍କୁ ସୂଚନା ଦେବେ।”
ଏହି ଘଟଣା ସମ୍ପର୍କରେ ସୂଚନା ଅନୁଯାୟୀ, ଜଗନ୍ନାଥ ପ୍ରଧାନ ଓ ତାଙ୍କ ସହଯୋଗୀମାନେ ବିଏମସି ଅଫିସରେ ଜନଶୁଣାଣି ସମୟରେ ରତ୍ନାକର ସାହୁଙ୍କ ଚାମ୍ବରରେ ପଶି ତାଙ୍କ ଉପରେ ଆକ୍ରମଣ କରିଥିବା ଅଭିଯୋଗ ହୋଇଛି। ଏହି ଘଟଣା ପରେ ରତ୍ନାକର ସାହୁ ଅସୁସ୍ଥ ହୋଇ କ୍ୟାପିଟାଲ ହସ୍ପିଟାଲରେ ଭର୍ତ୍ତି ହୋଇଛନ୍ତି। ଖାରବେଳ ନଗର ଥାନା ପୁଲିସ ଏହି ମାମଲାରେ ଜଗନ୍ନାଥ ପ୍ରଧାନଙ୍କ ସମେତ ରଶ୍ମୀ ମହାପାତ୍ର ଓ ଦେବାଶିଷ ପ୍ରଧାନଙ୍କୁ ଗିରଫ କରିଛି।
ଜଗନ୍ନାଥ ପ୍ରଧାନଙ୍କ ଇସ୍ତଫା କିମ୍ବା ଦଳୀୟ କାର୍ଯ୍ୟରୁ ସସ୍ପେନ୍ସନକୁ ନେଇ ଚର୍ଚ୍ଚା ଜୋର ଧରିଥିବା ବେଳେ ଭାଜପା କାର୍ଯ୍ୟାଳୟ ବାହାରେ ତାଙ୍କର ଶତାଧିକ ସମର୍ଥକଙ୍କ ଭିଡ଼ ମଧ୍ୟ ଏକତ୍ରିତ ହୋଇଥିଲା। ଓଡ଼ିଶା ପ୍ରଶାସନିକ ସେବା (ଓଏଏସ) ଆସୋସିଏସନ ଏହି ଘଟଣାରେ କଠୋର କାର୍ଯ୍ୟାନୁଷ୍ଠାନ ଦାବି କରି ଛୁଟିରେ ରହିବା ନିଷ୍ପତ୍ତି ନେଇଛି, ଯାହା ରାଜନୈତିକ ଓ ପ୍ରଶାସନିକ ମହଲରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି।
ସାମଲଙ୍କ ବୟାନ ଏହି ମାମଲାରେ ଭାଜପାର ସ୍ପଷ୍ଟ କରୁଥିବା ବେଳେ, ସରକାର ଏବଂ ଦଳ ପକ୍ଷରୁ ଆଗାମୀ ନିଷ୍ପତ୍ତି ଉପରେ ସମସ୍ତଙ୍କ ନଜର ରହିଛି। ଏହି ଘଟଣା ରାଜଧାନୀ ଭୁବନେଶ୍ୱରରେ ରାଜନୈତିକ ଚର୍ଚ୍ଚାକୁ ଆହୁରି ଉତ୍ତେଜିତ କରିଛି।
