ନୂଆଦିଲ୍ଲୀ,୧୧ା୮(ପି.ଟି.)-ଭାରତୀୟ ହକି ଟିମ୍ ଫରଓ୍ବାର୍ଡ ମନ୍ଦୀପ ସିଂଙ୍କର କୋଭିଡ୍-୧୯ ଟେଷ୍ଟରେ ପଜିଟିଭ୍ ଆସିଛି। କରୋନରେ ସଂକ୍ରମିତ ହେବାରେ ସେ ୬ଷ୍ଠ ଜାତୀୟ ଖେଳାଳି। ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ(ସାଇ) ତରଫରୁ ସୋମବାର ଏହା ଘୋଷଣା କରାଯାଇଛି। ଜଳନ୍ଧରର ଏହି ୨୫ ବର୍ଷୀୟ ଖେଳାଳିଙ୍କ ନିକଟରେ କୌଣସି ଲକ୍ଷଣ ଦେଖାଯାଇ ନ ଥିଲା। ବେଙ୍ଗାଲୁରୁରେ ସେ ଅନ୍ୟ ୫ ପଜିଟିଭ୍ ଖେଳାଳିମାନଙ୍କ ସହ ଡାକ୍ତରଙ୍କ ଦ୍ୱାରା ଚିକିତ୍ସିତ ହେଉଛନ୍ତି। ସାଇ ସେଣ୍ଟରରେ ଅଗଷ୍ଟ ୨୦ରେ ଜାତୀୟ କ୍ୟାମ୍ପ ଆରମ୍ଭ ହେବା କାର୍ଯ୍ୟକ୍ରମ ରହିଛି। ବେଙ୍ଗାଲୁରୁସ୍ଥିତ ସାଇର ନ୍ୟାଶନାଲ ସେଣ୍ଟର ଅଫ୍ ଏକ୍ସଲେନ୍ସଠାରେ ଜାତୀୟ କ୍ୟାମ୍ପ ଆୟୋଜନ କରାଯାଇଛି। ସେଠାରେ ଭାରତୀୟ ପୁରୁଷ ହକି ଦଳର ମନଦୀପ ସିଂଙ୍କ ସମେତ ଅନ୍ୟ ୨୦ ଜଣ ଖେଳାଳିଙ୍କ କୋଭିଡ୍ ଟେଷ୍ଟ (ଆରଟି ପିସିଆର୍) ହୋଇଥିଲା। ଏକ ମାସ ଛୁଟି କଟାଇ ଫେରିବା ପରେ ଖେଳାଳିମାନଙ୍କର କୋଭିଡ୍-୧୯ ଟେଷ୍ଟ ହୋଇଥିଲା। ଗତ ସପ୍ତାହରେ ଭାରତୀୟ ଅଧିନାୟକ ମନପ୍ରୀତ ସିଂ ଓ ଅନ୍ୟ ୪ ଖେଳାଳି ଡିଫେଣ୍ଡର, ସୁରେନ୍ଦ୍ର କୁମାର, ଜସ୍କରନ ସିଂ, ଡ୍ରାଗ୍ ଫ୍ଲିକର ବରୁଣ କୁମାର ଏବଂ ଗୋଲକିପର କ୍ରିଶନ ବାହାରଦୁର ପାଠକ ପ୍ରମୁଖଙ୍କ ଫଳାଫଳ ପଜିଟିଭ ଆସିଥିଲା। ସାଇ ଡାକ୍ତରମାନଙ୍କ କହିବା ଅନୁସାରେ ସମସ୍ତ ଖେଳାଳିଙ୍କ ନିକଟରେ ସାମାନ୍ୟ ଲକ୍ଷଣ ପ୍ରକାଶ ପାଇଥିଲା। ବେଙ୍ଗାଲୁରୁସ୍ଥିତ ନ୍ୟାଶନାଲ ସେଣ୍ଟର ଅଫ୍ ଏକ୍ସଲେନ୍ସଠାରେ ସେମାନଙ୍କୁ ଚିକିତ୍ସିତ କରାଯାଇଛି। ସେମାନଙ୍କ ସ୍ବାସ୍ଥ୍ୟାବସ୍ଥା ଭଲ ରହିଛି।
