କୋକସରା,୯ା୧୨ (ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲାରେ ଖରିଫ ଧାନ ମଣ୍ଡି ନିର୍ଦ୍ଧାରିତ ତାରିଖ ବିଳମ୍ବରେ ଖୋଲିଛି। ବର୍ତ୍ତମାନ ସୁଦ୍ଧା ମଣ୍ଡିର ଚିତ୍ର ସ୍ପଷ୍ଟ ହୋଇନାହିଁ। ଫଳରେ ଚାଷୀମାନେ ଧାନ ଅମଳ କରି ବିକ୍ରି ପାଇଁ ଦିନ ଗଣୁଛନ୍ତି। ମଣ୍ଡି ଖୋଲିବା ସତ୍ତ୍ୱେ ଧାନ କ୍ରୟ ନ ହେବାରୁ ଚାଷୀ ଚିନ୍ତାରେ ପଡିଛନ୍ତି। କୋକସରା ବ୍ଲକରେ ଡିସେମ୍ବର ୨ରୁ ଚାଷୀଙ୍କ ଅନ୍ଲାଇନ ଟୋକାନ ଜେନେରେଟ ହୋଇଛି। ମଣ୍ଡିରେ ଧାନ କ୍ରୟ ବିଳମ୍ବ ହେଲେ ଟୋକନ୍ ଅବଧି ଶେଷକୁ ନେଇ ଚାଷୀ ଚିନ୍ତା ପ୍ରକଟ କରିଛନ୍ତି।
କୋକସରା ମଣ୍ଡି ସୋମବାର ଖୋଲିଥିବା ବେଳେ କୋକସରା ଓ ମାଝୀଗୁଡା ପଞ୍ଚାୟତର ୩୭ଜଣ ଚାଷୀଙ୍କ ୧୪୮୦ କୁଇଣ୍ଟାଲ ଧାନ ବିକ୍ରି ପାଇଁ ମଣ୍ଡିରେ ଥିବା ପ୍ୟାକ୍ସ ସମ୍ପାଦକ ସୂଚନା ଦେଇଛନ୍ତି। ତେବେ ମଣ୍ଡିରେ ୫ ହଜାରରୁ ଅଧିକ କୁଇଣ୍ଟାଲ ଧାନ ପଡି ରହିଥିବା ଚାଷୀମାନେ କହିଛନ୍ତି।
କୋକସରା ମଣ୍ଡି ପାଇଁ ପ୍ରଥମ ପର୍ଯ୍ୟାୟରେ ୩୧ ହଜାର କୁଇଣ୍ଟାଲ ଧାନ କ୍ରୟ ଟାର୍ଗେଟ୍ ଆସିଥିବା ବେଳେ ୬ଟି ମିଲକୁ ଧାନ କ୍ରୟ ପାଇଁ ଟ୍ୟାଗ କରାଯାଇଛି। ତେବେ ସୋମବାର ପ୍ୟାକ୍ସ ଓ ଆର୍ଏମ୍ସି କର୍ମଚାରୀ ମଣ୍ଡିରେ ଉପସ୍ଥିତ ରହି ମିଲର୍ସଙ୍କୁ ଅପେକ୍ଷା କରିବା ସତ୍ତ୍ୱେ ମଧ୍ୟ କେହି ଆସି ନ ଥିଲେ। ଏ ନେଇ ବ୍ଲକସ୍ତରୀୟ ମଣ୍ଡି ପରିଚାଳନା ପ୍ରଶାସନିକ ଅଧିକାରୀଙ୍କୁ ପ୍ୟାକ୍ସ କର୍ତ୍ତୃପକ୍ଷ ଅବଗତ କରାଇଥିଲେ। କୋକସରା ବିଡ଼ିଓ ତଥା ମଣ୍ଡି ପର୍ଯ୍ୟବେକ୍ଷକ ଦାୟିତ୍ୱରେ ଥିବା ବିଶ୍ୱନାଥ ରାଉତଙ୍କ ପ୍ରତିକ୍ରିୟା ନେବାରୁ ସେ ଏ ସମ୍ପର୍କରେ ଅବଗତ ଅଛନ୍ତି, ପ୍ରଶାସନ ପକ୍ଷରୁ ମିଲର୍ସଙ୍କ ସହ ଆଲୋଚନା ହୋଇଛି ଓ ଶୀଘ୍ର ଚାଷୀଙ୍କ ଧାନ ମଣ୍ଡିରୁ କ୍ରୟ ଆରମ୍ଭ ହେବ ବୋଲି କହିଛନ୍ତି।
