ବାଲକୋନି କିମ୍ବା ଛାତରେ ଫୁଲଗଛ ଲଗାଇବା ବହୁତ ଶୁଣିଥିବେ ଦେଖିଥିବେ ମଧ୍ୟ। ମାତ୍ର ଜଣେ ବ୍ୟକ୍ତି ଘରର ଛାତ ଉପରେ ଆମ୍ବ ଫଳାଇଛନ୍ତି ଶୁଣିଲେ ନିଶ୍ଚିତ ଆଶ୍ଚର୍ଯ୍ୟ ଲାଗିବ। ଏହା ପୁଣି ଗୋଟିଏ କି ଦୁଇଟା ନୁହେଁ, ଏକା ସାଥୀରେ ୪୦ଟି ଆମ୍ବ ଗଛ ଲଗାଇ ଫଳାଇବାରେ ସଫଳ ହୋଇଛନ୍ତି ଜଣେ ବ୍ୟକ୍ତି।
ଏମିତି ଅସମ୍ଭବକୁ ସମ୍ଭବ କରି ଦେଖାଇଛନ୍ତି ଏର୍ନାକୁଲମର ୬୩ ବର୍ଷୀୟ ଜୋସେଫ୍ ଫ୍ରାନ୍ସି। ଯଦିଓ ଜୋସେଫ୍ ଜଣେ ଏୟାର କଣ୍ଡିଶନର ଟେକ୍ନିସିଆନ, କିନ୍ତୁ ବର୍ତ୍ତମାନ ଲୋକେ ତାଙ୍କୁ ଜଣେ ବୃଦ୍ଧ କୃଷକ ବୋଲି ସମ୍ବୋଧନ କରୁଛନ୍ତି। ଜୋସେଫ୍ଙ୍କ ପୂର୍ବପୁରୁଷମାନେ ମଧ୍ୟ କୃଷକ ଥିଲେ। ଜୋସେଫ୍ଙ୍କ ଜେଜେମା’ଙ୍କ ଘରେ ଅନେକ ପ୍ରକାରର ଗୋଲାପ ଚାଷ କରିଥିଲେ। ଜୋସେଫ ଜେଜେମାଙ୍କ ଠାରୁ ଏହି ଗଛ ଲଗାଇବା ପ୍ରେରଣା ପାଇଥିଲେ। ନୂତନ ଘରକୁ ଯିବା ପରେ ଜୋସେଫ୍ ୨୫୦ ପ୍ରକାରର ଗୋଲାପ ଏବଂ ଛତୁ ଚାଷ କରିଥିଲେ।
ଏହା ପରେ ସେ ଭାବିଲେ, ଯଦି ଏସବୁ ଗଛ ଭଲ ଭାବରେ ବଢ଼ି ପାରୁଛନ୍ତି ତେବେ ଆମ୍ବ ଗଛ କାହିଁକି ବଞ୍ଚିପାରିବନି। ତେଣୁ ସେ ଘରର ଛାତରେ ଗଛ ଲଗାଇବା ପାଇଁ ପିଭିସି ଡ୍ରମ୍ କିଣି ଆଣି ଏହାକୁ କାଟି ସେଥିରେ ଆମ୍ବ ଗଛ ଲଗାଇଲେ। ଆଜି ଏହି ଡ୍ରମ୍ରେ ଆମ୍ବ ଗଛ ପ୍ରାୟ ୫ରୁ ୯ଫୁଟ ଉଚ୍ଚତାର ହୋଇଛି। ଆଉ ସେଥିରେ ଆମ୍ବ ମଧ୍ୟ ଫଳିଥିବା ଦେଖିବାକୁ ମିଳିଛି।
ଜୋସେଫ୍ଙ୍କ ବଗିଚାରେ ଆଲଫୋନସୋ, ମାଲଗୋଭା, ନୀଲମ୍, କେଶର ଭଳି ଲୋକପ୍ରିୟ କିସମ ସହିତ ୪୦ରୁ ଅଧିକ ପ୍ରଜାତିର ଆମ୍ବ ଗଛ ରହିଛି। କେବଳ ଏତିକି ନୁହେଁ, ଜୋସେଫ୍ ଏକ ନୂତନ ପ୍ରକାରର ଆମ୍ବ ପ୍ରଜାତି ଲଗାଇଛନ୍ତି। ଏହି ଆମ୍ବ ପ୍ରଜାତିର ନାମ ସ୍ତ୍ରୀଙ୍କ ନାମରେ ‘ପାଟ୍ରିସିୟା’ ରଖିଛନ୍ତି। ଜୋସେଫ୍ କହିଛନ୍ତି ଯେ, ପାଟ୍ରିସିୟା ସବୁଠାରୁ ମିଠା ଆମ୍ବ।
ଯେକୌଣସି ଗଛର ଯତ୍ନ ନେବା ଏକ ଚ୍ୟାଲେଞ୍ଜିଂ କାର୍ଯ୍ୟ। ଫଳର ନିରାପତ୍ତା, ଠିକ୍ ସମୟରେ ଖତଦେବା, ଜଳସେଚନ, ଗଛ କାଟିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଜୋସେଫ୍ ଏହି ଆମ୍ବ ବିକ୍ରି ପାଇଁ ନୁହେଁ, ସାଙ୍ଗସାଥୀ, ବନ୍ଧୁବାନ୍ଧବ ଏବଂ ପଡ଼ୋଶୀଙ୍କୁ ମାଗଣାରେ ବାଣ୍ଟିବା ପାଇଁ ଲଗାଇଛନ୍ତି। ଏହି ମହତ୍ୱପୂର୍ଣ୍ଣ କାର୍ଯ୍ୟ ପାଇଁ ତାଙ୍କୁ ସବୁ ମହଲରୁ ପ୍ରଶଂସା କରାଯାଉଛି।
