କେନ୍ଦ୍ରାପଡ଼ା ଅଫିସ,୩୦।୮: ଖରସ୍ରୋତା ନଦୀରୁ ଭଦ୍ରକକୁ ପାଣି ଦେବା ବିବାଦ ଏବେ ଆଇନଗତ କାର୍ଯ୍ୟାନୁଷ୍ଠାନ ଆଡ଼କୁ ମୁହଁାଉଛି। ଭିତରକନିକା ଇକୋ ସେନ୍ସିଟିଭ ଜୋନ୍ ମିଟିଂ ପ୍ରୋସିଡିଂ, ଆଇଆଇଟି ହାଇଦ୍ରାବାଦର ପରିବେଶ ଓ ସାମାଜିକ ପ୍ରଭାବ ରିପୋର୍ଟ, ଖରସ୍ରୋତା ନଦୀକୁ ଜଣେ ଲୋକଙ୍କୁ ବିକିବା ଆଦି ବିବାଦ ଏବେ ଆସିଛି। ପ୍ରକଳ୍ପ ସ୍ଥାନରେ ଥିବା ସୂଚନା ଫଳକ ଓ ଫର୍ମ ଜେ’ ମଧ୍ୟରେ ତାଳମେଳ ରହୁନାହିଁ। ପାଣି ନେବାକୁ ଥିବା ହିତାଧିକାରୀ ସଂଖ୍ୟାରେ ହେରଫେର କରାଯାଇଥିବା ଅଭିଯୋଗ ହେଉଛି।
ଏ ସମ୍ପର୍କରେ ସଂଗ୍ରାମ ସମିତି ସମ୍ପାଦକ ବିଧାନ ଦାସ କୁହନ୍ତି, ଖରସ୍ରୋତାକୁ ମୃତ ନଦୀ କରିବାକୁ ସରକାରୀ ଯୋଜନା ନିଶ୍ଚିତ ଭାବେ ପଣ୍ଡ ହେବ। କେନ୍ଦ୍ରାପଡ଼ା ଜିଲା ରାଜକନିକା ବ୍ଲକ ବରୁଣାଡିହାର ପାଣି ଉଠା ପ୍ରକଳ୍ପ ସ୍ଥାନରେ ଗତ ୧୨ ତାରିଖରେ ସୂଚନା ଫଳକ ଲାଗିଛି। ଭଦ୍ରକ ଜିଲାର ବାସୁଦେବପୁର, ଧାମନଗର, ତିହିଡି ଓ ଚାନ୍ଦବାଲି ବ୍ଲକର ୯୧ପଞ୍ଚାୟତର ଲୋକଙ୍କୁ ପାନୀୟ ଜଳ ଯୋଗାଣ ପାଇଁ ପ୍ରକଳ୍ପ ନିର୍ମାଣ ହେଉଥିବା ଦର୍ଶାଯାଇଛି। ଭଦ୍ରକ ଗ୍ରାମୀଣ ଜଳ ଯୋଗାଣ ଓ ପରିମଳ ବିଭାଗ ଦ୍ୱାରା ଏଠାରେ ଦର୍ଶାଯାଇଥିବା ହିତାଧିକାରୀଙ୍କ ସଂଖ୍ୟା ୨୦୧୧ ଜନଗଣନା ଅନୁଯାୟୀ ୬,୧୬,୮୨୮ରହିଛି। ଏଥିରେ ସହରାଞ୍ଚଳକୁ ପାନୀୟ ଜଳ ଯୋଗାଣ ନିମନ୍ତେ ସୂଚନା ନାହିଁ। ତେବେ ଏହି ବିଭାଗ ପକ୍ଷର ୪ ବ୍ଲକ ସହ ଭଦ୍ରକ, ବାସୁଦେବପୁର ମ୍ୟୁନିସିପାଲିଟି, ଧାମନଗର, ଚାନ୍ଦବାଲି ଏନ୍ଏସିକୁ ଏହି ନଦୀ ଜଳକୁ ଯୋଗାଣ ପାଇଁ ବାଲେଶ୍ୱର ଜନସ୍ବାସ୍ଥ୍ୟ ବିଭାଗ ନିର୍ବାହୀ ଯନ୍ତ୍ରୀଙ୍କ ଅନୁମତି ପାଇଁ ୨୦୧୮ଜୁନ୍ ୨୧ରେ ଚିଠି (ନଂ. ୩୧୭୯) ଉଲ୍ଲେଖ କରାଯାଇଛି। ଚିଠିରେ ୪ ବ୍ଲକ ଓ ୪ ସହରାଞ୍ଚଳର ଜନସଂଖ୍ୟା ୨୦୧୧ ଜନଗଣନା ଆଧାରରେ ୬,୩୬,୩୫୬ ଜଣ ବୋଲି ଉଲ୍ଲେଖ କରାଯାଇଛି। ଏହି ଦୃଷ୍ଟିରୁ ୪ ସହରାଞ୍ଚଳରେ ମାତ୍ର ୨୦ ହଜାର ଲୋକ ବସବାସ କରୁଥିବା ଜଣାପଡିଛି। ଲୋକସଂଖ୍ୟାରେ ହେରଫେର କରି ଦୈନିକ ୨୦ ମିଲିୟନ ଲିଟର ବଦଳରେ ୧୫୨ ମିଲିୟନ ଲିଟର ଖରସ୍ରୋତାରୁ ଜଳ ଉଠାଇବାକୁ ଯୋଜନା ରହିଥିବା ସ୍ପଷ୍ଟ ହୋଇଛି। ଏତେ ପରିମାଣରେ ଜଳ ଉଠାଣ ହେଲେ ସ୍ଥାନୀୟ ଅଞ୍ଚଳରେ ପାନୀୟ ଜଳ ସମସ୍ୟା ଉତ୍କଟ ସାଙ୍ଗକୁ ଚାଷ ଜମିରେ ଲୁଣାପାଣି ମାଡିଯିବ, ଭିତରକନିକା ପରିବେଶ ନଷ୍ଟ ହେବ ବୋଲି ସେ ଅଭିଯୋଗ କରିଛନ୍ତି।
ସେହିପରି ଆଇନଗତ କାର୍ଯ୍ୟାନୁଷ୍ଠାନ ପାଇଁ ପ୍ରସ୍ତୁତ ହେଉଥିବା ସାମାଜିକ କର୍ମୀ ସଞ୍ଜୟ ବେହୁରା, ଡ. ପ୍ରଦୀପ କୁମାର ତରାଇ, ଆଳୟ କୁମାର ସାମନ୍ତରାୟ, ପ୍ରତାପ ଚନ୍ଦ୍ର ମହାନ୍ତି, ଅଧ୍ୟାପକ କ୍ଷିତୀଶ କୁମାର ସିଂହ କହିଛନ୍ତି, ଇକୋ ସେନ୍ସିଟିଭ ଜୋନ୍ ମଧ୍ୟରେ ଥିବା ଏହି ପ୍ରକଳ୍ପକୁ ନେଇ ବହୁବିଧ ଆଇନଗତ ଦିଗର ତର୍ଜମା ଚାଲିଛି। ବରୁଣାଡିହା ମୌଜାରେ ଥିବା ଖରସ୍ରୋତା ନଦୀ ବିକ୍ରିକୁ ସରକାରୀ ଭାବେ ସ୍ବୀକୃତି ମିଳିବା, କ୍ରୟ କରିଥିବା ବ୍ୟକ୍ତି ଆନ୍ଧ୍ରପ୍ରଦେଶର ସେକ୍ ହୋସେନ ବାଶାହାଙ୍କ ସମ୍ପତ୍ତି ଉପରେ ସରକାରୀ ଭାବେ ପ୍ରକଳ୍ପ ନିର୍ମାଣ କରିବା, ପ୍ରକଳ୍ପ ପରେ ଭିତରକନିକା ପରିବେଶ ଉପରେ ପ୍ରଭାବ ସମ୍ପର୍କରେ ଆଇଆଇଟି ହାଇଦ୍ରାବାଦର ରିପୋର୍ଟରେ ତଥ୍ୟ ନ ଥିବା, ଅତ୍ୟଧିକ ଜଳ ଉଠାଣ ସ୍ଥାନୀୟ ଅଞ୍ଚଳ ଉପରେ ପ୍ରଭାବ ପକାଇବା, ପ୍ରକଳ୍ପ ସରକାରୀ ଅଥବା ବେସରକାରୀ ଆଦି ପ୍ରଶ୍ନକୁ ନେଇ ଏନ୍ଜିଟି(ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ) ସହ ବିଭିନ୍ନ ନ୍ୟାୟାଳୟରେ ଆସନ୍ତା ବୁଧବାର ସୁଦ୍ଧା ମାମଲା ରୁଜୁ ହେବ। ଅପରପକ୍ଷରେ ଜିଲାପାଳ ଅମୃତ ଋତୁରାଜ ପ୍ରକଳ୍ପ କାର୍ଯ୍ୟ ଚାଲିଛି ଓ ଆଇନଗତ ତର୍ଜମା ହୋଇଥିବା ମତ ଦେଇଛନ୍ତି।
