ଭୁବନେଶ୍ୱର,୨୫।୪ (ବ୍ୟୁରୋ): ଖାରବେଳନଗର ଥାନା ଅନ୍ତର୍ଗତ ମାଷ୍ଟରକ୍ୟାଣ୍ଟିନସ୍ଥିତ ଚନ୍ଦ୍ରମା ଆପାର୍ଟମେଣ୍ଟରୁ ଖସି ଆଇନ ଛାତ୍ର ଅନିରାଜ ମାନସ ଟୁଡୁଙ୍କ ମୃତ୍ୟୁ ଘଟଣାରେ ନୂଆ ତଥ୍ୟ ସାମ୍ନାକୁ ଆସିଛି। ପୋଲିସ ଆପାର୍ଟମେଣ୍ଟର ସିସିଟିଭି ଫୁଟେଜ ପାଇବା ପରେ ତଦନ୍ତର ମୋଡ଼ ବଦଳିଛି। ବିବାର ରାତିରେ ଏହି ଘଟଣା ଘଟିଥିବାବେଳେ ମାନସ ଆପାର୍ଟମେଣ୍ଟରୁ ଡେଇଁ ପଡୁଥିବା ଦୃଶ୍ୟ ସିସିଟିଭି ଫୁଟେଜରେ ଦେଖିବାକୁ ମିଳୁଛି। ସେ କିଛି ସମୟ ଧରି ଫୋନ୍ରେ କଥା ହୋଇ ଚାଲି ଚାଲି ଯିବା ସହ ୭ ମହଲାରୁ ଡେଇଁ ପଡୁଛନ୍ତି। ତେବେ ସେ କାହିଁକି ଏଭଳି ନିଷ୍ପତ୍ତି ନେଲେ ଓ ଆପାର୍ଟମେଣ୍ଟକୁ କାହାକୁ ଦେଖା କରିବାକୁ ଆସିଥିଲେ, ତାହାର ସଠିକ କାରଣ ଜଣାପଡି ନ ଥିବାବେଳେ ମୃତ୍ୟୁ ପୂର୍ବରୁ ସେ ତାଙ୍କ ଇନ୍ଷ୍ଟା ଆଇଡିରେ ‘ଆର ପାରିରେ ଦେଖା ହେବ’ ଲେଖି ପୋଷ୍ଟ କରିଥିବା ପୋଲିସ ଜାଣିବାକୁ ପାଇଛି। ତେବେ ଏହି ଲେଖା କାହା ଉଦ୍ଦେଶ୍ୟରେ ଲେଖା ହୋଇଛି ଓ କାହିଁକି ଏଭଳି ଲେଖିଛନ୍ତି ତାହାର ଠିକ ତଥ୍ୟ ପାଇଁ ପୋଲିସ ତାଙ୍କ ପରିବାର ସଦସ୍ୟ ଓ ସାଙ୍ଗସାଥୀଙ୍କୁ ପଚରାଉଚରା କରୁଛି। ଏହାସହ ସେ ଡେଇଁବା ପୂର୍ବରୁ ତାଙ୍କ ଭଉଣୀଙ୍କୁ ଶେଷ କଲ୍ କରିଥିବା କୁହାଯାଉଛି। ଏଥିରୁ ମାନସ ଆତ୍ମହତ୍ୟା କରିଥିବା ସନ୍ଦେହ କରାଯାଉଥିଲେ ମଧ୍ୟ ପୋଲିସ ପ୍ରକୃତ କାରଣ ପାଇବା ପାଇଁ ତଦନ୍ତକୁ ଜୋର୍ଦାର କରିଛି। ଅନ୍ୟପଟେ ପୋଲିସ କ୍ୟାପିଟାଲ ହସ୍ପିଟାଲରେ ଶବ ବ୍ୟବେଚ୍ଛେଦ ପରେ ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରିଛି। ଏନେଇ ପରିବାର ପକ୍ଷରୁ ଥାନାରେ କୌଣସି ଅଭିଯୋଗ ହୋଇ ନ ଥିଲେ ମଧ୍ୟ ପୋଲିସ ଏକ ଅପମୃତ୍ୟୁ ମାମଲା (ନଂ. ୧୧/୨୩) ରୁଜୁ କରି ଘଟଣାର ତଦନ୍ତ କରୁଛି। ଏହାସହ ଅନିରାଜ କାହା ସହ ଫୋନରେ କଥା ହେଉଥିଲେ ତାହାର ଯାଞ୍ଚ କରାଯିବ ବୋଲି ପୋଲିସ ପକ୍ଷରୁ ସୂଚନା ମିଳିଛି । ସୂଚନାଯୋଗ୍ୟ, ଅନିରାଜ ୟୁନିଟି-୬ ଗଙ୍ଗନଗରରେ ରହୁଥିଲେ। ତେବେ ତାଙ୍କ ପକେଟ୍ରୁ ମିଳିଥିବା ଆଇକାର୍ଡରୁ ସେ କଟକରେ ଥିବା ନ୍ୟାଶନାଲ ଲ ୟୁନିଭର୍ସିଟିରେ ପାଠ ପଢୁଥିବା ଜଣାପଡିଛି।
