ନୂଆଦିଲ୍ଲୀ,୯।୩: ଦିଲ୍ଲୀର ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆଙ୍କ ଅଡ଼ୁଆ ବେଳକୁ ବେଳ ବଢ଼ିବାରେ ଲାଗିଛି। ମନି ଲଣ୍ଡରିଂ ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ସିସୋଡିଆଙ୍କୁ ପ୍ରାୟ ୮ଘଣ୍ଟା ଧରି ପଚରାଉଚରା କରିବା ପରେ ଗୁରୁବାର ଗିରଫ କରିଛି। ଦିଲ୍ଲୀର ଅବକାରୀ ନୀତି ମାମଲା ତଥା କଥିତ ଅନିୟମିତତା ସହ ଜଡ଼ିତ ମନି ଲଣ୍ଡରିଂ ମାମଲାର ଯାଞ୍ଚ କରୁଛି ଇଡି। ଏନେଇ ଇଡି ଗୁରୁବାର ଦିଲ୍ଲୀର ତିହାର ଜେଲ୍ରେ ସିସୋଡିଆଙ୍କୁ ଦ୍ୱିତୀୟ ଥର ଲାଗି ପଚରାଉଚରା କରିଥିଲା। ତେବେ ଏହି ସମୟରେ ଇଡିକୁ ସିସୋଡିଆଙ୍କଠାରୁ ସନ୍ତୋଷଜନକ ଉତ୍ତର ନ ମିଳିବାରୁ ତାଙ୍କୁ ଗିରଫ କରିଛି। ଏହାପୂର୍ବରୁ ମଙ୍ଗଳବାର ବି ଇଡି ଜେଲ୍ରେ ସିସୋଡିଆଙ୍କୁ ପଚରାଉଚରା କରିଥିଲା। ସୂଚନା ମୁତାବକ, ସିବିଆଇ ମାମଲାରେ ମନୀଷ ସିସୋଡିଆଙ୍କ ଜାମିନ ଶୁଣାଣି ଶୁକ୍ରବାର ରୋଜ୍ ଏଭେନ୍ୟୁ କୋର୍ଟରେ ହେବାର ଥିଲା। ହେଲେ ଏହାର ଦିନକ ପୂର୍ବରୁ ଇଡି କାର୍ଯ୍ୟାନୁଷ୍ଠାନ ଗ୍ରହଣ କରି ସିସୋଡିଆଙ୍କୁ ଗିରଫ କରିଛି। ତିହାର ଜେଲ୍ର ବନ୍ଦ ଥିବା ସିସୋଡିଆଙ୍କୁ ପଚରାଉଚରା ପାଇଁ ଇଡି କୋର୍ଟରୁ ଅନୁମତି ନେଇଥିଲା। କୋର୍ଟ ମଧ୍ୟ ଇଡିକୁ ସିସୋଡିଆଙ୍କ ବୟାନ ରେକର୍ଡ ପାଇଁ ୩ଦିନର ସମୟ ଦେଇଥିଲେ।
